Jane, nag-throwback sa pagdildil ng asin!

Jane, nag-throwback sa pagdildil ng asin!

August 19, 2022 @ 7:20 PM 1 month ago


Manila, Philippines – Akala lang natin na sa pelikula lang makikita ang isang mahirap na pamilyang nagdidildil ng asin.

O ‘di kaya’y nilalagyan ng toyo’t mantika ang kanin bilang ulam.

Pero nangyari na ito sa buhay ni Jane de Leon.

Bahagi ng interbyu sa kanya ni Ogie Diaz ay sumentro noong mga panahong namulat si Jane sa kahirapan.

May dating kasosyo raw sa negosyo ang kanyang ama, pero naloko ito.

Hanggang sa nawalan na raw ito ng ganang magtrabaho at naging house husband na lang.

Hindi rin daw sapat ang kinikita ng kanyang ina.

Umabot sa puntong ipinangungutang daw ng ina ni Jane ang pagluwas nila ng Maynila.

Baka nga naman narito ang kanilang suwerte.

Maraming sakripisyo ang pinagdaanan ni Jane bago narating ang kinalalagyan niya ngagon.

Naroong sa studio na ng ABS-CBN na siya nagpapalipas ng gabi o sa 24-hour convenience store na malapit para hindi ma-late sa tuwing meron siyang showbiz commitment.

Magandang pagkunan ng inspirasyon ang buhay ng bagong Darna.

Mas nanamnamin niya ang tagumpay mula sa kanyang nakaraan. Ronnie Carrasco III