JAPAN – Patay ang walo katao kabilang ang anim na Chinese national sa lumubog na barko sa dagat na sakop ng Japan.

Ito ang ibinahagi ng isang Chinese diplomat at Japanese coast guard nitong Huwebes, Enero 26.

Sa impormasyon, nagpadala ng distress signal ang Jin Tian sakay ang mga crew mula China at Myanmar nitong Martes ng gabi sa lokasyon nito na 110 kilometro kanluran ng Danjo Island, southwestern Japan.

Gumamit naman ng satellite phone ang kapitan ng barko upang sabihin sa South Korean coast guard na aalis na ito at ang kanyang mga crew dahil lumulubog na ang sinasakyan ng mga ito.

Nakibahagi naman ang iba’t ibang barko at eroplano ng Japan coast guard para sa paghahanap sa mga ito, na kalaunan ay nakita ang 13 crew members.

Tumulong din ang tatlong pribadong barko sa lugar para sagipin ang lima pang stranded crew members.

Sinabi naman ng China consul general sa Fukuoka na si Lu Guijun, na sa 13 crew members na natagpuan, walo sa mga ito ang kumpirmadong nasawi.

“Five of them — including four Chinese crew members — are not in life-threatening conditions,” dagdag ni Guijun.

“We express our deepest condolences to the unfortunate victims.”

Kinumpirma rin ng Japanese coast guard na kasama ng 6 na Chinese crew member na nasawi, dalawa naman ang mula sa Myanmar.

Mayroon pang 9 katao ang patuloy na pinaghahanap, apat mula sa China at lima mula sa Myanmar.

Nagpaabot naman ng pakikiramay ang mga opisyal mula sa local Chinese mission sa pamamagitan ng pagdadala ng bulaklak.

Binisita rin ng mga ito ang mga survivors na sinabing tutulungan sa pamamagitan ng pagbibigay ng kasuotan, pagkain at inumin.

Ang 6,651-ton Jin Tian ay nakarehistro sa Hong Kong.

Matatandaan na noong 2020, isang cargo ship din na may sakay na 43 crew at 6,000 baka ang lumubog sa dagat na sakop ng southwestern Japan dahil naman sa bagyo. RNT/JGC

MANILA, Philippines – Wala nang inaasahang bagyo ang papasok sa bansa hanggang sa pagtatapos ng Enero.

Ito ang ibinahagi ng Philippine Atmospheric, Geophysical and Astronomical Services Administration (Pagasa) nitong Biyernes, Enero 27.

Sa kabila nito, mayroon pa ring posibilidad na may mabuong low pressure area sa Mindanao.

“Wala tayong inaasahang bagyo hanggang weekend and even until the end of January,” sinabi ni Benison Estareja, weather specialist ng Pagasa.

“Aasahan pa din natin ang mga cloud clusters dito po sa silangan ng Mindanao na posible naman maging low pressure area in the coming days,” dagdag niya.

Bagama’t walang pumasok na bagyo ngayong buwan, naranasan naman ng malaking bahagi ng bansa ang malakas na ulan na nagdulot ng mga malawakang pagbaha at landslide.

Sa katunayan, sa huling ulat ng National Disaster Risk Reduction and Management Council ay umabot na sa 39 ang bilang ng mga nasawi dahil sa malalakas na pag-ulan at baha dulot ng low pressure area, shear line at northeast monsoon o amihan. RNT/JGC

MANILA, Philippines – Makipagtulungan ang Department of Agriculture (DA) sa iba’t ibang stakeholders nito sa industriya upang maabot ang layunin na talagang matulungan ang mga Filipino.

Ito ang paghimok ni Samahang Industriya ng Agrikultura’s (SINAG) chairperson Rosendo So sa panayam ng The Mangahas Interview (TMI) nang tanungin kung ano ang posibleng solusyon ng ahensya sa mga suliranin na nararanasan ng bansa sa sektor ng agrikultura.

“Communicate with our industry. ‘Yung ginagawa ng mga tao sa DA mukhang hindi pareho sa direksyo ng Pangulo, puro importation when the President said na local production,” ani So.

Ayon sa SINAG, ang importasyon ay hindi solusyon para mapalakas ang produksyon ng bansa bagkus ay nakakaapekto pa ito sa mga magsasaka na napipilitang makipagpababaan ng presyo ng kanilang mga produkto.

“Kung makita natin, ang rice ba nung lumaki yung import, dumami ba nagtanim dito sa ating bansa? Nabawasan, di ba?” sinabi pa ni So.

“Hindi yun ang solution talaga, kung importation lang ang solusyon hindi na magpapasok ang ating local industry. Like yung sa baboy for example, yung lowering of tariffs, yung mga malalaking players opt to import nalang kesa mag-finance kesa mag-expand sa local. Yun ang problema natin,” pagpapatuloy.

Dapat rin aniya na magkaroon ng mga opisyal si Pangulong Ferdinand Marcos Jr. na tutulong sa kanyang departamento na mapalakas ang produksyong agrikultural ng bansa.

Matatandaan na sa naging biyahe ni Marcos sa Switzerland para sa World Economic Forum, isinulong nito ang pagpapalakas sa productivity ng agrikultura at pangisdaan sa pamamagitan ng climate-resilient technologies, at produksyon maging sa non-agricultural areas tulad ng urban at vertical farming, kasama ang community gardening.

“The food from the toil of our own hands is the food that will most nourish our bodies,” anang Pangulo. RNT/JGC

MANILA, Philippines – Inalis na ng Pilipinas ang temporary ban sa cured pork meat products mula Italy.

Matatandaan na ipinatupad noong Agosto 2022 ang ban sa produktong ito ng Food and Drug Administration (FDA) dahil sa serye ng mga outbreak sa African swine fever (ASF) sa Europa.

Sa memorandum order na pirmado noong Disyembre 28 ng Department of Agriculture na inilabas naman ng FDA nitong Huwebes, Enero 26 inalis ang ban: “following the minimum standard and parameters to achieve appropriate level of protection and inactivation of ASF virus.”

Dagdag pa, ayon sa Import Risk Assessment ng DA noong Nobyembre 8, nakita na mababa an overall estimated risk ng ASF sa cured meat gaya ng dry-cured hams.

Samantala, hindi naman sakop ng naturang kautusan ang iba pang pork meat products mula Italy.

Kabilang pa sa mga ipinagbawal ng Pilipinas na pag-angkatan ng mga karneng baboy at meat products ay ang Thailand, Zimbabwe, Malaysia, Indonesia, Greece, Myanmar, Serbia ,Slovakia, South Korea, Germany, at Czech Republic. RNT/JGC

CHINA – Dose-dosenang demonstrador ang nakakulong pa rin sa China makaraang makilahok sa serye ng mga kilos-protesta laban sa pamahalaan noong nakaraang taon dahil sa panawagan na itigil na ang matinding paghihigpit kontra COVID-19.

Ayon sa ulat ng Human Rights Watch nitong Huwebes, Enero 26 hindi pa tukoy ang kinaroroonan ng ilan sa mga nakakulong.

Matatandaan na noong Nobyembre ay nagkasa ng malawakang kilos-protesta sa iba’t ibang lungsod sa China para ipanawagan na itigil na ang malupit na zero-COVID restrictions na kalaunan ay inalis din ng pamahalaan.

Sa kabila nito, iniulat na palihim na hinuhuli ng mga awtoridad sa China ang mga sumali sa pagkilos, kabilang dito ang mga estudyante at mga mamamahayag.

Dahil dito ay nanawagan ang Human Rights Watch sa Beijing ng agarang pagpapalaya at pag-alis sa lahat ng mga kasong inilatag laban sa mga lumahok sa ‘white paper’ protests.

“Young people in China are paying a heavy price for daring to speak out for freedom and human rights,” ani Yaqiu Wang, senior China researcher sa naturang US-based NGO.

“Governments and international institutions around the world should show support and call on the Chinese authorities to release them immediately.” RNT/JGC