ANG Pulisya ng Caloocan ay isa sa city police force sa Metro Manila na sa tuwi- tuwina’y nakatatanggap ng pagkilala dahil sa mga makabuluhang proyekto’t reporma na matagumpay na naisasakatuparan ng mga natatalagang hepe o commander nito.
Pero saganang atin, isang bagay na kaya nakakamit ngayon ng Caloocan City Police ang celebrity-like status nito ay dahil sa all-out help and support ng local city government na nagsimula pa sa panunungkulan ni Mayor turned Representative Oca Malapitan at ngayo’y MayornAlong Malapitan.
Patok ang naging samahan ng mga na-appoint na Caloocan Police chief sa noo’y Mayor Oca Malapitan na nagsimulang maging city executive matapos ang May 2013 election na ngayon ay ipinagpapatuloy ng anak nitong si Mayor Along Malapitan na nahalal na alkalde sa nakaraang May national and local elections.
Hindi kailangang dumaing ang nakaupong hepe sa mga Malapitan dahil may kusang palo ang mag-amang lingkod bayan sa pagbibigay ng tulong – pinansyal para sa anomang aktibidad at kung ano-ano pa para sa ikakatagumpay ng pulisya ng lungsod.
Sa Peace and Order Council Meeting noong Enero 17 na dinaluhan ng mga representante ng iba’t ibang sektor, iniulat ni City Police chief Col. Ruben Lacuesta na bumaba ang crime rate o insidente ng kriminalidad sa lungsod ng 5.49 percent na ikinatuwa ng butihing city executive.
Kasabay ng papuri at pasasalamat sa kasipagan ng Caloocan PS ay muling gumana ang ‘generosity mode’ ni Mayor Along kaya’t aniya ay magdodonate ng sampung bagong mobile cars sa pulisya para magamit sa kanilang anti- criminality campaign.
Sa mismong pagpupulong ay pinasalamatan at pinuri ni Lacuesta ang alkalde sa pagiging bukas palad nito sa mga pulis na silang nagpapanatili ng kaayusan at katahimikan sa lungsod.
Kung ang lahat ng alkalde at hepe ng pulisya ay tulad sa Caloocan, tiyak na ang maayos ang lahat ng pamayanan.
