MANILA, Philippines – Hindi bababa sa 446,696 aktwal na kaso ng tuberculosis sa bansa ang naiulat noong 2022, sinabi ng Department of Health (DOH).

Sinabi ni DOH officer-in-charge Maria Rosario Vergeire sa paglulunsad ng Philippine Acceleration Action Plan for Tuberculosis na ang natukoy na aktwal na kaso noong 2022 ay partial lamang at mayroong kabuuang 447,696 detected o notified sa pamamagitan ng reporting system noong 2022.

Pahayag ni Vergeire, nakaapekto ang COVID-19 sa iba pang programa sa kalusugan kabilang ang Tuberculosis program ng Kagawaran.

Ayon sa World Health Organization, ang tuberculosis ay sanhi ng bacteria (Mycobacterium tuberculosis) na kadalasang nakakaapekto sa baga ngunit kumakalat din sa iba’t ibang organ ng katawan. Ang tuberculosis ay nalulunasan at naiiwasan.

Maaring maikalat ang sakit mula sa isang tao at maaring makapanghawa ng 10 hanggang 20 indibidwal sa isang bahing kapag mataas ang baccili sa loob ng katawan.

“Kapag ikaw naggamot in that two weeks of intensive… yung risk mo makapanghawa ay mababang mababa na. Kaya meron tayong intensive treatment for the first two weeks,” saad ni Vergeire.

Nauna nang sinabi ng DOH na nasa 700,000 Pilipino sa buong bansa ang nagkakaroon ng tuberculosis bawat taon.

Sinabi naman ni Dr. Ronald Allan Fabella, Global Fund Advisor ng DOH Disease Prevention and Control Bureau, hindi bababa sa 470,000 Pilipino ang nag-avail ng tuberculosis prevention services noong 2022.

Kabilang sa mga sintomas kapag nagkakaroon ng aktibong tuberculosis ang isang tao ay ubo, lagnat, pagpapawis sa gabi, o pagbaba ng timbang. Jocelyn Tabangcura-Domenden

MANILA, Philippines – Hindi bababa sa 21.6% ng mga batang may edad na zero hanggang 23 buwang gulang sa buong bansa ay bansot, sinabi ng Department of Health (DOH) sa media forum nitong Martes.

Ayon kay DOH officer-in-charge Maria Rosario Vergeire, mula sa zero hanggang 23 months old age range, nasa 12.3% na mga bata ang kulang sa timbang.

“Itong 21.6% ay nagkakaroon ng plateauing kumbaga dahil for the past decade or so, ganito lang naglalaro ang mga pigura ng stunted children dito sa ating bansa. Ibig sabihin hindi nababago and we are not able to move on and progressed or ma-improve natin ito,” sabi ni Vergeire.

Sinabi ni Vergeire na isa sa 10 mga batang nasa paaralan sa buong bansa ay sobra sa timbang, habang isa sa 10 kabataan ay sobra sa timbang o overweight

Samantala, apat sa bawat 10 non-pregnant o non-lactating women ay overweight; tatlo sa bawat 10 lactating mothers ay overweight at apat mula sa 10 kabataan ay overweight o obese.

Sinabi ng opisyal ng DOH na bukod sa isyu sa kalusugan, maraming social determinants o social economic factors na nakakaapekto sa mga pasilidad at nagdudulot ng mga isyung ito.

Ilan sa kadahilan kaya nagiging overweight ay ang madalas na pagkain sa fast-food restaurant at limitadong physical activities na maaaring humantong sa pagdami ng mga  non-communicable diseases.

Ayon kay Vergeire, ang ahensya ay gumagamit ng iba’t ibang mga estratehiya tulad ng mga kampanya sa malusog na pamumuhay, dietary supplementation programs para sa  mga batang kulang sa nutrisyon at bansot, at iba pang mga programa sa iba pang ahensya ng gobyerno upang matugunan ang mga social determinant ng kalusugan. Jocelyn Tabangcura-Domenden

MANILA — Nakapagtala ang Pilipinas ng 983 COVID-19 cases nitong nakaraang linggo, sinabi ng Department of Health nitong Martes.

Mula Marso 6 hanggang 12, isang average na 140 arawang COVID infection ang naitala sa bansa, na 8 porsyento na mas mataas kumpara sa nakaraang linggo.

Sa mga bagong impeksyon noong isang linggo, isang kaso ang itinuring na malubha o kritikal, ayon sa pinakahuling bulletin ng DOH.

Nitong Linggo, 351 na kaso o 9.2 porsiyento ng kabuuang COVID-19 admission ang nasa malubha at kritikal na kondisyon, sinabi ng ahensya.

Hindi bababa sa 265 o 13.4 porsyento ng mga intensive care unit bed para sa mga pasyente ng COVID ang okupado. Ang non-ICU bed utilization rate ay nasa 17.1 percent.

Nitong nakaraang linggo, na-verify din ng DOH ang 58 pang COVID-related fatalities, na binanggit ang late encoding of death information.

Noong Marso 13, ang Pilipinas ay may 9,128 na aktibong kaso ng COVID-19.

Mula nang magsimula ang pandemya, ang bansa ay nakakuha ng 4,078,041 na impeksyon sa coronavirus, kung saan mga 66,217 ang nagresulta sa pagkamatay.

Sa ngayon, nasa 73.9 milyong Pilipino ang ganap na nabakunahan laban sa COVID-19. RNT

MANILA, Philippines – Umabot na sa 86 na kabataan ang nasapul ng kaso ng human immunodeficiency virus (HIV) noong Enero ngayong taon, batay sa datos ng Department of Health (DOH).

Sa datos ng Epidemiology Bureau ng DOH, umabot sa 1,454 kumpirmadong HIV-positive na indibidwal ang naitala noong Enero, pitong kaso ay mga bata na may edad dalawa hanggang siyam, habang 79 na kaso ay mga kabataan na may edad 10 hanggang 19.

Sa mga kabataan, 57 kaso ay 18 hanggang 19 taong gulang; 20 kaso ay 15 hanggang 17 taong gulang; at dalawang kaso ay 10 hanggang 14 taong gulang.

Sinabi ng DOH na halos lahat sa kanila ay nakakuha ng virus sa pamamagitan ng pakikipagtalik, maliban sa isa na walang data sa mode of transmission.

Para sa mga bata, anim ang nakakuha ng HIV sa pamamagitan ng vertical transmission, habang ang isa ay walang data sa mode of transmission.

Mayroon ding 444 na kaso na may edad 15 hanggang 24 na nagpositibo sa HIV. Sa kanila, 96 ang natagpuang may advanced HIV infection.

Tatlumpu’t siyam na pagkamatay din ang naitala ng DOH sa mga taong na-diagnose na may HIV noong Enero.

Halos kalahati o 18 sa mga nasawi ay nagmula sa Central Luzon, National Capital Region, at Northern Mindanao, habang ang iba ay naiulat sa iba’t ibang bahagi ng bansa.

Tinukoy ng DOH na 6,383 na pagkamatay ang naitala sa bansa mula Enero 1984 hanggang Enero 2023, mula sa kabuuang 110,736 na kaso ng HIV.

Sa press briefing nitong Martes, idiniin ni DOH officer-in-charge Maria Rosario Vergeire na lahat, anuman ang kanilang edad, ay maaaring magkaroon ng HIV.

Ipinaliwanag niya na ang pinakakaraniwang sanhi ng HIV sa Pilipinas ay hindi ligtas na pakikipagtalik.

“Hindi na po death sentence ngayon ang HIV katulad noong araw na iniisip ng mga tao na kapag nagka-HIV, wala nang lunas. Hindi kayo nagagamot, pero ‘yung gamot na iniinom niyo can maintain and sustain your life and you will be productive hanggang sa matagal na matagal na panahon,” aniya pa. RNT

MANILA, Philippines – BILANG bahagi pa rin ng pagdiriwang sa National Women’s Month ngayong Marso, ipinahayag ng Philippine Health Insurance Corporation (PhilHealth) na ang mga kababaihang manganganak ay maaaring makakuha ng iba’t ibang benepisyo mula sa PhilHealth.

“Mayroon po tayong iba’t-ibang packages na maaring i-avail ng ating expectant mothers kasama na ang Maternity Care Package (MCP), Normal Spontaneous Delivery (NSD) Package, at Antenatal Care Package (ACP),” ani PhilHealth acting president at chief executive officer Emmanuel R. Ledesma, Jr.

Ipinaliwanag ni Ledesma na ang MCP ay isang benepisyo na sumasaklaw sa kumpletong mahahalagang health care services para sa mga babaeng manganganak sa panahon ng antenatal, panahon ng pag-labor, normal na panganganak, at agarang post-partum period, kabilang ang mga follow-up check-up sa loob ng 72 oras at isang linggo pagkatapos ng panganganak.

“This package may be availed in hospitals for a case rate of P6,500 or in infirmaries, dispensaries, birthing homes, and maternity clinics for an P8,000 case rate,” dagdag pa ni Ledesma.

Nabatid kay Ledesma na 40% ng case rate ay ilalaan para sa professional fees habang ang natitirang 60% ay para sa facility fee.

Samantala, ang NSD package naman ay sumasaklaw sa essential health services para sa normal low risk vaginal deliveries at post-partum period sa loob ng unang 72 oras at 7 araw pagkatapos ng panganganak.

“Bukod sa normal spontaneous delivery, covered din po caesarian section, complicated vaginal delivery, breech extraction, at vaginal delivery after caesarian section sa ating accredited hospitals,” paliwanag ni Ledesma.

“Ang case rate po ng caesarian section ay P19,000, P9,700 kung complicated vaginal delivery, at P12,120 kung sa breech delivery at vaginal delivery after caesarian section,” dagdag pa ng opisyal.

Bukod dito, sinabi ni Ledesma na ang mga nanay na gustong magsagawa ng family planning pagkatapos manganak ay maaari ding gumamit ng post-partum intrauterine device (IUD) insertion, na saklaw din ng state insurer.

“The case rate of IUD insertion insertion is P2,000, which may be claimed as a second case rate,” ani Ledesma.

“Maaari po itong i-avail sa accredited health care institutions, kasama na ang birthing homes, lying-in o maternity clinics, at infirmaries/dispensaries,” ayon pa kay Ledesma. RNT