Iniulat na vaccine wastage ng PH gov’t, ‘underdeclared’ – Garin

Iniulat na vaccine wastage ng PH gov’t, ‘underdeclared’ – Garin

December 1, 2022 @ 5:36 PM 2 months ago


MANILA, Philippines- Sinabi ni Iloilo Rep. Janette Garin na hindi katanggap-tanggap ang milyon-milyong nasayang na COVID-19 shots dahil sa pagtataya niya ay higit pa umano ang  totoong bilang nito sa iniulat ng pamahalaan.

“It’s not acceptable and I believe the estimate that’s been given is actually underdeclared,” tani dating health secretary nitong Huwebes.

Base sa nakalap niyang datos, sinabi ni Garin na 55 million doses ang nasayang. Inihirit din na 31 million doses ang isailalim sa shelf life extension subalit inaasahang mapapanis din, aniya.

Nauna nang iniulat ng Department of Health (DOH) na mahigit 31 million doses ng COVID-19 shots na nagkakahalaga ng halos ₱15.6 billion ang nasayang. Sa bilang na ito, inihayag ni DOH officer-in-charge Maria Rosario Vergeire na 24 million ang expired o malapit nang ma-expire, at 7 million ang nasayang dahil sa ibang dahilan gaya ng temperatura, kalamidad at opened vials. 

Samantala, 10% hanggang 15% ng expired shots ang naka-“quarantine” dahil hinihintay pa ng DOH angd desisyon ng manufacturers sa pagpapalawig ng shelf life ng mga ito, ayon kay Vergeire.

Sa kasalukuyan ay wala pang komento ang DOH ukol sa pahayag ni Garin.

Para kay Garin, hindi na dapat maulit ang wastage lalo na at kailangan nang bumili ng bivalent vaccines upang maprotektahan ang publiko mula sa bagong highly transmissible COVID-19 variants.

“In vaccination, you have to take advantage of the desire of the people… kung may namatay or maraming nagkakasakit, doon gustong gusto ng maraming tao magpabakuna and that window should not be missed. We should not be imprisoned in academic debates. We also have to look at the bigger picture of the implementation of the program,” giit ni Garin.

Hinikyat din niya ang health authorities na agad na bumuo ng mga alituntunin kung sino ang dapat turukan ng bivalent shots, sino ang dapat magbakuna nito, at kung papayagan ang pribadong sektor na bumili para sa mga empleyado nito. RNT/SA