DFA Aseana dinumog ng OFWs; POEA rereskyu

DFA Aseana dinumog ng OFWs; POEA rereskyu

March 24, 2022 @ 8:14 AM 3 months ago


MANILA, Philippines – Makikipag-ugnayan ang Philippine Overseas Employment Administration sa Department of Foreign Affairs (DFA) upang mapabilis ang pagproseso ng mga overseas Filipino workers (OFWS) sa gitna ng mga ulat ng mahabang pila sa labas ng DFA office sa Consular Affairs sa Aseana Business Park.

Ginawa ni POEA Administrator Bernard Olalia ang pahayag matapos maiulat na mahabang pumila at naghintay ang karamihan na galing pa ng probinsya at hindi pa rin umabot sa cutoff.

Ilang Pilipino ang nagtiis sa init sa araw, at natutulog sa mga karton na inilatag sa bangketa sa gabi, para lamang mapanatili nila ang kanilang puwesto sa pila.

Ang haba ng pila ay umabot pa mula sa opisina ng DFA sa Macapagal Boulevard hanggang Roxas Boulevard.

“Alam niyo po nung nalaman po namin yan tayo po ay kinakailangan makipag-usap sa ating iba’t ibang ahensya na siya pong in charge sa mga OFWs at kinakailangan pong i-represent din po natin sila with the DFA in order to address this particular important issue,” sabi ni Olalia sa isang panayam.

Ipinaliwanag din niya na ang mga dokumento ng apostille ay mahalaga upang makuha nila ang kanilang Overseas Employment Certificate (OEC) habang hinahangad ng mga OFW na maiproseso ang kanilang mga dokumento para sa aplikasyon ng mga trabaho sa ibang bansa.

“Alam niyo po iyang apostille documentation na dumadaan po sa DFA, isa po yan sa mga documentary requirements ng ating mga OFWs para po sana makakuha sila ng OEC,” sabi pa ni Olalia said.

Ayon kay Olalia, napakaimportante ito kaya naman sila ay makikipag-ugnayan at makikipagtulongan para matugunan ang isyu kung papaano mapapabilis yung pagkuha ng apostille documents po sa DFA.

Inamin naman ni DFA Acting Assistant Secretary Christian de Jesus na hindi nila kaagad ma-accommodate ang lahat, pero tuloy-tuloy umano ang kanilang pagpoproseso ng mga walk-in applicants.

Naglabas ang DFA ng advisory pasado alas-7 ng umaga na nag-aanunsyo na pansamantalang sinuspinde ang mga serbisyo ng apostille kahapon, Marso 23, matapos nitong maabot ang bilang ng mga aplikasyon na maaari nitong iproseso sa loob ng araw. Jocelyn Tabangcura-Domenden