IBA ang sinasabi ng ilan sa pagpunta ni Pangulong Ferdinand Marcos Jr. sa Davos, Switzerland para dumalo sa World Economic Forum .

Kesyo lamyerda lamang daw ito at sinayang ang malaking pondo para magbakasyon ang Pangulo at kanyang pamilya kabilang na ang ilang mga opisyal ng pamahalaan.

Di ko na tutukuyin pa isa-isa kung sino ang mga nagkakalat ng mga ganitong mga iñuendos kasama na ang ibang malalaking media outfit na walang ginawa kundi siraan ang kasalukuyang administrasyon.

Mahalagang itama natin ang maling balitang ito.

Sa totoo lang malaki ang nagawa ni Pangulong Bongbong Marcos sa pagdalo nito sa WEF. Siyam na multinational firms lang naman ang napapayag niya na maglagak ng puhunan at negosyo rito sa Pinas.

Bakasyon at lamyerda bang matatawag ito? Ang pakikipagpulong ba sa mga Chief Executive Officer ng malalaking kumpanya ay lamyerda nang matatawag. Hindi ah!

Naipakilala pa nga ni PBBM ang kontrobersyal na Maharlika Fund upang maenganyo ang mga negosyanteng mag-invest dito, para umangat ang ating ekonomiya.

Isa rin sa magandang resulta ng pagdalo ni PBBM sa WEF ay ang pagkakopo sa Astranis, isang US-based provider ng ‘low-orbit satellites’ na makapagpabilis sa pag-gamit ng internet.

Sa isa nga niyang pakikipagpulong, nadiinan at naselyuhan ang pamumuhunan ng kumpanyang Morgan Stanley, dito sa ating bansa.

Maging ang DP World na Dubai-based multinational logistics ay nadale ni Pangulong Bongbong na maglagay ng industrial park sa Clarkfield sa Pampanga.

Maraming “na-accomplish” ang bakasyong ito sa Switzerland. Naipaliwanag pa ni PBBM ang lagay ng ating ekonomiya at kung saan ang direksiyon nitong tinatahak.

Ilan lamang ‘yan sa mga nagawa ni PBBM na sinasabi ng iba na pagbabakasyon sa Davos, Switzerland. Kasi kung dudugtungan ko pa, kapusin ang espasyo ko para sa pahayagang ito.

oOo oOo oOo

Assalamu Alaikum Warahmatullahi Wabarakatuh!

KABILANG sa pagpapaigting ng batas sa occupational safety and health ang pagkakaroon ng safety officer o SO sa bawat establisimyento. May multang P40K kada-araw ang maaaring ipataw ng Department of Labor and Employment sa alinmang kompanyang susuway.

Sa talaan ng International Labor Organization, alam n’yo bang may average na 2.3 milyon katao bawat taon sa buong mundo ang namamatay dahil sa work-related accidents at illnesses? Kung susuriin natin ang statistics, aabot sa 6K katao ang nasasawi kada-araw.

Ayon sa batas, para masigurong tumatalima at naipatutupad ang requirement ng OSH program, kailangang kumuha o mag-designate ng safety officer ang bawat establisimyento.

Maliban sa pagkakaroon ng accredited OSH practitioner at consultant na tanging labor department lamang ang nagkakaloob, may apat pang kategorya para ma-qualify bilang SO ng kompanya.

SO1 ang tawag sa mga nakatapos ng DOLE-prescribed course na 10-Hr basic OSH course for SO1.
Mas angkop ito para sa mga micro, small and medium enterprise at low risk establishment na kokonti lamang ang empleyado. May magkahiwalay na 40-Hr prescribed courses para sa general at construction industry naman ang kailangang tapusin ng mga gustong maging SO2. Hindi kailangan ang experience sa qualification ng SO1 at SO2.

Sa kaso ng SO3, kailangang may 2 taon na experience bilang safety officer at dagdag na 48 hours advanced o specialized safety training course maliban sa natapos na 40-Hr prescribed courses na kinukuha rin ng isang SO2.

Mas mabigat naman ang requirement para maging SO4. Kailangang may 4 year SO3 experience ang aplikante. Maliban sa nakuha niyang 40-Hr prescribed course, kailangan niyang tapusin ang 80 hours advanced o specialized safety training courses at 320 hours na sama-samang related training at experience.

Kinakailangan lamang na isumite ng bawat aplikante ang kopya at ipakita ang orihinal na training certificates, certificate of employment at iba pang mahahalagang dokumento sa human resource department ng kompanya para maibigay ang official appointment kung sakaling makapasa sa evaluation.

Basahin ang department order 198-18 Chapter 4, Section 14 at labor advisory 04-19 ng DOLE para sa kumpletong detalye.

ISANG malungkot na balita ang naganap sa Cavite State University sa main campus nito sa Indang, Cavite noong Enero 23 taong kasalukuyan kung saan isang estudyante ang nasawi habang apat pa ang nasugatan.

Base sa ulat na naitala sa Indang Municipal Police Station, iniwang nakaparada ng driver ang isang puting Elf truck malapit sa outpost ng gate ng Saluysoy Resort na mismong nasa loob ng CvSU.

Bigla na lang umano umandar (gumulong pababa) ang nasabing sasakyan bagaman walang taong nakaupo sa harap ng manibela nito. Bagaman marami ang nakapansin sa paggalaw ng sasakyan ay walang nakagalaw upang pigilan ito.

Sa malas, nahagip ng trak ang umpukan ng mga estudayante na noon ay pawang nagpapahinga at nagre-review para sa kanilang exams sa linggong ito.

Dead on the spot ang isang babaeng freshman college nang maipit sa pagitan ng elf truck at puno. Sinasabing taga-Trece Martires City, Cavite ang biktima.

Tatlong kaklaseng babae naman ng nasawi at isang lalaki na estudyante rin ng nasabing paaralan ang sugatan kaya’t kaagad na isinugod sa General Emilio Aguinaldo Memorial Hospital sa Trece Martires City ng Indang Rescue Team (Indang Municipal Disaster Risk Reduction and Management Office ).
Aminado ang driver ng sasakyan na taga-Indang, Cavite na nakalimutan niyang i-hand brake ang trak. Nasa kostudiya ng pulis ang driver.

Kaugnay naman ng balita, nanawagan ang Central Student Government ng CvSU Main Campus sa mga estudyante at mga nakiusyoso na huwag mag-post sa social media ng mga larawan ng pangyayari bilang respeto sa biktima at sa pamilya nito na nasa kalagitnaan ngayon ng pagdadalamhati.

Ipinanawagan na rin ng CSG sa CvSU Administration na kung maari ay suspendihin na lang muna ang nakatakdang fiinals examinations sa linggong ito dahil sa pangyayari.

Para naman sa mga estudyante na nakasaksi sa pangyayari na dumaraan sa takot at lungkot, huwag mag-atubiling makipag-ugnayan at lumapit sa University Guidance Counselor upang matulungang mapayuhan upang maiwasan ang pagkakaroon ng trauma o iba pang posibleng magbigay sa kanilang ng alalahanin.

SA pagpasok ng bagong taon 2023, ipagpapatuloy ng Manila Water ang kanilang pangako sa pagbibigay ng libreng wastewater services sa mga customer nito, dahil inanunsyo nito ang iskedyul ng buwanang desludging caravan nito para sa 1st quarter ng 2023.

Ngayong Enero, ang mga serbisyong desludging ng Manila Water ay magsisimula sa Barangay 765, 767, 775, 790, 791, 796, at 798 sa Lungsod ng Maynila, Barangay Bagong Ilog sa Pasig City, Barangay Batingan at Mahabang Parang sa Binangonan at Barangay Mahabang Parang. sa Angono, Rizal.

Para sa buwan ng Pebrero, ang desludging caravan ay iikot sa Barangay Magtanggol at Tabacalera sa munisipalidad ng Pateros, at Tandang Sora at Krus na Ligas sa Quezon City. Sa mga residente ng Mahabang Parang, Angono, Barangay Batingan at Mahabang Parang sa Binangonan, Barangay 765, 767, 775, 790, 791, 796, at 798 sa Lungsod ng Maynila, at Barangay Bagong Ilog sa Pasig lungsod, babalikan muli ng Manila Water.

Sa buwan ng Marso, babalik ang desludging caravan sa parehong barangay sa Maynila, Barangay Bagong Ilog sa Pasig City, Tandang Sora at Krus na Ligas sa Quezon City at bibisita rin sa Barangay UP Campus. Sa mga customer sa Barangay Martirez del 96 at Santo Rosario-Kanluran sa Pateros, Barangays 764, 769, 776, 778, 877, 878, 879, at 880 sa Manila, Barangay Sta. Lucia sa Pasig City, at Barangay San Isidro sa Cainta, Rizal, kasama din sa iskedyul na seserbisyuhan ng kompanya.

Ang pagpapalinis ng mga septic tank tuwing lima hanggang pitong taon ay mahalaga, hindi lamang para sa regular na pagpapanatili ng septic tank, kundi pati na rin para sa pangangalaga ng kapaligiran at ng komunidad

 “From January to September 2022, we have siphoned more than 84,000 septic tanks in our service area. This year, we aim to ramp up our desludging caravan and hit our goal of desludging more than 100,000 septic tanks, which is crucial in ensuring that the collected used water will be properly treated through Manila Water’s septage treatment plants before it is released back to bodies of water. This equates to reduction in public health risk, and water pollution,” ayon kay Dittie Galang, Corporate Communications Department Head ng Manila Water.

“With this, we continue to encourage our customers to avail of these services when scheduled, to not incur added cost to their water bill,” dagdag pa niya.

Kung nais malaman ang tiyak na petsa ng pagbisita ng desludging caravan sa iyong mga barangay, maaaring makipag-ugnayan ang mga customer sa kani-kanilang barangay council, o sa pamamagitan ng pagtawag sa Manila Water Consumer Desk Hotline 1627.