GAB-MPD kumilos vs horseracing bookies

GAB-MPD kumilos vs horseracing bookies

November 15, 2020 @ 7:56 PM 2 months ago

  •  
  •  
  •  

MANILA, Philippines – PATULOY ang operasyon ng Games and Amusements Board (GAB) Anti-Illegal Gambling Division para masawata ang naglipanang illegal ‘bookies’ sa horseracing  matapos aprubahan ng gobyerno ang muling pagbubukas ng industriya na malapit sa masang Pinoy.

Sa pangunguna ni GAB-AIGD Chief Glenn Pe at sa koordinasyon sa Manila Police Department-District Intelligence Division (MPD-DID), nagsagawa ng joint anti-gambling operation sa Kalimbas St. Sta. Cruz, Manila nitong Nobyembre 8 na nagresulta sa pagkasakote ng tatlong suspect na sangkot sa illegal bookies.

Dinakip at nakatakdang sampahan ng kaukulang kaso na paglabag sa PD 1602 na naamyendahan ng RA 9287 (Illegal horseracing bookies) sina Hazel Francisco, Brual Acuna at Jaime Adalim. Nakumpisa sa kanila ang TV monitor, iba’t ibang paraphernalia at cash.

“Ngayon pong nagbabalik na ang industriya ng karera, balik din sa illegal na gawain ang ilan natin kababayan. Ngunit, makaaasa po ang ating publiko na gagawin namin ang lahat para matigil ang kanilang gawain,” pahayag ni GAB Chairman Abraham ‘Baham’ Mitra.

“Sa atin pong kababayan, kung nais po ninyong suportahan ang industriya ng horseracing  na mahabang panahon ding nalugmok dahil sa lockdown, doon na po tayo magpunta sa legal at may online apps na rin po para maiwasan ang contact,” dagdag pa nito.

Iginiit ni Mitra na malaki ang naiaambag ng industriya ng horseracing  sa pamamagitan ng buwis na nakukuha sa cash prizes at iba’t ibang aspeto na direktang sangkot sa programa at pamamalakad.

Nito lamang Oktubre, ibinida ng GAB Horseracing Division na tumaas ang sales sa horseracing sa 45% mula nang buksan ang kabuuang 72 off-track betting stations sa Metro Manila.Rico Navarro


  •  
  •  
  •  

Loading...