MANILA, Philipines – Ilang buwan matapos makuha ang kanyang ikaapat na NBA championship kasama ang Golden State Warriors, nagdagdag si Draymond Green ng isa pang singsing sa kanyang koleksyon.

Nitong katapusan ng linggo, ikinasal siya at ang aktres na si Hazel Renee sa Malibu na dinaluhan ng mga superstar sa NBA.

Dumalo si Stephen Curry, kasama ang dating kakampi at bagong forward ng Los Angeles Lakers na si Juan Toscano-Anderson.

Kabilang din sa panauhin sina LeBron James, Jayson Tatum at Seth Curry.

Ang Michigan State Spartans men’s basketball coach na si Tom Izzo, ang ahente ng sports na si Rich Paul at ang manlalaro ng golp na si Michelle Wie West, na ang asawang si Jonnie, ay direktor ng mga operasyon ng basketball ng Golden State, ay nakita din sa kaganapan.

Nag-pose si James para sa mga larawan kasama sina Green at Curry, at kalaunan ay itinuro na ang tatlo ay nagmamay-ari ng kabuuang isang dosenang singsing ng kampeonato.JC

MANILA, Philippines- Inaresto sa isang entrapment operation ang tatlong pulis sa Manila matapos na umano’y tumanggap ng pera kapalit ng isang impounded na motorsiklo sa loob ng Police Community Precinct (PCP) sa Paco, Manila Lunes ng gabi.

Kinilala ang mga inaresto na sina PSSg Erwin Licuasen y Basilan, 34, ng BIk. ,7 Lot 22, unit 28B Pagrai Hills Mayamot Antipolo City; Corporal Chimber Rey Importa, 32 ng 2938 F. Manalo St., Punta Sta. Ana, Manila; at Pat Leopoldo Tuason y Nival, 39 ng 1231B, Mithi St., Tondo, Manila, pawang nakatalaga sa Paco Police Community Precinct (PCP)ng Manila Police District (MPD)-Station 5.

Sa ulat, dakong alas-10:35 ng gabi kamakalawa nang nagsagawa ng entrapment operation ang IMEG, Camp Crame sa loob ng Paco PCP sa Pedro Gil St., corner A Linao St., Paco, Manila hinggil sa isang na-impound na motorsiklo.

Nauna rito, pumasok sa loob ng nasabing PCP ang dalawang kalalakihan at kinausap si Licuasen hinggil sa umano’y na-impound na motorsiklo.

Matapos ang kanilang pag-uusap, nag-abot umano ng’ di batid na halaga kay Licuasen hudyat upang pumasok ang mga operatiba ng IMEG, Camp Crame at inaresto ang tatlo.

Dinala ang tatlo sa Camp Crame para sa imbestigasyon. Jocelyn Tabangcura-Domenden

MANILA, Philippines – Nakakuha sina  Ian Sangalang at Jio  Jalalon ng imbitasyon mula sa Samahang Basketbol ng Pilipinas (SBP) upang maging bahagi ng Gilas pool para sa August qualifiers kasunod ng pagkabigo ng Hotshots na umabante sa PBA Philippine Cup Finals.

Gayunpaman, wala ang dalawang manlalaro ng Magnolia sa unang araw ng pagsasanay ng pambansang koponan noong Lunes para sa ikaapat na window ng FIBA ​​World Cup qualifiers kung saan makakalaban ng Gilas ang Lebanon at Saudi Arabia.

Ayon sa ulat, lumahok naman sa unang araw ng pagsasanay sina Gilas mainstays Kiefer at Thirdy Ravena, Dwight Ramos, Bobby Ray Parks, Kevin Quiambao, Carl Tamayo, Francis Lopez at PBA star Calvin Oftana, Jamie Malonzo, at Kevin Alas.

Ikinababala lang ng fans ang injury na nakuha ni  Sangalang sa Game 6 ng PBA Philippine Cup semifinals series ng Magnolia laban sa TNT kasunod ng hindi sinasadyang tama ng siko ni Poy Erram sa unang bahagi ng fourth quarter ng laro.

Tinawagan si Erram ng flagrant foul technical 2, na nagresulta sa kanyang ejection habang iniwan ang 6-foot-7 Sangalang na may siyam na tahi  sa kanyang duguang noo, bagama’t nagawa niyang tapusin ang ballgame para sa Hotshots.

Ngunit sinabi ng SBP sa pamamagitan ng Gilas Pilipinas team manager na si Butch Antonio na magsisimulang magsanay sina Jalalon at Sangalang para sa national squad ngayong Martes.

Sinimulan na ng Gilas ang araw-araw na pagsasanay bilang paghahanda para sa window ng World Cup kung saan makakasagupa ng Pinas ang FIBA ​​Asia Cup runner-up Lebanon sa Beirut, at pagkatapos ay susubukan ang husay ng Saudi Arabia sa pagho-host nito sa Middle East country sa ika-29 sa Mall ng Asia Arena.JC

MANILA, Philippines – Pinarangalan ng Southeast Asian Games Federation ang dating sprint queen na si Lydia de Vega bago ang kanilang pagpupulong ngayong Martes sa National Olympic Committee of Thailand Building sa Bangkok.

Ayon kay Philippine Olympic Committee (POC) nagpalabas ng video tribute ang federation para kay De Vega bago ang kanilang pagpupulong.

Namatay si De Vega noong Agosto 10 pagkatapos ng apat na taong pakikipaglaban sa breast cancer.

Noong nakilala bilang pinakamabilis na babae sa Asya, nanalo si De Vega ng siyam na gintong medalya sa Southeast Asian Games. Ang kanyang personal na pinakamahusay na 11.28 segundo ay tumayo ng 33 taon bago sinira ni Kristina Knott noong 2020.

Huli siyang nagpakita sa publiko sa pagbubukas ng 2019 Southeast Asian Games sa Pilipinas.

“She fought the very good fight and is now at peace,” ani ng anak ni De Vega na si volleyball player Stephanie Mercado-de Koenigswarter.

Nakahimlay ang labi ni De Vega sa kanyang bayan sa Meycauayan, Bulacan.JC

MANILA, Philippines- Kasunod ng lumobong bilang ng mahihirap sa bansa na umabot na sa 20 milyon noong 2021 mula higit 17 milyon noong 2018, hinimok ni Senador Win Gatchalian ang national government na isulong ang tinatawag na inclusive growth at social protection upang maiangat ang buhay ng mga Pilipino mula sa kahirapan.

“Isa sa mga pinaka epektibong paraan upang masugpo ang kahirapan ay ang pagtatatag ng isang ekonomiya na makapagbibigay ng mas maraming trabaho at makapagpapataas ng productivity,” sabi ni Gatchalian habang binigyaang diin na kailangang lumikha ang gobyerno ng maraming trabaho sa mga Pilipinong nawalan ng kita lalo na noong kasagsagan ng mataas na kaso ng COVID-19 sa bansa dahil sa mga lockdown at quarantine regulations.

Ani Gatchalian ang mga maliliit na negosyo o ang tinatawag na micro, small, and medium enterprises (MSMEs) ay nagsusulong ng inclusive growth sa pamamagitan ng pagbibigay ng trabaho at maraming oportunidad para sa mga umuusbong o nagsisimulang magnegosyo. Ang panukalang batas ng senador na “One Town, One Product (OTOP) Philippines Act” ay naglalayong tumulong sa mga MSMEs na makabangon mula sa dagok ng pandemya. Ang naturang panukalang batas ay nagsusulong ng mga promotional program para sa mga sarili nating produkto na binuo ng MSMEs. Ito ang magpapaikot sa ating ekonomiya, ani Gatchalian, sa pamamagitan ng pagbibigay ng kapangyarihan sa mga konsyumer na gumasta at magpaikot ng pera sa lokal na ekonomiya.

Ayon sa senador ang isa pang paraan upang makapagpatupad ng angkop na intervention o tulong sa mga mahihirap nating kababayan ay sa pamamagitan ng batas na Community-Based Monitoring System o CBMS. Ang mga datos na makukuha sa monitoring system na ito ang magiging batayan ng national government at local government units o LGUs kung natutulungan nang maigi ang mga nangangailangang Pilipino lalo na ang mga benepisyaryo ng Pantawid Pamilyang Pilipino Program o 4Ps.

Isinusulong din ni Gatchalian ang Philippine Warehouse Receipts Act of 2019 na naglalayong lumikha ng isang online at uniform registry system kung saan ang lahat ng electronic warehouse receipts ay pwedeng mairehistro at makuha. Dahil dito, inaasahang magiging maayos ang agricultural productivity at matutupad na ang food security sa bansa habang nakakapagbigay ng maayos na kita para sa mga magsasaka.

“Ang kailangan nating gawin ngayon ay gumawa ng mga batas at magpatupad ng mga reporma na direktang tutulong sa hanay ng marginalized sectors. Mahalaga sila sa komunidad dahil malaki ang kanilang naiaambag sa ekonomiya ng buong bansa sa pamamagitan ng kanilang mga kaalaman at kakayahan,“ pagtatapos ni Gatchalian. Ernie Reyes