MANILA, Philippines – Matatag katulad ng isang bato, ang alyansa ng Pilipinas at Estados Unidos.

Ang pahayag na ito ni Foreign Affairs Secretary Enrique Manalo nitong Biyernes, Pebrero 3 ay kasunod ng pakikipagkita niya kay US Defense Secretary Lloyd Austin, na bumisita dito sa bansa.

“I had a very good first meeting with [Defense Secretary] Austin. There’s no doubt—PH-US Alliance is rock solid,” tweet ni Manalo.

“We identified key initiatives to improve mutual understanding of our priorities & challenges and to strengthen our relationship in ways that would secure our peoples,” dagdag pa niya.

Samantala, iginiit ni Austin na nananatiling determinado ang US na suportahan ang regional peace at prosperity sa Indo-Pacific region.

“We deeply value our ironclad alliance & working shoulder-to-shoulder with such an indispensable ally & friend,” sinabi naman ni Austin, sa pamamagitan ng kanyang tweet.

Matatandaan na kasabay ng pagbisita ni Austin, nagkasundo ang bansa at US na magtayo pa ng apat na karagdagang Enhanced Defense Cooperation Agreement (Edca) sites.

Sinabi naman ng Department of National Defense na, “expansion of the Edca will make our alliance stronger and more resilient and will accelerate the modernization of our combined military capabilities.”

Samantala, sinabi naman ng China na ang mga aksyong ito ng US ay maaari lamang magpalala ng tensyon sa rehiyon. RNT/JGC

MANILA, Philippines – Swak sa selda ang isang lalaki matapos ireklamo ng pagdukot at panghahalay sa isang 12-anyos na dalaginding sa Navotas City, kamakalawa ng gabi.

Nahaharap sa kasong Abduction at Statutory Rape ang naarestong suspek na kinilala bilang si Danilo Dipay alyas “Dandan”, 28 ng M. Abiola Street, Tangos South, Navotas City.

Ayon sa Women’s and Children Protection Desk (WCPD) ng Navotas police, alas-7:00 ng gabi noong Pebrero 2 nang personal na magtungo sa kanilang opisina ang ina ng biktimang itinago sa pangalang “Juvy” at naghain ng kanyang reklamo na ang kanyang anak ay dinukot at sekswal na inabuso umano ng suspek.

Ipinaalam ng WCPD duty investigator sa barangay at mga tauhan ng San Roque Sub-Station 2 ang pangyayari na agad namang nagsagawa ng follow-up operation na nagresulta sa pagkakaaresto sa suspek dakong alas-9 ng gabi sa Dike Abiola, Tangos South.

Lumabas sa inisyal na imbestigasyon ng pulisya, dinala ng suspek ang biktima sa kanyang bahay at doon ay sekswal umanong inabuso sa pamamagitan ng pagpilit sa nene na makipagtalik sa suspek kung saan umabot umano sa humigi’t kumulang 18 oras na hawak ng lalaki ang biktima. Boysan Buenaventura

MANILA, Philippines – Sinupalpal ng Makabayan bloc ang kasunduan na pagdaragdag ng apat na bagong Enhanced Defense Cooperation Agreement (Edca) sites sa bansa.

Anang mga mambabatas, ang kasunduang ito ay lalo lamang magtutulak sa bansa na maipit sa pagitan ng Estados Unidos at China.

“This is an alarming flashpoint in America’s military expansionism in Southeast Asia, which brings the country and whole Association of Southeast Asian Nations (Asean) region closer to instability and further places the Philippines deeper in the midst of US-China tensions,” pahayag ni Rep. Arlene Brosas ng Gabriela Women’s Party nitong Biyernes, Pebrero 3.

Sinita rin ni Brosas ang mainit na pagtanggap ng Pilipinas kay US Defense Secretary Lloyd Austin III na tila ba isinusuko pa ng bansa ang soberanya nito upang suportahan ang geopolitical interest ng US kapalit ang pautang, donasyon at military financing.

Samantala, sinabi naman ni Alliance of Concerned Teachers Party Rep. France Castro na ginagawa lamang “launching pad” ng US ang Pilipinas kung sakaling magkaroon ng giyera sa pagitan ng China.

“Nasa gitna tayo ng dalawang parang nag-uumpugang bato at ang mamamayang Pilipino ang talagang magiging apektado rito…Kapag nagkaroon ng girian ang China at US, tayo po ang kawawa,” pagbabahagi pa niya sa isang news conference.

Sinupalpal din ni Rep. Raoul Manuel ng Kabataan Party, ang tila paglalagay ni Pangulong Ferdinand Marcos Jr. sa bansa sa mahirap na posisyon.

“Imbis na tiyakin na hindi maipit ang Pilipinas sa girian ng dalawang imperyalistang bansa, parang hinahanapan ng Marcos Jr. na maging war zone ang ating kapuluan. Lalong binibitag niya ang mga kabataan sa bingit ng digma,” sinabi ni Manuel.

Ipinunto rin niya na ang pagpapalakas sa US-Philippine military ties ay gagamitin lamang para sa pagsupora sa counter terrorism efforts ng pamahalaan target ang mga Filipino na kritikal sa gobyerno.

“We appeal to the conscience of US lawmakers to work towards stopping US government support in cooperation with counter terrorism skims of the Philippine government,” ani Manuel. RNT/JGC

MANILA, Philippines – Sapul ng mababang farmgate prices ng sibuyas ang mga magsasaka, kasunod ng pagdating ng mga inangkat na produkto mula sa ibang bansa.

Ayon kay Samahang Industriya ng Agrikultura (SINAG) President Rosendo So nitong Biyernes, Pebrero 3, ang presyo ng puting sibuyas ay bumagsak sa P70 hanggang P90 kada kilo mula sa dating P700 kada kilo.

“Ang puting sibuyas yesterday ano eh, nasa P70-90 ang puting sibuyas. Ito’y nasa Bongabon area, in Nueva Ecija, itong pula is tumatakbo as P170-P190 ang tumatakbong presyong yesterday,” pagbabahagi ni So sa panayam ng TeleRadyo.

Sa kabila ng pagbaba sa presyo ng sibuyas, umaaray naman ang mga magsasaka dahil sa mababang farmgate prices dahil sa suplay.

“Siyempre ngayon lang po sana kami makakatikim ng magandang presyo kaso, ang ginawa naman ng (Department of Agriculture), sinabayan kami sa importation. Masakit po yun,” sinabi naman ni James Ramos, administrator ng Facebook page na Onion Farmers Philippines.

“For more than 30 years ngayon lang po sana makakatikim ng magandang kita mga farmers. Pero, hinadlangan ng DA dahil doon sa importation na yan.”

Idinagdag ni Ramos na hindi man lamang kinonsulta ang mga magsasaka bago pa mag-angkat ng sibuyas.

“Yun po ang masakit eh, hindi man lang kami kinonsulta na mga farmers. Walang consultation na nangyari before sila nag-apruba ng imported,” giit niya.

“Panawagan po sana naming sa DA na, kung maaari, pag-aralan mabuti, konsultahin kaming magsisibuyas bago sila mag-approve ng importation. Alam niyo sa totoo lang maganda yung proyekto ng pangulo na wag sana magpapasok ng imported.”

“Kaso ang DA, ugali na niyan, hindi namin alam, kahit sinong umupo dyan na secretary, pero nasa loob po yung ano eh, nasa loob po talaga yung bulok na sistema,” pagpapatuloy nito.

Sa ngayon ay umaasa na lamang si Ramos na tutulungan ng pamahalaan ang mga magsasakang katulad niya.

“Kahit sana man magbigay man lang ng gaya ng yumaong ama ng ating pangulo noon, na nagbibigay ng ayuda sa mga farmers like yung mga boto, atsaka mga pataba.,” dagdag niya. RNT/JGC

MANILA, Philippines – Target ng pamahalaan na maglabas ng euro-denominated bonds batay na rin sa hiling ng mga mamumuhunan, sinabi ni Finance Secretary Benjamin Diokno nitong Biyernes, Pebrero 3.

“When we were in Frankfurt, sabi ng mga taga Germany, bakit hindi Euro naman. So we are considering that. Wala pa naman, but I am sure there will be strong demand especially among the seniors. Marami silang pera,” ani Diokno kasabay ng pagpupulong ng Makati Business Club.

“Hindi lang mga OFW, pero mga Filipino Germans who want to invest in our country, and participate. Kasi mataas ang return na ino-offer namin, tapos tax free pa,” dagdag pa niya.

Matatandaan na nauna nang inanunsyo ng Bureau of Treasury na mag-aalok sila ng US dollar-denominated retail treasury sa Abril.

Maglalabas din ang bansa ng 5-year retail treasury bond sa Pebrero 7 na layong magkaroon ng kita ng nasa P30 bilyon para bayaran ang kasalukuyang utang.

“I think the rates are kind of coming down because of renewed confidence. Let’s see what the market will bear. We floated, the most recent was the $3 billion, that was well received, many times over ang demand. We expect the same,” sinabi pa ni Diokno.

Idinagdag din niya na sa pinakahuling rate hike ng US Federal Reserve na mas mababa kaysa sa inaasahan, sinabi nito na “good news” ito para sa Pilipinas.

“It is good news as far as we are concerned. Instead of 50 bps, it is 25 bps. Again the BSP is data dependent, we will look at the data, we will look at inflation. We have a strong growth rate, it will be decided upon by the Monetary Board,” pagbabahagi ni Diokno.

Magsasagawa naman ng policy-setting meeting ngayong buwan ang Bangko Sentral ng Pilipinas. RNT/JGC