MANILA, Philippines- Patay ang isang traffic enforcer matapos tumbukin ng trailer truck at magulungan habang nasa kasagsagan ng pagmamando ng trapiko kahapon sa lungsod ng Quezon.

Kinilala ni Traffic Sector 1 commander CAPT Napoleon Cabigon ang biktima na si Jeffrey Antolin, 35-anyos, miyembro ng Department of Order and Safety (DPOS), residente ng No. 9 Tinagan St. Barangay San Jose Q.C.

Kinilala naman ang suspek na si Joel Dimacali, 47, nakatira sa 921 Asuncion St Tondo Manila, drayber ng Isuzu Tractor Head na may plakang AAQ-7032 na nakarehistro sa Cyrus Logistics Incorporated na matatagpuan
sa 2108 Centara Hotel Manila Del Pilar Brgy 430 Malate Manila.

Ayon kay PSSG Jayson Gutierrez, may hawak ng kaso, dakong alas-5:30 ng hapon (March 22) nang maganap ang insidente sa kahabaan ng A Bonifacio avenue sa harap ng Cloveleaf Ayala Mall Brgy Balingasa Q.C.

Lumalabas na habang nagpapatawid ng mga tao sa pedestrian lane si Antolin ay hindi naman huminto ang trak sanhi upang siya ay mabangga at magulungan.

Sinasabi na nagawa pang mailigtas ng biktima ang isang siklista na papatawid sa lugar.

Mabilis naman na isinugod ng Barangay Balingasa ambulance si Antolin sa MCU hospital subalit bandang alas-6:34 ng gabi nang ideklara ni Dr. Tennesse Estrada na binawian na ng buhay ang biktima.

Nakapiit na si Dimacali na nahaharap sa kasong reckless imprudence resulting to homicide sa Quezon City Office of the Prosecutor. Jan Sinocruz

MANILA, Philippines- Tiniyak ng Department of Health (DOH) nitong Huwebes ang integridad ng siyam sa mga opisyal nito na pinatawan ng anim na buwang suspensiyon ng Office of the Ombudsman matapos masangkot sa umano’y maanomalyang pagbili ng COVID-19 supplies noong 2020 at 2021.

Bagama’t iginagalang nito ang desisyon ng Ombudsman, naninindigan ang DOH na ang mga opisyal ay “nagsagawa ng makabuluhang papel” sa pagtugon sa pandemya.

Ang naturang mga opisyal ayon sa DOH ay dekada nang nasa ahensya at kinikilala ang kanilang serbisyo at sakripisyo na pangako sa mga Filipino.

“Bagama’t nangangako kaming sumunod sa relihiyon sa lahat ng mga pamamaraan, tinitiyak ng DOH ang integridad ng mga opisyal na ito, na may mahalagang papel sa pagtugon sa COVID-19 ng bansa,” sabi ng ahensya.

Sa pahayag pa ng DOH, habang sila ay nangangako na sumusunod sa lahat ng pamamaraan, tinitiyak nito na ang integridad ng mga opisyal nito sa pagtugon sa COVID-19 ng bansa.

Kinilala ang mga opisyal ng DOH na sinuspinde na sina Nestor Santiago, Jr., Crispinita Valdez, Amado Tandoc, Lei Lanna Dancel, Dave Tangcalagan, Jhobert Bernal, Kenneth Aristotle Punzalan, Rose Marasigan, at Maria Carmela Reyes.

Kasama rin ang 24 iba pa mula sa Department of Budget and Management – Procurement Service (PS-DBM), kabilang si Overall Deputy Ombudsman Warren Rex Liong at dating DBM Undersecretary Lloyd Christopher Lao.

Binigyang-diin ng DOH na limitado ang papel nito kasama ang Research Institute for Tropical Medicine (RITM), sa pagbibigay ng technical input bilang end-users sa pagbili ng mga commodities para sa COVID-19 pandemic.

Gayunman, nangako ang ahensya na makikipagtulon ito sa imbestigasyon at
itaguyod ang lahat ng nararapat na proseso na ipinag-uutos ng Office of the Ombudsman at ang gobyerno.

Matatandaang pinangunahan ni dating Senador Richard Gordon, bilang blue ribbon committee chair, ang pagtatanong sa paglilipat ng P42 bilyong pondo ng COVID-19 mula sa DOH patungo sa PS-DBM.

Kabilang dito ang P8.6 bilyong PS-DBM na ginamit para sa pagbili ng mga face mask, face shield, at personal protective equipment (PPEs) mula sa Pharmally Pharmaceuticals Corp., na mayroon lamang P625,000 na paid-up capital nang pumasok ito sa transaksyon ng gobyerno. Jocelyn Tabangcura-Domenden

MANILA, Philippines- Inanunsyo ng Malacañang nitong Huwebes na itinalaga si retired Court of Appeals associate justice Monina Arevalo-Zenarosa bilang bagong commissioner ng Commission on Human Rights.

“Itinalaga bilang Commission on Human Rights (CHR) Commissioner ngayong araw si dating Associate Justice ng Court of Appeals, Atty. Monina Arevalo-Zenarosa,” anang Presidential Communications Office (PCO) sa Twitter.

Nanumpa si Arevalo-Zenarosa sa harap ni Executive Secretary Lucas Bersamin.

“Sa kanyang malawak na karanasan sa larangan ng batas at pangangalaga sa karapatang pantao, magiging responsable si CHR Commissioner Zenarosa sa pagpapatupad ng mga karapatan ng lahat ng Pilipino, partikular na ng mga marhinalisado,” pahayag ng PCO. RNT/SA

MANILA, Philippines- Sinabi ni AnaKalusugan Party-list Rep. Ray Reyes na dapat itaas ang tinatawag na “sin taxes” sa bansa.

Ayon kay Reyes, vice chairman ng House Committee on Health, na makatutulong ang pag-amyenda sa Sin Tax Reform Law of 2012 sa pagpondo sa Universal Health Care (UHC) at maisulong ang healthier lifestyle.

“Studies have shown that sin tax is working lalo na sa ating mga kabataan. Through this measure, we help millions of Filipinos from acquiring preventable diseases – especially tobacco-related illnesses,” pahayag niya nitong Huwebes.

Binanggit din ni Reyes ang pag-aaral ng University of the Philippines Population Institute (UPPI), kung saan makikita ang bumabang alcohol, cigarette, at vape consumption ang mga kabataan dahil sa mas mahal na presyo ng sin products.

Makikita rin sa Young Adult Fertility and Sexuality Study (YAFS) na bumaba ang kaso ng paninigarilyo sa 15 hanggang 24-anyos mula sa 22 porsyento noong 1994 sa 12 porsyento nitong 2021.

“We are still one of the countries with lowest sin taxes and there is still more work to be done for us to get within the WHO standards of Universal Health Care,” pahayag niya.

Sinabi pa ni Reyes na kasalukuyan nilang pinag-aaralan ang pagtataas ng buwis sa vape products at sugary drinks.

“Vape products are usually branded as a ‘safer’ alternative to cigarettes. This is misleading because they still cause harm to the body,” sabi niya.

“Excess intake of sugar meanwhile can lead to obesity which continues its uptrend in the country. According to DOH, more than 30 percent of Filipino adolescents are projected to be overweight and obese by 2030 if no action is taken,” patuloy ng mambabatas. RNT/SA

MANILA, Philippines- Umabot na sa P45.6 milyong halaga ng food at non-food items ang naipamigay na ng Department of Social Welfare and Development (DSWD), local government units, at pribadong sektor  sa mga indibiduwal at pamilya na apektado ng  oil spill  mula sa motor tanker na lumubog sa Oriental Mindoro noong Pebrero  28, 2023.

Base sa report  ng Disaster Response Operations Monitoring and Information Center ng DSWD,  “as of March 23”, may  P45,674,782.08 halaga ng tulong ang naipamaigay na sa mga apektadong pamilya.

Sa nasabing halaga, may P38,120,250 ang nagmula sa DSWD; P1,008,289 mula sa local government units;  P675,286 mula sa  non-government organizations, at P5,870,957.08 mula sa ibang katuwang.

Sinabi ng DSWD na naapektuhan ng oil spill ang 34,553 pamilya o 163,498 indibiduwal mula sa 151 barangay sa  Mimaropa (27,358 sambahayan) at Western Visayas (7,195 sambahayan).

Siniguro ng DSWD na mayroon itong P671.31 million quick response fund (QRF) sa  central office, at P10 milyong piso na available sa  field offices sa Mimaropa at  Western Visayas, na maaaring pang-suporta sa relief needs ng  mga  displaced families bunsod ng epekto ng oil spill.

Mayroon ding P64.7 milyong pisong available funds sa iba pang DSWD field offices na maaaring gamitin sa pamamagitan ng  inter-field office augmentation.

Idagdag pa, ang  DSWD ay mayroong 96,783 family food packs na available sa  disaster response centers nito kung saan 30,636 packs ay nasa National Resource Operations Center (NROC) sa Pasay City at 66,147 packs naman ay nasa  Visayas Disaster Resource Center (VDRC) sa Mandaue City.

Mayroon ding 135,750 family food packs ang available sa DSWD field offices sa Mimaropa at Western Visayas, habang 403,820 family food packs naman ang  available sa ibang DSWD field offices, na maaaring pang-suporta sa relief needs ng mga  displaced families.

Idinagdag pa ng DSWD na mayoong P865.35 milyong halaga ng  iba pang  food at non-food items sa warehouses ng NROC, VDRC, at DSWD field offices. Kris Jose