Inangkat na sibuyas, nasa Pinas na; presyo inaasahang bababa

Inangkat na sibuyas, nasa Pinas na; presyo inaasahang bababa

January 23, 2023 @ 12:06 PM 2 weeks ago


MANILA, Philippines- Dumating na sa bansa ang mga sibuyas na inangkat ng pamahalaan kamakailan, ayon sa Bureau of Plant Industry, at sa mas maraming suplay, marami ang umaasang bababa na ang presyo nito, base sa ulat nitong Lunes.

Umaasa ang marami na maisasakatuparan ang pahayag ng Department of Agriculture (DA) na bababa sa P80 kada kilo ang presyo ng sibuyas.

Subalit dahil wala pa sa pamilihan ang mga sibuyas at sumasailalim pa sa inpeksyon, wala pa ring pagbabago sa presyo nito hanggang ngayong Lunes.

Nitong buwan, pinayagan ng DA ang pag-aangkat ng 21,060 metric tons ng sibuyas para punan ang supply gap at kontrolin ang patuloy na pagtaas ng presyo nito sa merkado.

Sa liham sa Bureau of Plant Industry (BPI)-licensed onion importers na may petsang January 6, inihayag ng DA na magpapalabas ito ng sanitary and phytosanitary import clearance (SPSIC) para sa importasyon ng fresh yellow at fresh red onion mula January 9 hanggang January 13, 2023.

Binigyan ang licensed importers ng palugit hanggang January 27, 2023 para makarating sa bansa ang shipments.

Narito ang volume na pinayagang iangkat:

  • Fresh yellow onion – 3,960 metric tons

  • Fresh red onion – 17,100 metric tons

 Nauna nang sinabi ni Pangulong Ferdinand “Bongbong” Marcos Jr. na “our government had no choice but to import,” dahil sa gap sa pagitan ng production at ng demand para sa sibuyas sa Pilipinas.

“Given the production and demand we have in the Philippines, it’s impossible to avoid imports. We’ve tried to get products from smuggling, but the need was still not met. We had no choice but to import, so that’s what we’re doing,” ani Marcos, na siya ring Agriculture secretary. RNT/SA