MANILA, Philippines – Alinsunod sa kanyang patuloy na pagsisikap na suportahan ang iba’t ibang sektoral na grupo sa buong bansa, ipinadala ni Senator Christopher “Bong” Go ang kanyang koponan sa Zambales mula Hunyo 20 hanggang 23 upang maghatid ng tulong sa libu-libong estudyante na apektado ng pandemya.

Bilang tagapangulo ng Senate committee on sports, pinayuhan ni Go ang mga kabataan na manatili sa paaralan, makisali sa sports at iwasan ang iligal na droga at iba pang uri ng bisyo na maaaring humantong sa mga krimen.

“Layuan niyo ang droga. Mag-sports nalang kayo at mag-aral nang mabuti dahil yan ang puhunan ninyo sa mundong ito,” ang payo ni Go.

“Magtulungan po tayo para maipaglaban ang kinabukasan ng ating mga anak. Sama-sama nating ilayo sila sa iligal na droga, kriminalidad at iba pang masasamang bisyo. Isapuso natin ang pagkakaroon ng mas maayos, ligtas at maginhawang bansa ang pinakamagandang maipapamana natin sa susunod na henerasyon ng mga Pilipino,” anang senador.

Isinagawa ng pangkat ni Go ang relief activity sa President Ramon Magsaysay State University gymnasium sa Iba kung saan nagbigay sila ng mga pagkain sa kabuuang 5,200 estudyante mula sa mga bayan ng Castillejos, San Marcelino, Botolan, Iba, Masinloc, Candelaria at Sta. Cruz.

Samantala, nagbigay din ang koponan sa mga piling indibidwal ng computer tablet, bisikleta at bagong pares ng sapatos.

Binigyang-diin ni Go sa kanyang video message ang kahalagahan ng pagtutulungan at disiplina para makabalik na sa normal ang bansa.

“Lagi nating alalahanin na hindi kaya ng gobyernong mag-isa ang laban kontra pandemya. Hindi rin kakayanin ng mga frontliner kung patuloy na dadami ang mga kailangang dalhin sa mga ospital. Ang pag-iwas sa pagkalat ng COVID-19 ay nagsisimula sa atin sa pamamagitan ng pagiging responsableng mamamayan at pagsunod sa mga protocol sa kalusugan at kaligtasan,” paalala ni Go.

“Let us remain vigilant at sumunod sa mga patakaran. Ugaliing magsuot ng mask, mag-social distancing, maghugas ng kamay at kung hindi kailangang lumabas ay manatili na lang sa bahay upang maiwasan ang mga sakit na ito. Ituloy natin ang pakikipag-bayanihan sa kapwa,” patuloy niya.

Samantala, isang pangkat mula sa Department of Social Welfare and Development ang nagbigay ng tulong pinansyal sa bawat residenteng apektado ng pandemya.

Hinikayat ni Go ang publiko na ipagpatuloy ang pagsunod sa mga inirekomendang protocol sa kalusugan at higit na hinikayat silang kumpletuhin ang dosis ng bakuna at mga booster shot para sa depensa ng kanilang katawan laban sa COVID-19.

Bilang tagapangulo ng Senate committee on health and demography, nag-alok din si Go ng karagdagang tulong sa mga may problemang medikal.

Pinayuhan niya ang mga ito na bisitahin ang President Ramon Magsaysay Memorial Hospital sa Iba kung kailangan nila ng tulong sa pagbabayad ng kanilang mga medikal na bayarin.

Unang itinatag sa Cebu noong 2018, ang Malasakit Center ay isang one-stop shop na naglalayong magbigay sa mahihirap na Pilipino ng maginhawang access sa mga programa ng tulong medikal ng mga kinauukulang ahensya, tulad ng DSWD, Department of Health, Philippine Health Insurance Corporation at Philippine Tanggapan ng Charity Sweepstakes. RNT

MANILA, Philippines – Ipagpapaliban ng national government ang pagbibigay ng kauna-unahang COVID-19 booster dose para sa non-immunocompromised children na may edad na 12 hanggang 17 bunsod ng ilang “glitches” sa Health Technology Assessment Council (HTAC).

Ipinaliwanag ni National Vaccination Operations Center (NVOC) chairperson at Health Undersecretary Dr. Myrna Cabotaje na ang HTAC ay gumawa ng kondisyon na ang healthy adolescents na may edad na 12 hanggang 17 ay mabibigyan lamang ng kanilang booster shot kung ang booster coverage para sa senior citizens sa kani-kanilang lugar ay umabot sa 40%.

“We were confident sana na after the immunocompromised, sisimulan na ang rest of the 12 to 17 booster. Kaya nga lang po, may isang recommendation ang HTAC na nakiki-bargain kami. Ang gusto nila, at least 40% ng first booster ng area ay sa senior citizen. Alam naman natin na mababa ang first booster. Scientifically, may basis sila, pero operationally, nahihirapan kami,” ayon kay Cabotaje.

Ang rollout ng unang COVID-19 booster dose para sa immunocompromised minors para sa nasabing age group ay nagsimula, araw ng Miyerkules subalit sa mga ospital lamang dahil sa safety reasons.

Sinabi ni Cabotaje, na nananatili pa rin silang nakikipag-negosasyon sa HTAC kaugnay sa nasabing kondisyon, umaasa na magdedesisyon ito sa loob ng isang araw kung ang booster inoculation para sa non-immunocompromised children na may edad na 12 hanggang 17 ay maaaring magpatuloy “as long as they meet the five-month interval.”

Base sa guidelines ng Department of Health (DOH), ang immunocompromised adolescents na may edad na 12-17 ay maaaring makatanggap ng first booster ng 28 araw matapos ang second dose ng COVID-19.

Samantala, ang non-immunocompromised mula sa parehong age group ay kailangan na maghintay ng limang buwan matapos ang bakuna ng kanilang second COVID-19 dose bago pa sila makakuha ng kanilang unang booster shot. Kris Jose

MANILA, Philippines – Nananatiling mababa ang antas ng COVID-19 vaccination sa Bangsamoro Autonomous Region in Muslim Mindanao (BARMM), ayon sa National Vaccination Operations Center (NVOC).

Sa datos ng NVOC, nasa 33% ng populasyon ng BARMM pa lang ang nabakukunahan, mas mababa sa 70% na target na itinakda bago matapos ang administrasyong Duterte.

Sa panayam sa radyo, sinabi ni NVOC chairperson at Health Undersecretary Dr. Myrna Cabotaje na 1.1 milyon sa 3.5 milyong populasyon ng BARMM ang ganap na nabakunahan laban sa COVID-19.

“Pero talagang humataw sila bandang after the Ramadan because of the special vaccination days kasi nasa 20 [percent] lang sila. We will be happy sana na 50 [percent], but we don’t know if they can even reach 50% by the end of [President Duterte’s] term,” aniya pa.

Noong Mayo, ang BARMM, sa pamamagitan ng health ministry nito, ay nagsagawa ng isang region-wide special COVID-19 vaccination drive na may layuning maabot ang 70% na target bago ang Hunyo ng taong ito.

Nauna nang tinukoy ng Department of Health (DOH) ang ilan sa mga hamon sa paglulunsad ng pagbabakuna sa rehiyon, kabilang ang pag-aalangan o kagustuhan sa bakuna, limitadong workforce, fake news, late submission ng araw-araw na ulat ng pagbabakuna, at malamig na suporta mula sa mga local chief executive at mga barangay official.

Sa kabilang banda, iniulat din ni Cabotaje na 63% na ngayon ang ganap na nabakunahan sa Soccsksargen, habang ang Bicol Region at Mimaropa ay parehong hindi pa rin umabot sa 70% na target na populasyon.

Iniugnay niya ang mga sakuna dulot ng mga nagdaang bagyo at ang phreatic eruption ng Bulusan Volcano sa Sorsogon na nakaapekto sa nasabing mga rehiyon.

“We hope sana maabot nila ang 70 [percent] kasi nasa almost 68 [percent] na sila,” aniya pa.

Hindi bababa sa 70 milyong Pilipino ang ganap na ngayong nabakunahan laban sa COVID-19, habang 14.8 milyong indibidwal ang nakatanggap ng kanilang unang booster dose. RNT

MANILA, Philippines- Matapos ang mga pulis, mga miyembro ng Bureau of Jail Management and Penology at mga barangay sa Lungsod ng Caloocan naman ang sumailalim sa urban agriculture seminar.

Sa pangunguna ng mga kawani ng People’s Law Enforcement Board at Caloocan City Parks and Administration Services, binigyan ng kaalaman ang mga dumalo hinggil sa tamang proseso ng pagtatanim maging sa siyudad.

Layunin ng programang ito na patuloy na itaguyod ang urban agriculture project sa Lungsod ng Caloocan na malaki ang maitutulong sa kabuhayan at pagkain ng mga mamamayan.

Noong 2020 ay lumagda si Mayor Oscar Malapitan sa isang memorandum of agreement kasama ang Department of Agriculture at Philippine Seed Industry Associate upang maging bahagi ng urban agriculture program ang Caloocan. Merly Iral

MANILA, Philippines- Nabulabog ang mga residente matapos tumagas ang ammonia sa isang planta ng yelo sa Navotas City, Sabado ng gabi.

Sa report ni PCpl Dandy Sargenton kay Navotas police chief Col. Dexter Ollaging, dakong alas-9 ng gabi nang maganap ang insidente sa Magsimpan Ice Plant and Cold Storage  Inc. na matatagpuan sa kahabaan ng M Naval St., Brgy. NBBS Kaunlaran, Navotas City.

Sa pahayag sa pulisya ni Roey Ganzo, nasa hustong gulang at in-charge maintenance ng naturang planta ng yelo, habang naglilinis siya ng natitirang liquid sludge nang mapansin niya ang malakas na amoy ng ammonia sa loob ng residential area ng nasabing ice plant.

Kaagad silang umalis sa loob ng naturang lugar saka humingi ng tulong sa nagpapatrolyang mga tauhan ng Navotas police.

Mabilis namang rumesponde sa naturang lugar ang Navotas Police Sub-Station 4, at Navotas Bureau of Fire Protection (BFP) sa pangunguna ni F/Insp. Gabriel Trinidad.

Ayon sa mga awtoridad, wala namang napaulat na nasaktan o nasawi sa nasabing insidente habang ayon kay BFP investigator SFO2 Junie Bert Mendoza patuloy ang kanilang further imbestigasyon sa nasabing insidente. Boysan Buenaventura