Imbestigasyon sa chicken mami food poisoning sa Tondo, ikinasa ng Manila LGU

Imbestigasyon sa chicken mami food poisoning sa Tondo, ikinasa ng Manila LGU

July 21, 2022 @ 6:12 PM 3 weeks ago


MANILA, Philippines- Iniimbestigahan na ng Manila Health Department (MHD) ang napaulat na food poisoning na nagbunga ng pagkamatay ng isa at pagkakadala sa pagamutan ng 15 pa Miyerkules ng hapon sa Tondo, Maynila.

Ayon kay MHD City Epidemiology and Surveillance Unit (CESU) chief Dr. Jesse Bermejo, nakakolekta na sila ng pagkain na hinihinalang dahilan ng pagkakalason upang ipasuri sa laboratoryo batay na rin sa pakikipag-ugnayan nila sa Department of Health (DOH) Regional Epidemiology Surveillance Unit, Research Institute for Tropical Medicine (RITM) and Philippine National Police (PNP).

Natanggap aniya nila ang ulat ng food poisoning mula sa DOH Regional Office dakong alas-2:30 ng hapon kaya’t kaagad silang nagpadala ng isang grupo sa Tondo Medical Center upang kumolekta ng pagkain na kanilang isinumite para sa laboratory analysis.

Sa kanilang panayam sa mga isinugod na pasyente, dakong alas-10 ng umaga nang kumain sila ng itinitindang chicken mami sa isang maliit na karinderiya sa bangketa sa 392 Gapan St Earnshaw, Gagalangin, Tondo, Brgy. 172 at makaraan ang tatlong oras ay nakaramdam na sila ng pagkahilo, pananakit ng ulo at pagsusuka na sintomas ng pagkalason.

Umabot sa kabuuang 16 na katao ang isinugod sa naturang pagamutan, kabilang ang mag-asawang nagbebenta at nagluluto ng chicken mami, kung saan isang person with disability (PWD) na naklalang si Josefina Manila, 43, ang nasawi habang nilalapatan ng lunas.

Sa pahayag ng MHD at ng Pamahalaang Lungsod ng Maynila, nakikisimpatiya sila sa mga naapektuhang pamilya sa naturang trahedya na nagbunga ng pagkamatay ng isang babae. Nakikidalamhati sila sa pamilya ng nasawi dahil sa maagang pagpanaw sanhi ng insidente.

Kaugnay nito, nagsimula namang mamahagi ng food packs sa mga apektadong pamilya ang tanggapan ng Manila Department of Social Welfare (MDSW) bilang suporta sa kanilang sinapit na karanasan.

Sinabi ni MDSW Director Maria Asuncion “Re” Fugoso na inatasan na rin sila ni Mayor Honey Lacuna-Pangan na kung kinakailangan ay bigyan ng tulong pinansiyal ang mga biktimang nananatili pa sa pagamutan upang matiyak ang kanilang kaligtasan. Handa rin ang MDSW na magbigay ng kaukulang tulong sa pamilya ng nasawi para sa pagpapalibing sa kanilang mahal sa buhay.

Samantala, nagpahatid na ng tulong pinansiyal si 2nd District Congressman Rolan Valeriano para sa mga mga ka-distrito nitong nalason sa chicken mami ng nasabing barangay.

Nabatid kay Valeriano, personal nitong pinuntahan ang nasawing biktima upang matulungan ang pamilya nito gayundin ang mga biktima na kasalukuyang nagpapagaling pa sa pagamutan. JAY Reyes