ZAMBOANGA CITY – Patay ang kambal na babae habang sugatan ang 26 na iba pa matapos tumaob at nagpagulong-gulong ang sinasakyan nilang trak umaga ng Miyerkules, Marso 29, sa lungsod na ito.

Kinilala ang nasawi na isa sa kambal na si Nursiya Taring, habang inaalam pa ng mga awtoridad ang pagkakakilanlan ng kapatid nito.

Patuloy namang ginagamot sa Zamboanga City Medical Center ang mga sugatan kabilang ang driver ng trak na kinilalang si Banny Molina Martinez Jr., 26, lahat ay mga trabahador ng Aquatic Food Manufacturing Corp., sa naturang lungsod.

Ayon kay Lt. Col. Paul Andrew Cortes, ng Zamboanga City-PNP, bandang alas-5 ng umaga nang maganap ang insidente sa kalsadang sakop ng Barangay Sangali, ng nasabing lungsod.

Sa paunang imbestigasyon ng pulisya, sakay ang mga biktima ng company truck papasok sa trabaho nang mawalan umano ng kontrol sa manibela si Martinez sa pakurbadang bahagi ng nabanggit na kalsada.

Dahil dito, tumaob ang trak at nagpagulong-gulong sa kalsada na nagresulta ng pagkasugat ng mga biktima.

Isinugod naman sa nasabing ospital ang mga biktima subalit idineklara na ring dead-on-arrival ang kambal ng umatending doktor na si Dr. Afdal Kunting.

Nagpapatuloy naman ang imbestigasyon ng mga awtoridad sa nasabing insidente. Mary Anne Sapico

MANILA, Philippines – Magpapakalat ang Metropolitan Manila Development Authority (MMDA) ng mahigit 2,000 tauhan sa mga pangunahing kalsada at sakayan sa Semana Santa.

“Handa na po kami mag-deploy ng 2,104 personnel para bantayan ang mga pangunahing lansangan sa Metro Manila, lalo na po sa mga lugar na malapit sa bus terminals, airports, at sea ports,” ani MMDA spokesperson Mel Carunungan sa isang televised public briefing nitong Miyerkules, Marso 29.

Ani Carunungan, inatasan na umano ni MMDA acting chairperson Romando Artes ang mga tauhan nito na hindi sila papayagan na lumiban o magday-off sa Abril 5, 6, 7 at 10.

Papasok naman sa Abril 7 hanggang 9 ang skeleton staff nito.

Maliban dito, nauna nang sinabi ng MMDA na magtatatag sila ng multi-agency command center upang tutukan ang mga sitwasyon sa mga sakayan simula Abril 3.

Ang command center ay binubuo ng MMDA, Land Transportation Office, Land Transportation Franchising and Regulatory Board, at Philippine National Police. RNT/JGC

MANILA, Philippines – Posibleng abutin pa ng hanggang tatlong buwan bago tuluyang makita kung epektibo nga ba ang implementasyon ng exclusive motorcycle lane sa Commonwealth Avenue, Quezon City sa pagpapabuti ng trapiko sa lugar, ayon sa Metropolitan Manila Development Authority (MMDA).

“Hindi pa namin ma-assess o ma-compare yung luma at bagong polisiya dahil dalawang araw pa lang ang pagpapatupad… Sa ngayon ang nararanasan pa natin ay ang birth pains kasama sa pagpapatupad ng bagong polisiya,” sinabi ni MMDA spokesperson Melissa Carunungan nitong Miyerkules, Marso 29.

“At the very least, kailangan pa namin ng mga tatlong buwan para magkaroon ng substantial assessment,” sinabi pa niya.

Nitong Lunes, Marso 27 ay ipinatupad na ang naturang polisiya kung saan mayroong 1,739 ang nahuli sa paglabag.

Sa nabanggit na bilang, 706 ang motorsiklo at 1,033 naman ang four-wheeled vehicles.

Bumaba naman ang mga nahuli nitong Martes sa 563 apprehensions, 402 ang motorsiklo at 161 ang four-wheeled vehicles.

Ani Carunungan, itinalaga na ang karagdagang enforcer para tumulong sa pagpapanatili ng bagong polisiya, ngunit hindi 24-hour duty.

Sila ay hanggang alas-10 lamang ng gabi.

“Isang challenge ng MMDA Quezon City ay pagbatanay ng exclusive lane sa gabi kasi delikado na para sa traffic enforcers,” pagbabahagi niya.

“Ang utos po galing kay Chairman (Romando) Artes at ang Traffic Discipline Office ay unahin ang kaligtasan ng traffic enforcers pag gabi na,” dagdag ni Carunungan. RNT/JGC

ILOILO CITY- Arestado ang isang lola at 27-anyos na lalaki matapos makuhaan ng malaking halaga ng shabu sa isinagawang drug buy bust operation ng mga awtoridad nitong Lunes, Marso 27, sa lungsod ng Jaro.

Kinilala ang mga nadakip na suspek na sina Estrelita Bueno, alyas Madam Ester, 68-anyos, taga Novaliches, Quezon City at Noel Llagas Jr., 27, at residente ng Brgy Ungka, Jaro, Iloilo City.

Sa pinagsamang operasyon ng Regional Drug Enforcement Unit (RDEU), Iloilo City Police Office Station 3 (ICPS3), PNP IG, 2nd Provincial Mobile Force Company Maneuver, Aklan Police Provincial Office, CIT/PIT, at Philippine Drug Enforcement Agency 6 (PDEA 6), nadakip ang mga suspek sa Barangay Buhang, Jaro, Iloilo City.

Ayon sa pulisya, si Bueno ay isang biyuda, ay kilalang big-time tulak.

Bukod sa shabu na may standard drug price na P8,160,000, narekober rin sa mga suspek ang buy-bust money, 1 pakete na naglalaman ng shabu, buy bust money, 6 na pakete na naglalaman ng shabu, habang nakuha rin kay Llagas Jr. ang 5 pakete ng naglalaman ng shabu.

Narekober naman kay Bueno ang isang unit ng puting Samsung keypad na pag-aari ni Llagas, P1,720.00 mula kay Bueno, (1) unit ng black Nokia keypad, olive green Euro Motor Marvel 125 motorcycle na may temporary plate number 0601-1204695, at iba pang personal na kagamitan.

Nakakulong ngayon sa Iloilo City Police Station 3 ang mga suspek para sa tamang disposisyon at nahaharap sa kasong paglabag sa RA 9165 or Dangerous Drugs Act of 2002. Mary Anne Sapico

MANILA, Philippines – Handa na ang Metropolitan Manila Development Authority (MMDA) para sa kauna-unahang Summer Metro Manila Film Festival (MMFF) Parade of Stars na gaganapin sa Quezon City sa Abril 2.

Tampok sa Parade of Stars ang walong float mula sa mga pelikulang line-up ngayong taon, ito ay ang: Apag, Singlebells, About Us But Not About Us, Kahit Maputi Na Ang Buhok Ko, Unravel: A Swiss Side Love Story, Here Comes The Groom, Yung Libro Sa Napanuod Ko; at Love You Long Time.

Dahil dito, magsisilbing staging area para sa mga float ang dalawang outer lanes mula Villa Beatriz hanggang North Zuzuarregui sa naturang lungsod.

Ang parada na tatakbo ng limang kilometro ay didiretso sa Quezon Memorial Circle sa pamamagitan ng Commonwealth Avenue, at ang main event ay gaganapin naman sa Liwasang Aurora.

Sa inaasahang daragsang mga manonood, nakahanda na ang MMDA sa pag-deploy ng kabuuang 780 tauhan na magmamando sa trapiko at sisiguro sa kaligtasan ng mga dadalo.

Samantala, ang Quezon City naman na nagsilbing host para sa parada ay magtatalaga ng 1,202 tauhan para sumuporta sa MMDA.

Kasabay nito, pumirma na ng kasunduan ang MMDA at Film Development Council of the Philippines (FDCP), sa pangunguna ni Chairman Tirso Cruz III, para sa partnership grant na P300,000 sa bawat Summer MMFF film entry.

Layon nito na suportahan ang mga pelikula sa marketing sa pamamagitan ng CreatePH Films ng FDCP.

“With these preparations, we are hopeful that the Parade of Stars for our first Summer MMFF will likewise be a success. We are also looking forward for its good run in cinemas nationwide,” sinabi naman ni MMDA Acting Chairman at concurrent MMFF Over-all Chairman Atty. Don Artes.

Nakatakdang ipalabas sa mga sinehan ang inaugural Summer MMFF mula Abril 8 hanggang 18 sa pakikipagtulungan ng Cinema Exhibitors Association of the Philippines.

Ang awards night naman ay nakatakda sa Abril 11 sa New Frontier Theater. RNT/JGC