MANILA, Philippines- Bahagyang bumaba ang bilang ng COVID-19 cases na naitala mula October 23 hanggang October 29, 2023 sa 1,088 kumpara sa nakaraang linggo, ayon sa Department of Health (DOH) nitong Martes.
Batay sa pinakabagong bulletin ng DOH, bumaba ang mga naitalang kaso sa saklaw na period mula sa 1,146 COVID-19 cases noong October 16-22.
Gayundin, sumadsad ang daily case average ng 5% mula 164 sa 155.
Nakapagtala naman ng 13 COVID-19-related deaths mula October 23-29. Lahat ng mga ito ay naganap nitong Oktubre.
Mayroon ding 10 pang severe at critical cases sa saklaw na period.
May kabuuang 259 COVID-19 severe at critical cases na-admit sa mga ospital hanggang nitong October 29. Katumbas ito ng 9.9% ng kabuuang COVID-19 admissions.
Mayroon ding 160 intensive care unit (ICU) beds na ginamit o 10.9% ng 1,462 beds. Samantala, 1,985 or 15.9% ng 12,494 non-ICU COVID-19 beds ang okupado.
Hinikayat ng DOH nitong Lunes ang publiko na huwag nang isama ang mga bata sa sementeryo ngayong All Saints’ at All Souls’ Days upang makaiwas sa anumang banta sa kalusugan dulot ng pagkukumpulan ng mga tao. RNT/SA
