DALAWANG PAROKYA,  TANGGAPAN NG GOBYERNO, NILOOBAN

DALAWANG PAROKYA,  TANGGAPAN NG GOBYERNO, NILOOBAN

November 26, 2022 @ 11:50 AM 2 months ago


DALAWANG parokya at isang opisina ng lokal na pamahalaan ang pinasok at pinagnakawan ng  ilang kabataang lalaki sa Cavite.

Una ay ang Saint Jude Parish sa Trece Martires City at ang pangalawa ay ang Saint Gregory the Great Parish sa Indang at  ang Indang Municipal Tourism Office noong Sabado, Nobyembre 19, 2022.

Ayon sa social media post ng Saint Jude Parish sa Trece Martires City,  nangyari ang panloloob  bandang 1:15 ng hapon samantalang ayon naman din sa social media post ng Saint Gregory the Great Parish sa Indang ay nangyari ang panloloob sa kanila bandang 2:52 ng hapon.

Ang mga nanloob ay umakyat sa 2nd Floor ng kumbento habang may funeral service sa simbahan. Ang isang kwarto sa kumbento ay pinasok kung saan may isang parish staff na natutulog.

Pagbukas ng pinto ay nagising ang parish staff at lumabas ng kwarto nang may napansin siyang nagtatago sa likod ng mga sofa sa sala na biglang  tumakbo pababa ng kumbento at lumabas sa likod na pinto papuntang St. Jude School.

Samantala, sa Saint Gregory the Great Parish naman ay nagtungo ang hindi makilalang suspek sa Capella De Los Santos at nakuha ang perang pinagbentahan ng chapel candles.

Bandang 3:00 ng hapon, ang Indang Municipal Tourism Office ay nilooban kung saan  dalawang cellphone ng empleyado ang nakuha.

Hinihinalang sumalisi ang suspek  matapos na saglit na pumanhik ang guard sa itaas ng opisina.

Sa mga larawang nakuha sa CCTV ng dalawang parokya ay mapapansing parang iisang tao lamang ang suspek dahil sa pareho ng damit na suot. Mapapansin lamang na sa Saint Jude Parish – Trece Martires ay naka pants ang suspek ngunit sa Saint Gregory the Great Parish – Indang ay naka short naman at may sumbrero sa ulo.

Pinag-iingat ang lahat at maging alerto sa inyong mga lugar, business establishments at tahanan. Ipagbigay alam agad sa may kapangyarihan kapag may kahina-hinalang  umaaligid sa inyong lugar.