Joey, inokray si Alex!

Joey, inokray si Alex!

December 24, 2022 @ 3:00 PM 1 month ago


Manila, Philippines – Sa grand mediacon ng MMFF entry na “My Teacher”, aminado si Joey de Leon na na-miss niya ang paggawa ng pelikula.

Huling movie kasing nagbida siya ay sampung taon na ang nakakaraan bagama’t lumalabas naman siya with limited roles sa ilang pelikula at TV specials sa Eat Bulaga noon.

Ayon sa beteranong actor at TV host, sa kanyang itinagal sa industriya, sobrang enjoy daw siya sa pagiging actor.

Hirit pa niya, isa raw ang pag-arte sa pinaka-fulfilling na propesyon.

“Pinakamasarap na trabaho, eh,” ani Joey. “Huwag na ‘yung sikat ka, huwag na ‘yung malaki ang kita mo, marami kang nami-meet na mga idols mo at mga tao,” dugtong niya.

Gayunpaman, may kaakibat din daw namang downside ang kanyang pinasok na trabaho base sa kanyang mga naging karanasan.

Isa na raw dito ang kapag nale-late o nagpri-primadonna ang kanyang mga katrabaho.

Dahil updated siya sa mga tsika, ikinonek pa niya ito sa nangyaring kontrobersya between Alex Gonzaga at Dina Bonnevie kung saan tinalakan diumano ng huli ang una sa TV series na pinagsamahan nila noon.

“Sa akin, ‘yung sa time, eh. Sabi nga nila, nang-aaway sila pag may nali-late,” aniya sabay-tingin kay Toni, “’yung kapatid mo, nabasa ko na naman. Luma na nga, eh. Si Mareng Dina. Pinag-umpisahan nu’n, sa time, ‘di ba?” pahabol ni Joey.

Hirit pa niya, panis daw kung tutuusin ang nangyari kina Alex at Dina, dahil nang mag-walk out daw siya dahil sa attitude ng kanyang co-stars, ipinasara niya mismo ang show.

“Sabi ko, ‘wala ‘yan.’ Ako, matindi ako, pag may nali-late, nilalayasan ko ‘yung show, pinapasara ko,” aniya.

“Pinasara ko ‘TODAS’”

Kinuwento niya ang dati niyang show na “TODAS” sa Channel 13 na natigil dahil sa kanya.

“Nagalit ako dahil na-late ‘yung ibang cast. Sabi ko, ‘tigilan na natin ‘to.’ Napatigil ko ‘yung show, wala silang magawa. Sabi ko, ‘kaya wala ‘yan,’ ‘yang mga away-away na ‘yan sa late. Nangyayari talaga ‘yan,” pagbabalik-tanaw niya.

Dagdag pa niya, dapat sa mga artista raw ay alam nila ang kanilang responsibilidad hindi lang sa kanilang trabaho kundi sa mga taong makaka-work nila.

“At saka, ang importante, ‘yung time. On time ka dapat. ‘Wag mo sayangin ang oras mo at ng iba,” payo pa ni Joey.

Si Joey ay gumaganap na Solomon, isang senior citizen na estudyante sa San Roque National High School na hindi naging hadlang ang edad para matupad ang pangarap niya na makapagtapos ng high school.

Mula sa produksyon ng TinCan Films, Ten17P at Godfather Productions ni Joed Serrano at sa direksyon ni Paul Soriano, ang “My Teacher” ay unang pagsasama nina Joey de Leon at Toni Gonzaga sa isang pelikula.

Tampok din sa pelikula sina Loisa Andalio, Ronnie Alonte, Rufa Mae Quinto, Carmi Martin, Kakai Bautista, Pauline Mendoza, Kych Minemoto, Hannah Arguelles at Isaiah Dela Cruz.

An official entry to the 2022 MMFF, mapapanood na ang pelikula simula sa Disyembre 25,Araw ng Pasko sa mga sinehan sa buong bansa. Archie Liao