MANILA, Philippines- Personal na tinulungan ni Senator Christopher “Bong” Go ang mga pamilyang nasunugan mula sa Barangay Apolonio Samson at Roxas sa Quezon City noong Miyerkules.

Kasabay nito, hinimok ni Sen. Go ang mga residente sa dalawang barangay na gamitin ang mga serbisyong inaalok ng Malasakit Centers, kung sakaling magkaroon ng emergency o alalahaning nauugnay sa medikal.

Sa kanyang mensahe, nag-alok din si Go, tagapangulo ng Senate committee on health and demography, ng karagdagang tulong sa mga nangangailangan ng medical healthcare at hinikayat silang bisitahin ang alinman sa 11 Malasakit Centers sa Quezon City.

Sa kasalukuyan, may 154 Malasakit Centers na sa buong bansa.

“Ito ay isang one-stop shop. Nasa loob na ng ospital ‘yung apat na ahensya ng gobyerno – PhilHealth, Philippine Charity Sweepstakes Office, Department of Health, at Department of Social Welfare and Development. Ang Malasakit Center po, para po ‘yan sa mga poor and indigent patients, para po ‘yan sa Pilipino,” ayon kay Go.

Si Go ang principal author at sponsor ng Malasakit Centers Act of 2019.

Sa Quezon City, ang mga pasyente ay maaaring humingi ng serbisyo ng Malasakit Centers sa Lung Center of the Philippines, Novaliches District Hospital, Philippine Heart Center, Philippine Children’s Medical Center, National Kidney and Transplant Institute, East Avenue Medical Center, Veterans Memorial Medical Center, Philippine Orthopedic Center, National Children’s Hospital, Philippine National Police General Hospital, at Quirino Memorial Medical Center

Sa nasabing pagbisita, namahagi si Go at ang kanyang team ng mga relief items, kabilang ang mga grocery packs, kamiseta, meryenda at masks sa 600 apektadong pamilya ng Brgy. Apolonio Samson sa Masambong Elementary School at 94 apektadong pamilya sa Brgy. Roxas sa Brgy. Roxas Multi-Purpose Building. Namigay rin sila ng mga bisikleta, cellular phone, sapatos, bag, relo, at bola para sa basketball at volleyball.

Bukod dito, ang mga kinatawan mula sa Department of Social Welfare and Development ay namahagi ng cash assistance sa mga pamilya upang makatulong sa kanilang pagrekober.

Nagsagawa naman ng assessment ang isang team mula sa National Housing Authority para matukoy ang mga kwalipikado para sa housing aid.

Sa hangaring ma-institutionalize ang mga programa sa pabahay para sa mga biktima ng sunog at natural na kalamidad, inihain ni Go ang Senate Bill Nos. 192 at 426.

Ang SBN 192, o Rental Housing Subsidy Program, ay naglalayong mabigyan ng sapat at maayos na tirahan ang mga Pilipinong apektado ng mga sakuna sa pamamagitan ng rental subsidies mula sa gobyerno.

Sa kabilang banda, ang SBN 426 o ang National Housing Development, Production and Financing Program ay layong paramihin ang produksyon ng pabahay sa pakikipagtulungan sa stakeholders.

Pinasalamatana ni Go ang mga lokal na opisyal ng Quezon City sa pagbibigay sa mga nasasakupan ng kinakailangang suporta. Tiniyak din niya na laging bukas ang kanyang tanggapan para sa pagtulong.

“Sa mga kababayan ko, nandirito lang po ako. Trabaho naman namin bilang senador ang constituency services, legislation at representation,” ani Go.

“Kung kaya lang po ng aking katawan at panahon, pupuntahan ko po kayo para makatulong sa abot ng aking makakaya, makapagbigay ng solusyon sa inyong mga suliranin at sa panahon ng pagdadalamhati,” anang senador.

Matapos ang mga aktibidad sa Quezon City, tumuloy si Go sa Imus, Cavite para inspeksyunin ang progreso ng Super Health Center doon at magbigay ng katulad na tulong sa mga nasunugan at mga mahihirap. RNT

MANILA, Philippines- Matinding inalmahan ng tatlong senador ang panukalang charter change na isinusulong ni Senador Robin Padilla upang amendahan ang economic provision ng 1987 Constitution dahil hindi kailangan sa kasalukuyang panahon.

Sa magkakahiwalay na pahayag, sinabi nina Senador Nancy Binay, Aquilino “Koko” Pimentel III at Grace Poe na hindi dapat maging prayoridad ng Lehislatura ang pag-aamyenda sa Saligang Batas dahil maraming problemang kinahaharap sa bansa tulad ng inflation, kawalan ng trabaho at korapsiyon.

Tulad ni Poe, sinabi ni Binay na matagal nang natugunan ng Kongreso ang pangunahaing economic liberalization law kung gustong aamendahan ang economic provision sa Saligang Batas.

“If we’re talking about amendments to the economic provisions in the Constitution, we’ve already addressed that in the last Congress with three vital economic liberalization laws that are intended to boost our economy and global competitiveness,” ayon kay Binay.

Kapwa binanggit nina Binay at Poe ang batas pang-ekonomiya na matagal nang nagawa ng Kongreso upang makahabol ang Pilipinas sa pagbabago ng kalakaran sa pandaigdigang merkado.

“Eto ‘yung Public Service Act (PSA), Retail Trade Liberalization Act and the Foreign Investments Act,” anila.

Sinabi pa ni Binay na itong batas ang repormang pang-ekonomiyang ginawa ng Kongreso upang tugunan ang kakakulangang probisyon sa Saligang Batas at sagot sa isyu ng foreign equity limitation sa utilities, power, telecoms, transport at aviation, infra, at iba pang sektor.

“The country is still recovering from the impact of the pandemic, but we’re confident these reforms are sufficient to encourage investors and help revitalize our economy,” giit niya.

Idinagdag pa ni Binay na masyadong divisive ang charter change at kailangan din natin na paghandaan ang posibleng global recession na dapat pagtuunan, hindi ang pagbabago ng Saligang Batas.

“Dapat doon tayo mag-focus sa mga isyu na direktang nakakabit sa sikmura tulad ng presyo ng mga pangunahing bilihin, mga problema sa agrikultura, tutukan natin ang health sector at bigyang pansin yung mga isyu sa marginalized sectors kagaya ng ating mga magsasaka’t mamamalakaya, at talagang mahaba-haba pa ang listahan ng mga problema natin,” aniya.

“Kung priorities lang naman po ang pag-uusapan, ang usapin ng Charter Change eh medyo lihis sa kumakalam na sikmura—’di po kasama ang con-ass sa ulam ng bawat pamilyang Pilipino,” giit pa ng senadora mulang Makati City.

Sinabi naman ni Pimentel na abala ang lahat ng ating mamamayan sa pakikipaglaban sa pang-araw-araw na pamumuhay kaya kahit kailangan ang pagbabago sa Saligang Batas upang mapaunlad ang sistema ng gobyerno, maaari itong makapaghintay habang tinutugunan ang basic daily living problems ng bansa.

“Like: where to get food to feed the family, the continued increase in prices (inflation), where to get a job, corruption, the high cost of living and even of dying, and many more basic problems,” ayon kay Pimentel.

“Also, why prioritize the changing of the economic provisions in the Constitution when what needs to be changed are the political provisions?,” dagdag niya.

Iginiit naman ni Poe na naipasa ng 18th Congress ang ilang panukalang batas na tutugon sa economic restrictions sa ilalim ng 1987 Constitution, kaya’t hindi na kailangan pang amendahan ito.

“As for the economic provisions, we’ve passed major legislations that clarified the economic provisions of the Constitution,” aniya sa text messages.

“The Public Service Act [and] Trade Liberalization Act, are both meant to encourage more investments, employment and economic growth. There’s no need at the moment for a Con-Ass, unless the proponents are pushing for another agenda,” giit niya.

Nitong Miyerkoles, inihain ni padilla ang Resolution of Both Houses No. 3 na naglalayong amendahan ang ilang economic provision sa 1987 Constitution sa pamamagitan ng Constituent Assembly.

“These economic provisions are perceived to be barriers to trade and investment responsible for the continuous decline of foreign direct investments,” ayon kay Padilla sa resolution.

Aniya, kahit may inihahandog na tax holidays at iba pang fiscal incentives, nahuhuli pa rin ang Pilipinas sa ibang bansa sa ASEAN sa foreign direct investment registry dahil sa kumplikadong regulasyon sa pamumuhunan na nagsimula sa paghihigpit ng Saligang Batas. Ernie Reyes

MANILA, Philippines- Patuloy ang pagbagal ng paglago Philippine manufacturing noong December 2022 sa kalahating full-year growth rate kumpara noong nakaraang taon, batay sa government data na ipinalabas nitong Huwebes.

Iniulat ng Philippine Statistics Authority (PSA) ang volume of production index (VoPI) growth na 4.8% noong, mas mabagal kumpara sa 5.9% noong Nobyembre at 19.2% noong Disyembre 2021.

Iniugnay ng PSA ang deceleration sa mas mabagal na annual increments sa manufacture ng transport equipment, computer, electronic at optical products at basic metals.

Naiulat din ang pagbagal sa annual growth rates ng indices ng walong industry divisions, habang walo pang industry divisions ang nakapagtala ng mas mataas na annual growth rates.

Kabilang sa mga nakapag-ulat ng expansions ang fabricated metal products maliban sa machinery and equipment, na nakapagtala ng pinakamataas na annual growth rate na 52.9% noong Disyembre 2022.

Lumago ang value of production index (VaPI) ng 10.1%, na mas mabagal din sa 12.5% noong Nobyembre at sa 19.6% na naitala sa parehong buwan noong 2021.

“The slower year-on-year growth… was predominantly brought about by the slower annual increase in the index of manufacture of transport equipment industry division,” anang PSA.

Lumago naman ang manufacture ng transport equipment ng 3.2%, mas mabagal sa 20.5% noong Nobyembre, habang lumago ang manufacture ng computer, electronic, at optical products ng 24.1%, mas mabagal sa 32.3% noong nakaraang buwan.

Ang average capacity utilization rate para sa manufacturing sector sa nasabing buwan ay 71.6%, mas mababa sa 72.6% sa nakalipas na buwan.

Halos 24.3% ng mga establisimiyento ang nag-operate sa full capacity o sa pagitan ng 90% hanggang 100%; halos 40.7% ang nag-operate sa 70% hanggang 89%; at 35.0% ang nag-operate sa mas mababa sa 70% na kapasidad. RNT/SA

MANILA, Philippines- Sinabi ng Philippine Coast Guard (PCG) na kahina-hinala umano “claims” ng distressed Chinese vessel, na tinulungan  sa Eastern Samar noong Enero at nanatiling nakadaong sa Tacloban City.

Ayon kay Commodore Jay Tarriela, PCG’s deputy chief ng coast guard staff for human resource management, ang MV Kai Da 899 ay bigong makapagpakita ng mga kaugnay na dokumento para sa mga operasyon nito.

“That’s why for the Philippine Coast Guard it’s suspicious that these statutory documents to prove the registry and ownership of the vessel is not present on board the vessel,” sabi ni Tarriela.

Maging ang mga crew ng barko ay wala ring sapat at valid identification. Kahina-hinala rin ang ruta ng barko.

Ayon kay Tarriela, hindi pinapayagang makababa ng barko ang mga crew dahil wala silang immigration documents na magpapatunay na sila ay Chinese nationals.

Humingi ng tulong ang PCG sa Bureau of Immigration para sa tamang disposisyon ng “undocumented” seafarers. Hiniling din nito sa Bureau of Customs ang kustodiya ng “stateless” vessel.

Ang nasabing barko ay napag-alaman na hindi na ligtas para sa paglalayag at nabigong matugunan ang maritime safety standards batay sa nakuha ng PCG na kopya ng certificate of deletion ng ship registration na  inisyu ng Chinese government.

Ang barko ay narescue sa karagdagang sakop ng  Suluan Island in Guiuan, Eastern Samar noong  Jan. 26 makaraang makaranas ng problema ang makina nito. Jocelyn Tabangcura-Domenden

MANILA, Philippines- Itinutulak ni Basilan Rep. Mujiv Hataman sa inihaing House Bill 7117 ang pagkakaroon ng prayer room para sa mga Muslim sa mga gusali ng gobyerno at maging sa mga pribadong establisimyento.

Ayon kay Hataman, palaki na ang populasyon ng mga Muslim na sa ngayon ay nasa anim hanggang 12 milyon, na isa umano sa mga dahilan kung bakit nito itinutulak ang pagbibigay ng prayer room sa mga Muslim sa mga lugar na ginagamit ng publiko.

“We seek to require the establishment of at least one Muslim prayer room in every government facility, airport and transport terminal, hospital and military camp, as well as other privately owned establishments,” nakasaad sa panukala.

Inamin ni Hataman na karaniwang hirap ang mga Muslim sa paghahanap ng kanilang worship place sa mga pampublikong lugar lalo at kinakailangan ng mga ito na magdasal ng limang beses sa loob ng isang araw.

“Ang pagdarasal ay mahalaga sa lahat ng relihiyon. Sa aming mga Muslim, ginagawa namin ito limang beses sa isang araw, nasaan man kami abutan. Kaya mahalaga na laging may lugar kung saan pwedeng magdasal ang mga kapatid nating Muslim,” paliwanag ni Hataman.

Aniya, bagama’t may ilang lugar na mayroon nang ganitong espasyo para sa mga Muslim ay kanila pa rin na isinusulong na madagdagan ito.

“Imbes na limitahan natin ang mga lugar na maaaring puntahan ng ating kapatid na Muslim, gawin nating mas accessible ang pagdarasal bilang bahagi ng kalayaan sa pagpapahayag ng aming pananampalataya,” pagtatapos pa nito. Gail Mendoza