MANILA, Philippines – Patay ang isang hinihinalang suspek sa pagnanakaw nang makipagpalitan ito ng putok sa pulistya sa Brgy. Ligtong, Noveleta, Cavite.

Sa ulat, kinilala ang biktima na si Alben Robert Herrera, 18 anyos, binata nakatira sa Brgy. Malainen, Naic, Cavite.

Base sa report, nakipag-ugnayan ang Maragondon Municipal Police Station (MPS) sa Noveleta MPS para sa pag-aresto kay Herrera na suspek sa ilang serye ng robbery incidents sa Maragondon matapos na nakatanggap ng tawag na nagtago ang suspek sa Brgy Ligtong, Noveleta, Cavite.

Agad na nagsagawa ng operasyon ang kapulisan ganap na alas-10:45 ng gabi kung saan namataan ang suspek sa Brgy Salcedo II, Noveleta, nasabing lugar, at dito na nakipagpalitan ng putok ang suspek kung kaya’t gumanti ang mga operatiba.

Tinamaaan sa leeg ang suspek na nagresulta ng kanyang kamatayan.

Narekober kay Herrera ang isang isang Glock 17 pistol na baril, tatlong basyo at isang cellphone. Margie Bautista

CAGAYAN DE ORO CITY – Sa loob lamang ng buwan ng Marso ay nakakumpiska ang Police Regional Office (PRO) 10 (Northern Mindanao) ng pinaniniwalaang shabu at plantasyon ng marijuana na may tinatayang P2.2 milyon na street value.

Sa pahayag ng PRO-10 nitong Huwebes, Marso 30, ang pinakahuli nilang nakumpiskang shabu na nagkakahalaga ng P737,800 ay sa bayan ng Maramag at Valencia sa Bukidnon.

Nitong Miyerkules, ang operatiba ng Bukidnon Provincial Drug Enforcement Unit ay nahuli ang isang Orlando Obial, nasa 6th most wanted drug personality sa bayan ng Maramag.

Nakuha kay Obial ang shabu na may halagang P329,000 at iba pang drug paraphernalia.

Samantala, ang PRO-10 Special Operations Unit – Provincial Drug Enforcement Group naman ay binunot at sinunog ang higit sa P1.5 milyon halaga ng 7,500 pananim na marijuana sa Barangay Guinuyoran, Valencia City noong Marso 24 habang nakatakas ang suspek.

Nagbabala naman si Gen. Lawrence Coop, PRO-10 director, sa cultivators na itigil na nila ang pagtatanim ng marijuana na labag sa ilalim ng batas Republic Act 9165 o angComprehensive Dangerous Drugs Act of 2002.

Nakasaad sa batas sa sinumang lumabag ay makukulong habambuhay at magbabayad ng halaga mula P500,000 hanggang P10,000,000.

Sinabi pa ni Coop na kamakailan, ang mga operatiba ng anti-narcotics ay nadakip si Christopher Lorenzo ng Barangay Carmen.

Narekober kay Lorenzo ang P408,000 halaga ng shabu. Mary Anne Sapico

MANILA, Philippines – Magpapakalat ng mahigit 77,000 pulis ang Philippine National Police (PNP) sa mga lugar na daragsain sa panahon ng Semana Santa.

Sa pahayag nitong Biyernes, Marso 31, sinabi ng PNP na 38,387 police officers ang ipinakalat para sa dagdag na presensya ng mga pulis sa pamamagitan ng mobile at foot patrol.

Ang 39,504 naman sa mga ito ay itatalaga sa itinuturing na areas of convergence, katulad ng mga pangunahing kalsada, transportation hubs, terminal, commercial areas at mga simbahan.

Magmamando ang mga ito sa police assistance desks at hubs upang tumugon sa reklamo ng publiko.

“We are expecting a large number of people to travel, especially during the Holy Week, and we want to make sure that they will have a safe and enjoyable experience,” sinabi ni PNP chief Police General Rodolfo Azurin Jr.

Maliban dito, palalakasin din ang checkpoint operations maging ang regular inspections.

Magpapatuloy din ang pagpapalakas ng kampanya laban sa illegal na droga, sugal at iba pang kriminalidad.

“We call on the public to cooperate with us and follow the rules and regulations set by the government to deter the occurrence of crimes,” ani Azurin.

Ngayong taon ay inilunsad ng PNP ang taunang “Ligtas Sumvac (Summer Vacation) 2023” campaign bilang paghahanda sa pagdagsa ng mga turista at deboto sa Semana Santa. RNT/JGC

MANILA, Philippines – Sa bisa ng search warrant ay nasamsam ng NBI-Task Force Against Illegal Drugs (TFAID) ang iligal na droga na aabot sa humigit-kumulang na P32 milyon at naaresto ang Syrian national sa naturang operasyon.

Ayon sa NBI, nakatanggap ito ng inisyal na impormasyon na isang MHD Alaadin Qwiader a.k.a Alaa L. Qweider ang nagbebenta ng mga iligal na droga, cocaine, high grade marijuana o kush at ecstasy—kadalasan ay sa area ng National Capital Region at kanyang bar sa Makati City.

Sa nasabing operasyon, nasamsam ang 8,681 gramo ng high-grade marijuana o kush, 511.5339 gramo ng cocaine, 4,512 tablet ng ibat-ibang hugis at kulay ng hinihinalang ecstasy.

Narekober din ang isang 9MM, magazine at 50 piraso ng bala.

Samantala, nagpositibo rin sa drug test ang suspek sa paggamit ng cocaine.

Kakasuhan ng paglabag sa Comprehensive Dangerous Drugs Act of 2002 ang dayuhan at Comprehensive Law on Firearms and Ammunitions sa City Prosecutor’s Office ng Mandaluyong City. Jocelyn Tabangcura-Domenden

Bulacan – Kalunos-lunos ang sinapit ng batang lalaki na siyang bunso sa magkakapatid matapos bawian ng buhay nang malunod ito sa ilog sa bayan ng Pulilan.

Sa Facebook post ng Pulilan MDRRMO, kinilala ang biktimang 14-anyos, residente Brgy. Lumbac ng naturang bayan.

Ayon sa Facebook post ng naturang tanggapan nitong Huwebes, Marso 30, ang biktima ay nalunod sa Tibag river.

Nang matagpuan ng mga rescuer ang katawan ng biktima ay agad itong dinala sa pinakamalapit na ospital subalit namatay na ito.

Tumanggi naman magbigay ng iba pang karagdagang impormasyon sa nangyaring insidente ang naturang tanggapan.

Samantala, napag-alaman naman sa Facebook post ng ilang netizen na kada-taon ay may nalulunod sa naturang ilog.

Bumuhos naman ang pagdadalamhati at pakikiramay ng mga netizen na nakakakilala sa biktima na sinasabing bunsong anak at sidekick ng amang fishball vendor. Dick Mirasol III