MANILA, Philippines – Higit 300 kilo ng shabu ang nakuha mula sa 500 piraso ng tea bags na may marka ng Chinese characters, sa isang warehouse na nirerentahan ng isang Chinese national sa
Purok 4, Irisan nitong Miyerkules, Marso 29.

Naaresto naman ang Chinese national na si Hui Ming, alyas “Tan”, nang ni-raid ng mga tauhan mula sa Regional Drug Enforcement Unit (RDEU) ng Cordillera police at Philippine Drug Enforcement Agency (PDEA) ang naturang warehouse.

Nakuha mula sa suspek ang shabu na nagkakahalaga ng P2 bilyon.

Ito na ang maituturing na pinakamalaking halaga ng shabu na nakuha sa hilagang Luzon mula pa sa mga nakalipas na taon.

Hinihintay pa ang kasong isasampa kay Ming pagkatapos ng imbentaryo ng mga nakumpiskang shabu. RNT/JGC

MANILA, Philippines – Umakyat na sa tatlo ang bilang ng mga nasawi sa nangyaring pananambang sa Maguindanao del Sur nitong Lunes ng gabi, Marso 27 makaraang mamatay na rin ang ama at kapatid ng sanggol na nauna nang iniulat na nasawi.

Ayon kay Capt. Ramillo Serame, municipal police chief, ang ama ay kinilalang si Sadam Mamasainged, at tatlong taong gulang na anak nito, na nasawi nitong Martes ng gabi, Marso 28 habang ginagamot sa ospital.

Matatandaan na nauna nang iniulat na nasawi ang walong buwang gulang na sanggol ng Mamasainged family makaraang pagbabarilin ng hindi pa tukoy na grupo.

Ani Serame, sakay ng tricycle si Mamasainged at pamilya nito mula sa Ramadan evening prayers nang tambangan ang mga ito sa Sitio Bagurot, Barangay Tuayan Mother, pasado alas-7 ng gabi.

Nakatakas si Faira, asawa ni Mamasainged, at pamangkin nito kung kaya’t hindi sila napuruhan sa pamamaril.

Natagpuan ng mga awtoridad ang mga empty shell ng M16 at M14 Armalite rifles sa ambush site.

Kinondena naman ni Datu Hoffer Mayor Bai Ampatuan ang pag-atake at inatasan na ang pulisya na tukuyin ang mga suspek.

Sa inisyal na imbestigasyon, hinihinalang “rido” o away-pamilya ang motibo sa pag-atake. RNT/JGC

MANILA, Philippines- Nagsagawa ng kilos-protesta ang mga raliyesta at magsasaka sa harap ng Department of Agrarian Reform (DAR) building sa Eliptical Road sa Quezon City nitong Miyerkules.

Iginigiit nila sa pamahalaan ang tunay na programa sa land reform para palitan ang Comprehensive Agrarian Reform Program (CARP) at resolusyon sa land dispute sa mga hacienda at land estates na kinasasangkutan ng agrarian reform beneficiaries. Danny Querubin

MANILA, Philippines- Swak sa kulungan ang isang lalaki na diumano’y nang-holdap sa isang Indian National matapos ang isinagawang follow-up at manhunt operation laban sa suspek sa Valenzuela City.

Kinilala ni P/Col. Salvador Destura Jr, hepe ng Valenzuela City Police Station ang suspek na si Ferdinand Soliman, 36, nakatira sa 2nd St., Manila North Cemetery, Barangay 372, Sta. Cruz, Manila.

Base sa isinagawang imbestigasyon ng Valenzuela City Police, dakong alas-5:25 ng hapon araw ng Lunes, Marso 27 habang nangongolekta ng bayad sa pautang ang biktima na kinilalang si Harvinder Singh, 50, Indian national sa Happy Site Subdivision, Barangay Marulas ng lungsod nang bigla itong nilapitan, tinutukan ng baril at hinoldap ng suspek.

Agad tumakas ang mga suspek sakay ng kanilang gamit na motorsiklo matapos na matangay ang nakolektang P4,500 ng biktima.

Mabilis namang nakahingi ng tulong ang biktima sa nagpapatrulyang mga pulis mula sa substation-3 barangay Marulas.

Binabay nina PCpl Nicolas Gutierrez at Patrolman John Noe Martinez ang lugar na dinaanan ng mga suspek habang nagsasagawa ng flash alarm sa Station Tactical Operation Center (STOC) sa Valenzuela City Police Station at inilarawan ang uri ng motor, suot na damit at helmet ng mga suspek pati ang ruta na dinaanan ng mga ito.

Ibinahagi ng STOC ang deskripsyon ng mga suspek sa Detective Management Unit (DMU) at Station Intelligence Section (SIS) at agad na bumuo ang mga ito ng team na tutugis sa mga suspek.

Ayon kay PLt Ronald Bautista, hepe ng DMU, naaresto si Soliman bandang alas-5:53 ng hapon matapos ang isinagawang follow-up at manhunt operation habang nakatakas ang hindi pa nakikilalang kasama nito.

Narekober kay Soliman ang cash na P4,500, isang kalibre .38 baril na may tatlong bala, holster, helmet at ang motosiklong Yamaha Mio I habang pinaiimbestigahan ni P/Cpt. Ronald Sanchez, hepe ng SIS, kung sino ang may ari ng motorsiklo na gamit ng mga suspek at kung ito ay nakaw o carnap na motorcycle.

Mahaharap sa kasong robbery with threats and intimidation at paglabag sa Republic Act 10591 (Comprehensive Law on Firearms and Ammunition) ang suspek. R.A Marquez

PUERTO PRINCESA CITY, Palawan- Nakapagtala ng 96 na kaso ng hand, foot and mouth disease (HFMD) sa bayan ng Roxas sa probinsyang ito.

Base sa report ng pamahalaan panlalawigan ng Palawan, ang Barangay Magara ang may pinakamataas na bilang ng kaso ng HFMD na umabot sa 54; sunod ang Barangay Nicanor Zabala- 22; San Jose at Barangay IV, na may tig 5 kaso; Barangay New Barbacan-4; Barbacan II-2; Barangays I, III, Caramay at Tinitian, na may tig isang kaso.

Ang mga nadapuan ng sakit ay may mga edad: 0-11 na buwan ay may 6 na kaso; 1-4,- 31; 5-9 -41; at 10-14, ay may 18 kaso. at 57 sa mga ito ay mga lalaki habang ang 39 ay mga babae.

Ayon naman kay Dr. Justyne Barbosa, Medical Specialist II ng Provincial Health Office (PHO), na ang HFMD na sakit ay hindi ganun kalala na sakit at maaari lamang magkaroon ng dehydration ang isang pasyente kapag hindi ito agad nabigyan ng tamang gamutan.

Aniya, wala naman naitala sa probinsya ng Palawan na namatay sa nasabing sakit dahil agad naman itong nabibigyan ng lunas.

Samantala, iginiit naman ni Provincial Board Member Ma. Angela Sabando, sa ginanap na Sangguniang Panlalawigan regular session na gumawa ng aksyon ang PHO bago pa madagdagan ang bilang ng mga nadapuan ng HFMD. Mary Anne Sapico