Diskriminasyon vs LGBT community bawal na sa Cebu City

Diskriminasyon vs LGBT community bawal na sa Cebu City

August 19, 2022 @ 6:48 PM 1 month ago


MANILA, Philippines- Papatawan na ng mga parusa ang magsasagawa ng diskriminasyon laban sa lesbian, gay, bisexual, and transgender (LGBT) community sa Cebu City. 

Pinirmahan ni Cebu City Mayor Michael Rama ang Ordinance No. 2660 kung saan nakasaad ang penalties para sa mga mamamahiya sa mga miyembro ng LGBT community sa publiko, o mananakit sa kanila dahil sa kanilang sexual orientation. 

Papatawan din ng parusa ang harassment at verbal o physical threats laban sa LGBT members sa ilalim ng ordinansa. May karampatang parusa rin ang mga biro at “pranks” na may kaugnayan sa gender identity. 

Mahaharap ang offenders sa 3 hanggang 6 buwang pagkakakulong at pagmumultahin ng P3,000 hanggang P5,000, depende sa violation at sa diskresyon ng korte.

Isinusulong din ng ordinansa ang paglikha ng Sexual Orientation, Gender Identity, Expression and Sex Characteristics Pride Empowerment Council (SPEC), na mangangasiwa sa pagbabantay sa karapatan ng LGBT community.

Layunin din ng SPEC na lumikha ng mga programa at inisyatiba na alinsunod sa gender at development plan ng lungsod.

“I look forward to this because they deserved to be treated right,” pahayag ni Rama hinggil sa LGBT members. 

Si Sangguniang Kabataan ex-officio Councilor Jessica Resch ang may-akda ng ordinansa. RNT/SA