‘Kapag napuno ang salop’

‘Kapag napuno ang salop’

July 13, 2018 @ 6:40 AM 4 years ago


 

Tulad ng pamagat ng pelikula ng yumaong Fernando Poe Jr. na “Kapag Napuno ang Salop” dumarating ang pagkakataon sa buhay ng tao kung kailan ang kinikimkim na labis na galit at pag-aalala ay pahirap nang pahirap na kontrolin hanggang sa mapuno at pakawalan niya ang umaapaw na poot.

Kamakailan ay lumabas ang news footage na nagpapakita sa isang opis­yal ng United States na tumatalakay sa ginagawa ng China sa Spratly Islands kabilang na ang pagbuo ng mga artipisyal na isla, pagtatayo ng lalapagan ng eroplano, militarisasyon ng lugar at ha­yagang pagbalewala sa desisyon ng United Nations arbitration court na nagsasabing ang maka­saysayan umano nilang “nine-dash claim” ay hindi totoo.

Ang Pilipinas at Vietnam ay kapwa sumisigaw ng “foul” sa pama­mayagpag ng China sa mga lugar na matatagpuan sa loob ng kanilang exclusive economic zones na idineklara pa ng United Nations Convention on the Law of the Seas.

Ang mga mangingisda ay nabu-bully at pinagsasamantalahan ng mga miyembro ng China Coast Guard na lumalapit sa mga bangka ng mga Filipino sa Panatag Shoal, humihingi o kaya ay kumukuha na lamang ng pinakamaga­ganda sa kanilang mga nahuling isda nang walang anomang permiso.

Hanggang ngayon, hindi makapaniwala at matanggap ng karamihan ng mga Pinoy kung bakit pinayagan ng ating gob­yerno ang China na patuloy na mamayagpag at kontrolin ang ating kara­gatan sa mga nagdaang taon.

Ang problema ay nagsimula sa panahon ni da­ting President Noynoy Aquino na piniling mag-file ng legal na protesta kaugnay ng problema sa Uni­ted Nations.

Ang desisyon na na­resolba ng nasabing arbitration court ay pabor sa atin noong 2016 sa termino ni President Duterte pero patuloy na ipinagpaliban ng Punong Ehekutibo ang pagpapatupad nito dahil  itinuturing niya-ng malapit na kaalyado ang China.

Subalit kung biglang lumala ang sitwasyon at makipagdigmaan ang Amerika sa China dahil sa patuloy na pang-aabuso sa Sprat­lys, ang tanong na maiisip ay kung sino ang susu­portahan ng Pili­pi­nas sa dalawang nabanggit na bansa?

Walang duda na may obligasyon tayo na kumampi sa Amerika dahil may umiiral tayong tratado na nilagdaan noong 1951 na nagsasaad na ang Pilipinas at US ay susuportahan ang isa’t isa sakali mang may dayuhang pa­nanalakay o pananakop.

Pero nananatili ang problema na para kay Duterte, ang China ay mala-pit na kaibigan at  nais    niyang manatili ang magandang relasyon nila ni Chinese President Xi Jinping.

Kung maaari ay nais niyang higit pang mapalakas ang pagkakaibigan nila sa mga darating na taon.

-FIRING LINE NI ROQUE