Grupo ng nars kay PBBM: P50K buwanang sahod pagbigyan

Grupo ng nars kay PBBM: P50K buwanang sahod pagbigyan

July 1, 2022 @ 12:15 PM 2 months ago


MANILA, Philippines – Hinimok ng Filipino Nurses United ngayong Biyernes ang bagong administrasyon sa ilalim ni Pangulong Ferdinand “Bongbong” Marcos Jr. na taasan ang sahod ng mga nurse sa P50,000 kada buwan.

Sa panayam sa GMA, sinabi ng pangulo ng FNU na si Maristela Abenojar na magpapakita ang kanilang grupo ng 10-point agenda ng mga nars sa bagong administrasyon.

“Top most po doon sa 10 na laman ng agenda ay itaas ang sahod ng nurses sa mga pampubliko at pampribado… gawin po itong P50,000 a month. ‘Yan po yung entry salary,” aniya.

Binanggit ni Abenojar ang inflation at ang living wage na itinakda ng National Economic and Development Authority (NEDA) kaya natuos ang nasabing halaga.

Sa mga pribadong ospital, may mga nurse na tumatanggap ng P8,000 hanggang P10,000 lang kada buwan, aniya.

Sa mga pampublikong ospital, ang ilang mga nars ay tumatanggap ng P35,000 buwan-buwan sa ilalim ng Salary Grade 15. Gayunpaman, sinabi ni Abenojar na maraming mga nars ang hindi nakakakuha ng halagang ito dahil nasa 50,000 sa kanila ay mga kontraktwal na manggagawa.

Nagbabala si Abenojar na maaaring bumagsak ang healthcare system sa bansa dahil sa nakakaalarmang “exodus” ng mga nurse para magtrabaho sa ibang bansa.

Ayon sa kanya, humigit-kumulang 316,000 sa 917,000 Filipino nurses ang piniling magtrabaho sa labas ng bansa para matugunan ang pangangailangan ng kanilang pamilya sa gitna ng “economic crisis”.

Ayon kay Abenojar, ikinatuwa ng PNU ang sinabi ni Marcos sa pagpapabuti ng kalusugan ng publiko sa kanyang talumpati sa inagurasyon noong Huwebes.

Sa kabilang banda, ikinalungkot ni Abenojar na 71% ng mga healthcare worker ang hindi pa nakakatanggap ng kanilang One COVID Allowance.

Sinabi niya na ang ilang mga benepisyo para sa mga manggagawa sa pangangalagang pangkalusugan noong Enero 2022 ay inilabas lamang noong nakaraang linggo.

Ayon sa kanya, ilang nurse sa mga pribadong ospital ang hindi pa nakakatanggap ng kanilang special risk allowance (SRA) para sa Enero hanggang Hunyo 2021. RNT