NGAYONG ginawa nang ligal ang same-sex marriage sa Italy, wala naman silang karapatan para iakma rito ang pagkakaroon nila ng anak.

Mayroon namang batas mula sa European Commission para gawing sapilitan o mandatory ang pagiging magulang ng mag-asawang lalaki o kaya’y babae pero tsinugi ito ng Senado ng Italy.

Sinisisi rito ng mga Italyano ang simbahang Katolika sa pagiging kontrabida sa batas.

STEPCHILDREN ADOPTION

Kabilang sa mga ipinaglalaban ng same-sex parents ang gawing tunay silang mga magulang ng gobyerno dahil kasal na sila at dapat na nakalagay ito sa mga pampublikong dokumento.

Sakop sa labang ito ang pagturing sa anak ng isa sa mag-asawang same-sex bilang tunay na anak nilang dalawa sa bisa ng stepchildren adoption.

Halimbawa ang anak ng lalaki sa labas o anak ng babae sa labas.

Gusto ng mga same-sex parents na kilalanin na ang mga bata bilang tunay na anak ng mga mag-asawang dalawang lalaki o dalawang babae.

Pero ipinagbabawal ito lalo’t nasa ilalim ng konserbatibong liderato ang gobyernong Italy at naririyan pa ang kontrabida ngang Simbahang Katolika.

ANAK SA SURROGACY

Gayundin na bawal na ituring na tunay na anak ng nasabing mag-asawa ang mga ipinanganganak sa pamamagitan ng surrogacy.

May dalawang klase ang surrogacy na paraan ng pagkakaroon ng anak ng mag-asawang babae at lalaki na hindi magkaanak kahit magsasayaw pa sila sa isang simbahan sa Obando, Bulacan.

Ang isa, pinagsasama  muna ang sperm o katas ng lalaki at egg cell o itlog ng babae bago itanim ito sa ibang babae na siyang magluluwal ng sanggol.

Kaya naman hindi kadugo ng babae ang iluluwal niyang sanggol at kukunin na ito ng mag-asawa pagkapanganak nito.

‘Yung isa naman, itatanim sa pamamagitan ng artificial insemination ang sperm ng lalaki sa matres ng babae sa mga araw na hinog ang mga egg cell nito at doon na mabubuo ang baby.

Ibig sabihin, kadugo ng babaeng mabubuntis ang baby na kalahati ng katawan at pagkatao nito ang nagmula sa ibang lalaki at iuuwi rin ng lalaki ang sanggol.

Bawal din ang surrogacy, made in Italy man o made in the Pilipins.

DATING GAWI AT SA PINAS

Sa Milan, pinapayagan namang irehistro ang mga bata pero isa lang sa mag-asawang same-sex ang ilalagay — ang tunay na may anak sa kanilang mag-asawa — at inilalagay ito sa dokumentong may tatak na Parent 1 o Parent 2.

Kaiba ang dokumentong awtomatik na naglalaman ng espasyo para sa ngalan ng mga magulang na lalaki at babae.

Pero pinatigil na rin ito ng gobyerno ni Prime Minister Giorgia Meloni at pinag-iisipan pa kung ano ang gagawin.

Hindi kaya mangyayari ang gulong ito sa Pinas kapag inaprubahan ng gobyerno ang panukalang batas na same-sex marriage?

MAKARAANG bumagsak ang Silicon Valley Bank, Signature Bank ay SIlvergate Bank, pawang nasa United States, isang malaking bangko naman sa Switzerland ang naghihingalo at maaaring babagsak din sa mga darating na araw.

Ayon sa UBS na higanteng bangko, kasalukuyang may negosasyon ito para bilhin ang karibal nitong Credit Suisse.

Subalit kailangan umanong balikatin ng pamahalaang Switzerland ang halagang $6 bilyon para sa bilihan.

Nauna rito, hindi nakayanan ng Credit Suisse na bumangon sa pagkakalugmok sa kabila ng $54 bilyong pautang dito ng Swiss National Bank.

Unang tumagilid ito sa umano’y sunod-sunod na iskandalo, kasama na ang money laundering o paglalabas sa bansa ng malalaking halaga ng salapi.

Kaya naman, nitong nakaraaang taon lamang, nalugi ito ng $7.9B at ipinahayag nitong mahihirapan itong bumangaon hanggang sa 2024.

Kumita naman ang UBS ng $7.6B nitong 2022.

Sa US, binalikat kaagad ng pamahalaan ang claim ng mga depositor sa mga bangkong Silicon Valley Bank at Signature Bank at hindi nawalan ang mga depositor.

Habang nagaganap ang mga ito, mga brad, may mga kinakabahan sa Pinas at nagtatanong: Paano ang deposito ko kung may ganitong pangyayari sa bangko ko?

Napakalehitimo ang tanong at isang tanong nga diyan ay kung ang bangko mo, eh, may idineposito sa Credit Suisse.

Kapag bumagsak ang Credit Suisse, tiyak madadamay ang bangko mo at maaaring babagsak o manghina ito at manganganib ang iyong deposito.

Sa ngayon, maksimum o pinakamalaking halaga ang P500,000 na mababawi mo sa bangko kahit nakapagdeposito ka pa ng P1 milyon, P100 milyon o P1 bilyon.

May posibilidad ba na madamay ang mga bangko sa Pilipinas na lokal o/at pag-aari ng mga dayuhan?

Ano na nga pala ang mga paghahanda ng pamahalaan at ng Bangko Sentral ng Pilipinas sa harap ng mga pagbagsak ng nasabing mga bangko?

“THERE is no such thing as absolute power in a longest possible time.”

Ang lahat na ibinigay na poder ng taumbayan sa mga iniluklok na lider sa anomang bansa sa sanlibutan ay nagtatapos din bunsod nang higit na makapangyarihan ang sambayanang bomoto at nagkaisang ilagay ang napupusuan nilang opisyal.

Kung ang batas ng ‘Pinas ang pagbabatayan, hanggang tatlong termino na may tatlong taong kaakibat na magsisilbi ang sinomang halal na lokal na opisyal.

Sabi nga ng mapanuring mga indibidwal, maiksi ang tatlong termino sa tunay na mga lider ng bansang sadyang walang iniisip kundi ang totoong mapagsilbihan ang kanilang nasasakupan subalit mahaba naman ang isang taon sa mga opisyal na ginagamit ang poder para sa pansariling interes at apihin ang walang kalaban-laban na mga kababayan.

Kagaya nitong nangyaring pagpaslang kay Negros Oriental Governor Ruel Degamo kung saan mismong ang asawa nitong si Pamplona Mayor Janice Degamo ang naniniwala umanong may kinalaman si 3rd District Rep. Arnolfo Teves Jr. sa naganap na masaker.

Bagaman ang korte ang maghuhusga kung totoo nga na sabit ang kongresista sa nangyaring pagpaslang sa gobernador subalit nakaumang ngayon ang mga kanyon ng gobyerno kay Teves kabilang na ang pagpapaimbestiga sa kanya kaugnay sa mga nauna pang patayan na itinuturo rin umanong may kinalaman ito.

Ilan na bang mga kilala at poderosong pulitiko ang tumiklop bunsod sa ginamit ang kapangyarihan sa hindi tamang pamamaraan bagkus ay naging sangkalan para apihin ang nasasakupan nila?

Naging halimbawa d’yan ang pamilya Ampatuan na utak umano sa tinaguriang Maguindanano massacre na ikinamatay ng sangkaterbang kapwa mamamahayag na bumandera sa sanlibutan.

Ibig sabihin, hindi kailanman magiging bulag at bingi ang sambayanan sa pang-aabuso ng mga itinuturing na lider ng gobyernong may hangganan ang lahat ng kapangyarihan kahit pa lumalangoy na sa poder.

Ang sambayanan ang nagluklok sa mga politiko kaya naman rin ang higit na may awtoridad na tabasin ito mula sa mga posisyon.

HINDI ko palalampasin ang buwan ng Marso na hindi itinatampok sa kolum na ito ang pag-gunita ng International Women’s Day at ng Women’s Month. Sa buong mundo, dinaraos ang IWD sa ika-8 ng Marso.

Dito sa Pilipinas, mas bongga ang mga selebrasyon dahil isang buwan na kulay lilak ang halos lahat ng opisinang gobyerno para kilalanin ang natatanging ambag ng mga kababaihan.

Alam n’yo ba na napakalaki ang ginampan papel ng mga kababaihan noon para lang makaboto sila? At ‘yun ngang tigil-trabaho ng libo-libong kababaihan na nagtatrabaho sa textile industry sa Russia noong 1917, na kinikilala bilang isa sa mitsa ng Russian Revolution.

Hindi naman nagpahuli ang mga babaeng bayani nating sina Melchora Aquino, Gabriela Silang at Gregoria de Jesus. Dagdagan ko pa ng isa, si Aguada Kahabagan, ang kaisa-isang babae sa listahan ng mga heneral noong Philippine Revolution. Sobrang giting n’ya, ang tawag nga sa kanya ay “Tagalog Joan of Arc”, sa pangunguna n’ya sa mga labanan sa San Pablo, Laguna.

Ngayong 2023, ang tema ng selebrasyon ng Women’s Month natin ay Women Empowerment tungo sa pagkakapantay ng mga kasarian (gender equality) at isang lipunan na kabilang ang lahat (inclusive society).

Ang ganda ng laro ng mga salita sa tema. Ayon sa Philippine Commission of Women o PCW, ang WE ay pwedeng Women Empowerment o kaya ay Women and Everyone. O ang payak na kahulugan ng ordinaryng salitang “we” sa tagalog ay “tayo”. Tayong lahat, babae o lalaki, kahit ang LGBTQA communities ay kasama sa “we”.

Lampas kalahati ng populasyon natin ay mga babae. Bukod sa ambag nila sa ekonomya dahil sa kanilang trabaho, ang kababaihan ang nagtataguyod ng tahanan, ang nangangalaga sa kalusugan ng pamilya at maaasahang sandalan ng bawat anak.

Bagaman kayang gawin ng isang babae ang lahat ng gawain ng lalaki, hindi away ng mga kasarian ang itinutulak natin.

Magiging buo lang ang pamilya, ang komunidad at ang bansa, kung ang ambag ng mga kababaihan ay kinikilala at pinahahalagahan.

Noong 2020, nanalasa ang COVID-19 at grabeng napuruhan ang mga negosyo; nang mga panahong iyon, halos bawat negosyo ay pare-pareho ang tinamong perhuwisyo. Walang operasyon, walang kita.

Ganito ang aktuwal na nangyari sa mga distrito ng Ermita at Malate, ang sentro ng aliwan sa Maynila na binansagang Tourist Belt. Nagsara ang mga bars at restaurants, at libu-libo ang nawalan ng trabaho.

‘Yun ang akala natin.

Malaki ang posibilidad na may katotohanan ang mga bulung-bulungan tungkol sa nightclubs na hindi lamang ang alak, karaoke at kakuwentuhan ang iniaalok kundi maging sex sa kanilang VIP rooms. Ang ilan sa mga ito, malaki ang kinita sa ‘back offices’ ng mga lehitimong establisimyento na nanatiling bukas para magsilbing “red carpet” entrance patungo kung nasaan ang tunay na aksiyon – ang second floor!

Pero ibang kuwento na iyon para sa ibang araw.

Agresibong comeback

Ngayong binawi na ng gobyerno ang mga paghihigpit ng pandemya sa mga videoke bars at nightclubs, ito ang palihim na nangyayari, ayon sa mga espiya ng Firing Line.

Sa isang panig, nariyan ang guest relations officers na balik-trabaho na makalipas ang dalawang taon ng sapilitang pamamahinga, walang pera at desperado. Sa kabilang banda, nariyan ang mapeperang kliyente na pawang dayuhan, karamihan ay Chinese, Koreans, at Japanese. Nagbalik na nga ang mga KTV bar, sa paraang mas agresibo, mas malakas ang loob kumpara sa operasyon ng mga ito bago ang pandemya, para marahil makabawi sa matinding pagkalugi!

Para masigurong bawing-bawi ang lahat, nagsisikap ang GROs na mabigyan ang mga kliyente ng “happy ending” para makumbinse ang mga itong magpabalik-balik. Hindi siyempre mauutakan ang mga parukyano, kukuha ng VIP rooms at mag-o-order ng bote-bote ng tequila bilang ladies’ drink upang sa huli, wala nang pangingimi ang GROs na itodo ang kanilang serbisyo, na mula sa pagiging entertainers ay nagiging prostitutes.

Nakalulungkot ang kuwentong ito para sa mga nagtatrabaho sa bar, pero ang mga may-ari ng bar at kanilang managers, kundi man kinukunsinti ang ganitong gawain ay nagbubulag-bulagan na lang.

Inaalok pa nga nila ang tourist guides at bira maki (salitang Japanese sa mga taong namimigay ng leaflets para sa impormasyon) ng 10-porsiyentong komisyon para maghakot ng mas maraming matatakaw sa laman, este, kliyente.

Sabi ng aking mga espiya na ang ilan sa bars na ito ay matatagpuan sa ikalawang palapag ng mga gusali sa J. Bocobo Street sa Malate. Ang ilan pa, naroroon naman daw sa A. Mabini Street.

Dapat na silipin ng pulisya at ng National Bureau of Investigation ang mga mapang-abusong gawaing ito laban sa kababaihan at tuluyan nang ipahinto ang kalokohang ito.

Sakit ng ulo ng barangay

Dalawang magkatapatang gay bars sa Remedios Street, Malate, ang sakit ng ulo ngayon ng mga opisyal ng isang Barangay.

Bukod sa maiingay nilang loudspeakers, nagdudulot din sila ng pagsisikip ng trapiko dahil sa sangkatutak na mga motorsiklong naghambalang sa lugar.

Ito lang marahil ang lugar sa metropolis na may pagsisikip ng trapiko mula hatinggabi hanggang madaling araw dahil ang mga bar na ito ay bukas simula 10:00 ng gabi hanggang 8:00ng umaga.

Bukod pa diyan, sobrang dumi pa ng lugar dahil sa sangkatutak na polystyrene coffee cups, plastic bottles, soda cans, at upos ng sigarilyo na tinatangay ng hangin sa kalsada galing sa harap ng mga nabanggit na establisimyento.

Panahon nang kumilos ang Manila City Hall at tulungan ang mga opisyal ng barangay sa pagresolba sa problemang ito.

* * *

SHORT BURSTS. Para sa mga komento o reaksiyon, mag-email sa [email protected] o mag-tweet sa @Side_View.