MANILA, Philippines- Tinatayang pumalo na sa 35,463 ang kabahayan na winasak ng magnitude 7 earthquake na yumanig sa Abra at kalapit- Northern Luzon provinces noong Hulyo 27, 2022.

Sa pinakabagong situation report na ipinalabas ng National Disaster Risk Reduction and Management Council (NDRRMC) sinabi nito na 34,842 “partially damaged”  at  621 naman ang “totally damaged”  na kabahayan.

Karamihan sa mga  nawasak na kabahayan ay sa Cordillera Administrative Region (CAR) , 26,856; sinundan ng Ilocos Region na may 8,605 at tig- isa naman ang nawasak na bahay sa National Capital Region (NCR) at Cagayan Valley.

Ang halaga naman ng nasira sa agricultural infrastructure, equipment at facilities ay umabot na sa P33.22 milyong piso sa CAR, habang ang napinsala naman sa irrigation systems ay umabot na sa P22.7 milyong piso sa CAR at Ilocos.

Ang pinsala naman sa infrastructure sa Ilocos Region, Cagayan Valley, CAR at NCR ay umabot naman sa P1.59 bilyong piso.

Sa kabilang dako, 11 naman ang naitalang namatay habang 614 naman ang nasugatan.

Nanguna naman ang CAR sa listahan ng mga may nasaktang indibiduwal na may 578,sinundan ito ng Ilocos na may 34 at Cagayan Valley, na may dalawang bilang.

Samantala, ang mga pamilyang apektado ng malakas na lindol ay 140,101,na may katumbas na  512,936 katao na nakatira naman sa 1,334 barangay sa Ilocos Region, Cagayan Valley at CAR.

Mayroon lamang 298 pamilya o 968 katao ang nananatili sa 11 evacuation centers habang ang mayorya ng mga evacuees ay nagsimula nang bumalik sa kanilang mga tahanan. Kris Jose

MANILA, Philippines – Hindi hadlang ang nakuhang gintong medalya kay Filipino Olympian Hidilyn Diaz dahil determinado itong gumawa ng higit pa para sa Pilipinas, dalawang taon bago ang 2024 Paris Olympics.

Noong Linggo nag-post si Diaz sa Instagram ng larawan ng mga chalked hands na “isang paalala na sa kabila ng lahat ng nagawa ko, ang weightlifting ay nagtulak sa akin na ipagpatuloy ang pagsisikap ko para sa bayan natin.”

Sinabi ni Diaz na isinasantabi niya ang kanyang honeymoon kasama ang asawa at coach na si Julius Naranjo habang nananatili ang 730 araw para sa Paris Olympics.

“Kahit mahirap, even though I do not need to prove anything, gusto ko pa rin gawin ang lahat [nang] makakaya ko para sa weightlifting at sa Pilipinas,” wika nito.

Hinikayat din ni Diaz ang bansa na samahan siya sa kanyang “#LastLift.”

“I am manifesting this dahil ito ang gusto ko at weightlifting ang nagpapasaya sakin. Samahan ninyo ako sa aking desisyon to go for my #LastLift. #TeamHD will be with me throughout the whole process pero kailangan ko ang suporta at dasal ninyo lahat,” dagdag niya.

Naalala rin ni Diaz sa larawan ang kanyang silver medal finish sa Rio Olympics na nangyari eksaktong anim na taon na ang nakararaan.

“Natatandaan ko pa kung gaano kataka-taka ang araw na iyon, kung paano ako ginulat ng Diyos ng isang pilak na medalya noong ako ay naglalayon pa lamang ng isang Tanso, ito ay isa sa mga ipinagmamalaking sandali ng aking buhay.”RICO NAVARRO

MANILA, Philippines- Inanunsyo ng Manila Electric Co. (Meralco) onitong Lunes ang tapyas-singil sa kuryente para sa buwan ng Agosto, sa pagpapatuloy ng implementasyon ng kompanya ng refund na iniatas ng Energy Regulatory Commission (ERC).

Sinabi ng Meralco na ang overall rate sa tipikal na tahanan ay binawasan ng 20.87 centavos per kilowatt-hour ngayong buwan hanggang P9.5458/kWh mula sa P9.7545/kWh noong nakaraang buwan.

Nangangahulugan ito na mababawasan ng halos P42 ang kabuuang bill ng residential customer na kumokonsumo ng 200 kWh.

Ipinag-utos ng ERC nitong nakaraang buwan sa Meralco na ibalik ang halos P21.8 bilyon sa loob ng 12 buwan, o hanggang mabayaran ito ng buo. Nangangahulugan ito ng 86.56 centavos per kilowatt-hour para sa bill noong nakaraang buwan.

“The implementation of distribution-related refunds totaling P48.3 billion as ordered by the ERC continues to temper customers’ monthly bills. This is equivalent to a total refund rate of P1.8009 per kWh for residential customers,” pahayag ng Meralco.

Tinapyasan ang generation charge para sa Agosto ng 19.44 centavos hanggang P6.5812/kWh mula sa P6.7756/kWh sa nakalipas na buwan, kasunod ng mas mababang charges mula sa power supply agreements (PSAs).

“With the ongoing rainy season, Meralco advises its customers to practice safety measures and prepare for floods or typhoons,” ayon sa power distributor.

“Customers are urged to charge mobile phones, flashlights, and other important gadgets or rechargeable appliances,” dagdag nito. RNT/SA

MANILA, Philippines- Naghanda ang mga tauhan ng Brgy. Roxas sa Quezon City ng rescue equipment nitong Lunes, para sa posibleng pagbaha sa low level areas sa typhoon season. Danny Querubin

MANILA, Philippines- Naghain ng isang panukalang batas si Senador Robin Padilla na magtayo ng sangay ng New Bilibid Prison sa bawat rehiyon o regionalization nito at iba pang penal colonies sa bung bansa.

Sa pahayag, sinabi ni Padilla na layunin ng panukala na tugunan ang problema sa pagsisiksikan ng mga presyo at magkaroon ng pagkakataon ang kanilang pamilya na makadalaw sa kani-kanilang piitan.

Nakatakda sa Senate Bill 235, iminungkahi ni Padilla ang pagtayo ng penitentiary system sa 10 rehiyon partikular sa Regions I, II, III, V, VI, VIII, IX, X, XII at XIII.

“Ultimately, this bill seeks to create additional regional penal institutions not only to address the severe congestion in the country’s jails and prisons, but to also ensure the welfare of persons serving final judgment as they await their reintegration to society,” aniya.

“While (congestion) remains a pressing issue, this representation wants to focus more on the impact of far incarceration of persons serving final judgment from their families,” dagdag ng mambabatas.

Ayon kay Padilla, pito lang ang penitentiary institutions sa bansa sa kasalukuyan – ang New Bilibid Prison sa Muntinlupa City; Correctional Institution for Women sa Mandaluyong City; Iwahig Penal Colony sa Puerto Princesa City, Palawan; San Ramon Prison and Penal Farm sa Zamboanga City; Sablayan Prison and Penal Farm sa Occidental Mindoro; Leyte Regional Prison; at Davao Prison and Penal Farm.

Dahil iilan lang ang penitentiary institutions sa bansa, nahihirapan ang pamilya ng mga bilanggo na bumisita dahil kailangan nilang gumastos para sa pagbiyahe.

“Recognizing therefore the paramount role of the family in providing emotional, moral and psychosocial support to every person serving final judgment, this measure is being proposed to widen the opportunities of families and other support groups to pay a visit to their loved ones inside the penitentiaries,” ani Padilla.

Sa ilalim ng panukalang batas, ang lahat na itatayong penal farm ay may “standard and uniform design” para sa kulungan at pati reformation at administrative facilities.

Inaatasan ang Bureau of Corrections na lumikha ng infrastructure plan, i-coordinate ang pagtayo ng mga regional penitentiaries, at ipatupad ang decentralization at transfer ng mga bilanggo sa mga regional penal farms. Ernie Reyes