Higit 135K paslit bakunado na sa Taguig

Higit 135K paslit bakunado na sa Taguig

February 21, 2022 @ 11:46 AM 4 months ago


MANILA, Philippines – Umabot sa 135,699 kabataan na nasa edad 5 hanggang 17 taong gulang ang naturukan na ang unang dose ng bakuna kontra coronavirus disease o COVID-19 sa Taguig City.

Sinabi ni Taguig City Mayor Lino Cayetano, base sa report na natanggap ng lokal na pamahalaaan nitong Pebrero 18, sa mga tsikiting na nasa edad 5 hangggang 11 ay nasa 9,292 bata na ang nabakunahan ng unang dose habang sa edad 12 hanggang 17 ay nakapagturok na ng kabuuang 126,407 kabataan sa lungsod kung saan 60,228 sa bilang na ito o 48 porsiyento ay mga fully vaccinated na.

Ayon kay Cayetano, sa pangkalahatan ay nakapagturok na ng 1.74 milyong vaccine doses ang lokal na pamahalaan at sa nagamit na bilang ng vaccine doses ay 763,846 indibidwal ang mga fully vaccinated na katumbas ng 87 porsiyento ng 882,512 populasyon ng lungsod.

Dagdag pa ni Cayetano na sa mga fully vaccinated na adults, 187,277 ang mga nakatanggap na ng kanilang booster shots.

Napag-alaman naman kay Department of Health (DOH) Undersecretary Maria Rosario Vergeire na ang Part 3 ng kanilang National Vaccination Days nitong Pebrero10 at 11 ay nakapagtala lamang sila ng 3.5 milyong indbidwal na nakapagbakuna na hindi umabot sa kanilang target na 5 milyon.

Sa pangkalahatang bilang ay sinabi rin ni Vergeire na sa kasalukuyan, 62.3 milyong indibidwal na ang mga fully vaccinated na sa bansa habang nasa 9.6 milyonnaman ang naturukan na ng kanilang booster shots. James I. Catapusan