CREMATORIUM TALO SA OMICRON SA S. KOREA

CREMATORIUM TALO SA OMICRON SA S. KOREA

March 24, 2022 @ 11:20 AM 3 months ago


INUUTUSAN na ng pamahalaang South Korea na magdoble kayod ang mga crematorium sa pagsusunog ng mga bangkay mula sa pananalasa ng Omicron variant.

Inuutusan din nito maging ang mga ospital na magdoble ng mga morgue at refrigerated van bilang imbakan ng mga bangkay.

Nasa kulang-kulang sa 400 ang namamatay sa Omicron mula sa mahigit 300,000 nagpopositibo sa nasabing COVID-19 variant  araw-araw.

Kaya naman, maging ang sunugan ng bangkay na pag-aari ng pamahalaang Seoul, nagsusunog na ng 131 bangkay mula sa dapat na 91 lamang mula umaga hanggang alas-10 ng gabi.

Ang 1,136 na morge sa mga ospital na kayang mag-imbak ng 8,700 bangkay sa isang araw ay inatasan nang magparami ng mga refrigerated van dahil sa bumagal ang pagsusunog ng bangkay sa pagdami ng mga ito.

Ganyan ang kalagayan ng South Korea na sobrang nagtitiwala na may herd immunity na sila sa COVID-19 dahil 80 porsyento 52 milyong mamamayan nito ang bakunado.

Dahil sa buo nilang tiwala na kaya nilang mabuhay  kahit may virus dahil bakunado sila, maaga nilang binuksan ang kanilang ekonomiya at nagkaroon na ng maramihang pagtitipon kahit saan Рsa trabaho, sa pamamasyal at iba pa.

At nang dumating ang halalang Presidential na katatapos lang sa kanila, nasira rin ang social distancing.

Hayan, dinadale na sila ng Omicron variant.

SA PILIPINAS?

Sabi ng Department of Health at ilang pribadong grupo na sumusubaybay sa COVID-19 sa bansa, daan-daan na lang ang nagpopositibo sa COVID-19 at kaunti na rin lang ang namamatay araw-araw.

Sabi nila, matagumpay kasi ang vaccination program, kasama na ang nasimulan nating pagbabakuna sa mga batang edad 5 pataas at patuloy ang ating pagbabakuna hanggang sa mga seniro citizen.

Naririyan din ang matapat na pagsunod ng karamihan sa mga Pilipino sa mga umiiral ng health protocol gaya ng pagsusuot ng face mask, social distancing, pagtitiyak ng malinis na kamay at iba pa.

Sabi pa ng DOH, wala pa namang palatandaan na inaatake ng COVID-19 ang mga maramihang pagtitipon kaugnay ng nalalapit nang halalan sa Mayo 9, 2022.

Naririyan din ang napakainit nang panahon na pumapatay sa virus sa mga nahahawakan nating mga pintuan ng mga sasakyan at gusali, sa mga laway at mucus na nailalabas natin sa mga basurahan at sa mga kalsanda at iba pa.

Gayundin na dahil sa init ng panahon, bibihira ang mga nagkakasakit sa sipon at iba pang sakit sa baga na pumupwersa sa atin na umubo at bumahing na roon kumakalat sa hangin ang virus.

TURISMO, HALALAN AT ALERT LEVEL 1

Sa Abril 1, bubuksan na ang Pilipinas sa turismong lokal at internasyunal at hindi bawal ang paparito na taga-Hong Kong at South Korea.

Bukas naman, simula na ng mga lokal na kampanyahan at masasama na sila sa nasyunal na kampanyahang.

Magsisimula na rin ang maraming face-to-face na klase sa 27 milyong estudyante sa mga lugar na nasa ilalim ng Alert Level 1 at higit pang magbubukas ang maraming negosyo na lilikha ng marami ring pagtitipon.

Ano kaya ang mangyayari kaugnay ng COVID-19?