Fixed parking fees sa ilang establisimiyento, itinutulak sa Senado

Fixed parking fees sa ilang establisimiyento, itinutulak sa Senado

November 29, 2022 @ 2:38 PM 2 months ago


MANILA, Philippines- Sakaling makapasa ang isang panukala sa Senado, gagawin nang P30 ang parking fees ng anumang uri ng sasakyan at P10 sa motorsiklo sa lahat ng mall, restoran, hotel, ospital, paaralan at alinmang designated parking area.

Base sa panukalang Senate Bill N. 1463, na inihain ni Senador Bong Revilla Jr., itatakda ang fix parking rates sa lahat ng lugar.

“Ilang taon nang nakabinbin sa Kongreso ang panukalang batas na i-regulate ang bayad sa parking spaces katulad ng sa mga mall, mga kainan, at ibang pang lugar. Sa totoo lang, kung tutuusin, matagal na dapat naisabatas ito,” ayon kay Revilla sa pahayag.

“Kaya ngayon ay talagang itutulak natin ang pagpasa nito sa Kongreso lalo na’t malaking kabawasan ito sa gastusin ng ordinaryong mamamayan,” aniya pa.

Sinabi ni Revilla na nakasalalay sa parking area owners ang halaga ng parking fees dahil nananatiling unregulated ang parking fee.

Sa ilalim ng panukala, lahat ng klase ng sasakyan ay sisiniglin ng pinakamababang P30 sa unang tatlong oras at dagdag na P5 sa susunod na oras.

Itatakda naman sa halagang P10 ang bayad sa parking fee ng motorsiklo sa unang tatlong oras at P2 kada susunod na oras.

Kapag overnight parking naman, magkakaroon ng P100 flat rate sa lahat ng uri ng sasakyan at P50 sa motorsiklo.

Layunin ng panukala na magtakda ng standard rates sa mga sumusunod:

  • P100 flat rate for valet service, in addition to the regular parking fee;

  • P100 in addition to parking fees for lost or damaged parking ticket; and

  • P200 in addition to parking fees for lost or damaged parking card.

Inaatasan naman ang may-ari ng parking space na magbigay ng 15 minuto grace period sa mga dumadaan na customer habang libre naman ang singil sa sinumang gumastos ng P500 sa naturang establisiyemento sa loob ng tatlong oras.

“While the state respects the role of the private sector in the national economy, and encourages the robust application of the law of supply and demand, the necessity to regulate the rates of the parking fees cannot be disregarded,” the ani ng senador sa kanyang explanatory note ng panukala. Ernie Reyes