Garin sa DOH: Doxycycline ilagay sa mga barangay, evacuation center vs lepto

Garin sa DOH: Doxycycline ilagay sa mga barangay, evacuation center vs lepto

November 7, 2022 @ 2:31 PM 3 weeks ago


MANILA, Philippines – Inirekomenda ni House Deputy Majority Leader at Iloilo Rep. Janette Garin sa Department of Health (DOH) na ipwesto ang mga doxycycline drug para sa leptospirosis sa mga barangay at maging sa paaralan na ginagamit na evacuation center upang agad na magamit sa panahon ng kalamidad.

Ang suhestiyon ay ginawa ni Garin matapos ang naging obserbasyon sa naging pananalaasa ng Bagyong Paeng na nahirapan ang mga District, Provincial at Local Government Units (LGUs) na hindi agad makapagbigay ng doxycycline sa mga apektadong residente dahil ang suplay nito ay kukunin pa sa DOH Regional Offices.

Ang mga gamot at medical supplies bilang paghahanda sa Bagyong Paeng ay inilagay ng DOH sa mga Regional Offices nito gayunpaman nang manalasa na ang bagyo ay nahirapan nang ibaba ang gamot sa mga LGUs partikular na ang kinakailangang doxycycline.

Ani Garin, sa kanyang distrito sa Iloilo First District ay anim na araw matapos ang Bagyong Paeng ay saka lamang nakarating ang naturang gamot habang may ilang lalawigan na matinding tinamaan ng bagyo ang hindi pa rin nabibigyan hanggang sa ngayon.

“Leptospirosis is a preventable disease pero ang nangyayari sa atin huli na yung prophylaxis na para sana sa prevention. Doxycycline to be effective should be initiated as soon as possible,” paliwanag ni Garin na isa ring doktor.

“Yung oras ay mahalaga, makainom agad lalo na yung mga high risk individuals pero ang naging problema ay naputol na ang communicaton lines, nasira ang tulay, may ginagawang clearing operations kaya paano mapick up ang gamot, matatagalan talaga. So nawala na yung importansya nito na para sana sa prevention,” dagdag pa niya.

Umaasa si Garin na rerepasuhin ng DOH ang prepositioning ng doxycyxline lalo isa ito sa mga gamot na kailangan sa panahon na may kalamidad.

“We are proposing a more practical and responsive solution to prevention of leptospirosis. We should target zero leptospirosis post flooding, Hinahabol natin ang protection because leptospirosis easily reaches irreversible stage. Prevention is still the best,” giit ni Garin.

Ang leptospirosis ay nakukuha mula sa kontaminadong ihi ng mga hayop, at ang bacteria ay maaring pumasok sa mga sugat, mata, ilong at bibig.

Ang unang sintomas ay maaaring lumabas sa loob ng 2 hanggang 14 araw, kabilang dito ang mataas na lagnat, pananakit ng ulo, muscle pain, chills, pamumula ng mata, sakit ng tiyan, jaundice, pagsusuka ,diarrhea at rash. Kung hindi maagaapan ay maaari itong magresulta sa kidney damage, meningitis, liver failure, respiratory distress o kamatayan.

Napatunayan na ng mga experto na nakatutulong ang doxycycline upang hindi magkaroon ng malalang kaso ng leptospirosis at alinsunud sa “Interim Guidelines on the Prevention of Leptospiros through the use of prophylaxis in Areas Affected by Floods” na ipinalabas ng DOH ay dapat maibigay ito sa mga apektadong indibidwal sa loob ng 24 hanggang 72 oras mula sa pagkakababad nito sa kontaminadong tubig. Gail Mendoza