GM ‘POY’ LIPANA ‘ASSET’ NG MMDA

GM ‘POY’ LIPANA ‘ASSET’ NG MMDA

December 6, 2022 @ 8:06 AM 2 months ago


HINDI ko na ikinagulat ang pagtatalaga sa aking kaibigang si Ret. Police Colonel Procopio “Popoy” Lipana bilang general manager ng Metro Manila Development Authority.

Sa tagal kong naging assignment ang police beat, lalo na ang Quezon City Police District na noon ay Central Police District pa, nasaksihan ko kung paano magtrabaho si Col. Poy (tawag ko sa kanya).

Masipag, maasahan na opisyal si Poy Lipana kaya’t naging maningning ang kanyang police career lalo na nang ito ay hepe ng Criminal Investigation Division ng QCPD.

Sa panahon niya bilang CID chief, ilang well-organized crime syndicates ang na-neutralized na naging susi para bumaba ang crime rate sa Kyusi.

Naging chief of police din ng San Juan City, provincial director ng Camarines Sur Police Provincial Office, district chief directorial staff at deputy district director for administration ng QCPD si Col. Poy.

Produkto ng ’87 class ng Philippine National Police Academy, si Col. Poy ay workaholic public servant – angking ugaling dinala sa QC government matapos magretiro sa pambansang pulisya.

Sa QC-local government unit, si Col. Poy ay pinagkatiwalaan ni Mayor Joy Belmonte na pamunuan ang projects and program office ng market development and administration department.

Tulad sa PNP na tagumpay na nagampanan ang trabaho, achiever din ang bagong GM ng MMDA sa QC government dahil sa maayos at magagandang proyekto’t programa na kanyang naisakatuparan.

Sa PNP at QC-LGU, maituturing na asset, certified achiever si Lipana kaya’t tiyak na magiging asset din ito sa MMDA. Hinding-hindi sisirain nitong miyembro ng PNPA class ’87 ang tiwalang ipinagkaloob sa kanya ni Pangulong Bongbong Marcos na tulungan sa pamamahala ng ahensiyang pinamumunuan ni chairman Romando Artes.

Sa totoo lang, ang daming bugok, tamad na lingkod-bayan, pero isa si Poy sa iilang opisyal ng pamahalaan na maituturing mong ‘gem’ dahil tunay siyang public servant.

Col. Poy, marami kang kaibigan na ikinararangal ka dahil sa maganda mong ugali pagdating sa trabaho kaya sana ay tuloy-tuloy lang ang magaganda mong nasimulan para tularan na rin ng iyong mga tauhan.