MANILA, Philippines- Matapos ipatupad ang barya-baryang rollback nitong nakaraang linggo, rumesbak ang mga kompanya ng langis sa bansa makaraang magpatupad ng malakihang dagdag-presyo sa mga produktong petrolyo na magiging epektibo bukas.
Sa abiso ng mga kompanya ng langis sa bansa na pinangunahan ng Pilipinas Shell, Petron Corporation, Seaoil, PTT Philippines, Total Philippines, Unioil, Petro Gazz at Phoenix Petroleum, magpapatupad sila ng oil price hike na P1.60 sa kada litro ng gasolina, P1.10 sa kada litro ng diesel, at P1.05 sa kada litro naman ng kerosene epektibo alas-6 bukas ng umaga.
May big time oil price hike din sa mga nasabing produktong petrolyo sa kahalintulad na halaga ang kompanyang Caltex (CPI) na ipapatupad alas-12:01 bukas ng madaling araw habang ang kompanyang CleanFuel naman ay ipapatupad dakong alas-4:01 bukas ng hapon.
Ang ipapatupad na dagdag-presyo sa mga produktong petrolyo ay bunsod sa patuloy na paggalaw ng presyuhan nito sa pandaigdigang merkado. JAY Reyes
