Sa gitna ng tumataas na kaso ng human immunodeficiency virus (HIV) infections sa bansa, ipinahayag ng Philippine Health Insurance Corporation (PhilHealth) na saklaw nito ang mga outpatient HIV/AIDS (Acquired Immune Deficiency Syndrome) na paggamot sa mga itinalagang HIV treatment facility.

“Our Outpatient HIV/AIDS Package, which is part of our Sustainable Development Goals (SDG)-related benefits covers up to ₱30,000 per year or ₱7,500 per quarter. Kasama po rito ang bayad para sa mga gamot, laboratory examinations, at professional fees ng providers para sa mga HIV/AIDS-related cases na kumpirmado ng Rapid HIV Diagnostic Algorithm (rHIVda) facilities, STD/AIDS Central Cooperative Laboratory (SACCL),o ng Research Institute for Tropical Medicine (RITM),” ani PhilHealth acting president at chief executive officer Emmanuel R. Ledesma, Jr.

Kamakailan ay iniulat ng Department of Health (DOH) ang pagtaas ng mga impeksyon sa HIV. Sa pinakahuling bilang ng kaso ng HIV/AIDS, iniulat ng DOH na 79 na Pilipinong nasa edad 10 hanggang 19 taong gulang at pitong batang wala pang 10 taong gulang ang na-diagnose na may HIV noong Enero 2023 lamang.

Samantala, batay sa bilang ng HIV/AIDS noong Disyembre 2022 ng health department, mayroong kabuuang 14,970 bagong kaso ng HIV ang natukoy mula Enero hanggang Disyembre nitong nagdaang taon 2022. Ang bilang noong 2022, sabi ng DOH, ay 2,631 na kaso na higit sa 12,339 na kaso na naitala noong 2021 na may katumbas na 21 porsiyentong pagtaas.

“As of the end of 2022, PhilHealth has paid 15,191 claims from HIV treatment facilities, equivalent to 0.11 percent of the total claims count for the year, amounting to ₱108,463,468,” ani Ledesma.

Ayon kay Ledesma, noong Pebrero ng taong ito, mayroon nang 103 government at 44 na private HIV treatment facilities na accredited ng PhilHealth para sa outpatient HIV/AIDS treatment.

“Prevention is still the best medicine because there is still no cure for the disease,” paalala ni Ledesma sa publiko na habang ang outpatient HIV/AIDS treatments ay sakop ng PhilHealth.

“Prevention is crucial to help slow the spread of the virus and reduce the risk of transmission thereby protecting individuals from infection and ultimately saving lives,” dagdag pa nito. RNT

MANILA, Philippines – Hindi bababa sa 446,696 aktwal na kaso ng tuberculosis sa bansa ang naiulat noong 2022, sinabi ng Department of Health (DOH).

Sinabi ni DOH officer-in-charge Maria Rosario Vergeire sa paglulunsad ng Philippine Acceleration Action Plan for Tuberculosis na ang natukoy na aktwal na kaso noong 2022 ay partial lamang at mayroong kabuuang 447,696 detected o notified sa pamamagitan ng reporting system noong 2022.

Pahayag ni Vergeire, nakaapekto ang COVID-19 sa iba pang programa sa kalusugan kabilang ang Tuberculosis program ng Kagawaran.

Ayon sa World Health Organization, ang tuberculosis ay sanhi ng bacteria (Mycobacterium tuberculosis) na kadalasang nakakaapekto sa baga ngunit kumakalat din sa iba’t ibang organ ng katawan. Ang tuberculosis ay nalulunasan at naiiwasan.

Maaring maikalat ang sakit mula sa isang tao at maaring makapanghawa ng 10 hanggang 20 indibidwal sa isang bahing kapag mataas ang baccili sa loob ng katawan.

“Kapag ikaw naggamot in that two weeks of intensive… yung risk mo makapanghawa ay mababang mababa na. Kaya meron tayong intensive treatment for the first two weeks,” saad ni Vergeire.

Nauna nang sinabi ng DOH na nasa 700,000 Pilipino sa buong bansa ang nagkakaroon ng tuberculosis bawat taon.

Sinabi naman ni Dr. Ronald Allan Fabella, Global Fund Advisor ng DOH Disease Prevention and Control Bureau, hindi bababa sa 470,000 Pilipino ang nag-avail ng tuberculosis prevention services noong 2022.

Kabilang sa mga sintomas kapag nagkakaroon ng aktibong tuberculosis ang isang tao ay ubo, lagnat, pagpapawis sa gabi, o pagbaba ng timbang. Jocelyn Tabangcura-Domenden

MANILA, Philippines – Hindi bababa sa 21.6% ng mga batang may edad na zero hanggang 23 buwang gulang sa buong bansa ay bansot, sinabi ng Department of Health (DOH) sa media forum nitong Martes.

Ayon kay DOH officer-in-charge Maria Rosario Vergeire, mula sa zero hanggang 23 months old age range, nasa 12.3% na mga bata ang kulang sa timbang.

“Itong 21.6% ay nagkakaroon ng plateauing kumbaga dahil for the past decade or so, ganito lang naglalaro ang mga pigura ng stunted children dito sa ating bansa. Ibig sabihin hindi nababago and we are not able to move on and progressed or ma-improve natin ito,” sabi ni Vergeire.

Sinabi ni Vergeire na isa sa 10 mga batang nasa paaralan sa buong bansa ay sobra sa timbang, habang isa sa 10 kabataan ay sobra sa timbang o overweight

Samantala, apat sa bawat 10 non-pregnant o non-lactating women ay overweight; tatlo sa bawat 10 lactating mothers ay overweight at apat mula sa 10 kabataan ay overweight o obese.

Sinabi ng opisyal ng DOH na bukod sa isyu sa kalusugan, maraming social determinants o social economic factors na nakakaapekto sa mga pasilidad at nagdudulot ng mga isyung ito.

Ilan sa kadahilan kaya nagiging overweight ay ang madalas na pagkain sa fast-food restaurant at limitadong physical activities na maaaring humantong sa pagdami ng mga  non-communicable diseases.

Ayon kay Vergeire, ang ahensya ay gumagamit ng iba’t ibang mga estratehiya tulad ng mga kampanya sa malusog na pamumuhay, dietary supplementation programs para sa  mga batang kulang sa nutrisyon at bansot, at iba pang mga programa sa iba pang ahensya ng gobyerno upang matugunan ang mga social determinant ng kalusugan. Jocelyn Tabangcura-Domenden

MANILA — Nakapagtala ang Pilipinas ng 983 COVID-19 cases nitong nakaraang linggo, sinabi ng Department of Health nitong Martes.

Mula Marso 6 hanggang 12, isang average na 140 arawang COVID infection ang naitala sa bansa, na 8 porsyento na mas mataas kumpara sa nakaraang linggo.

Sa mga bagong impeksyon noong isang linggo, isang kaso ang itinuring na malubha o kritikal, ayon sa pinakahuling bulletin ng DOH.

Nitong Linggo, 351 na kaso o 9.2 porsiyento ng kabuuang COVID-19 admission ang nasa malubha at kritikal na kondisyon, sinabi ng ahensya.

Hindi bababa sa 265 o 13.4 porsyento ng mga intensive care unit bed para sa mga pasyente ng COVID ang okupado. Ang non-ICU bed utilization rate ay nasa 17.1 percent.

Nitong nakaraang linggo, na-verify din ng DOH ang 58 pang COVID-related fatalities, na binanggit ang late encoding of death information.

Noong Marso 13, ang Pilipinas ay may 9,128 na aktibong kaso ng COVID-19.

Mula nang magsimula ang pandemya, ang bansa ay nakakuha ng 4,078,041 na impeksyon sa coronavirus, kung saan mga 66,217 ang nagresulta sa pagkamatay.

Sa ngayon, nasa 73.9 milyong Pilipino ang ganap na nabakunahan laban sa COVID-19. RNT

MANILA, Philippines – Umabot na sa 86 na kabataan ang nasapul ng kaso ng human immunodeficiency virus (HIV) noong Enero ngayong taon, batay sa datos ng Department of Health (DOH).

Sa datos ng Epidemiology Bureau ng DOH, umabot sa 1,454 kumpirmadong HIV-positive na indibidwal ang naitala noong Enero, pitong kaso ay mga bata na may edad dalawa hanggang siyam, habang 79 na kaso ay mga kabataan na may edad 10 hanggang 19.

Sa mga kabataan, 57 kaso ay 18 hanggang 19 taong gulang; 20 kaso ay 15 hanggang 17 taong gulang; at dalawang kaso ay 10 hanggang 14 taong gulang.

Sinabi ng DOH na halos lahat sa kanila ay nakakuha ng virus sa pamamagitan ng pakikipagtalik, maliban sa isa na walang data sa mode of transmission.

Para sa mga bata, anim ang nakakuha ng HIV sa pamamagitan ng vertical transmission, habang ang isa ay walang data sa mode of transmission.

Mayroon ding 444 na kaso na may edad 15 hanggang 24 na nagpositibo sa HIV. Sa kanila, 96 ang natagpuang may advanced HIV infection.

Tatlumpu’t siyam na pagkamatay din ang naitala ng DOH sa mga taong na-diagnose na may HIV noong Enero.

Halos kalahati o 18 sa mga nasawi ay nagmula sa Central Luzon, National Capital Region, at Northern Mindanao, habang ang iba ay naiulat sa iba’t ibang bahagi ng bansa.

Tinukoy ng DOH na 6,383 na pagkamatay ang naitala sa bansa mula Enero 1984 hanggang Enero 2023, mula sa kabuuang 110,736 na kaso ng HIV.

Sa press briefing nitong Martes, idiniin ni DOH officer-in-charge Maria Rosario Vergeire na lahat, anuman ang kanilang edad, ay maaaring magkaroon ng HIV.

Ipinaliwanag niya na ang pinakakaraniwang sanhi ng HIV sa Pilipinas ay hindi ligtas na pakikipagtalik.

“Hindi na po death sentence ngayon ang HIV katulad noong araw na iniisip ng mga tao na kapag nagka-HIV, wala nang lunas. Hindi kayo nagagamot, pero ‘yung gamot na iniinom niyo can maintain and sustain your life and you will be productive hanggang sa matagal na matagal na panahon,” aniya pa. RNT