Kauna-unahang babaeng alkalde ng Maynila, iprinoklama na

Kauna-unahang babaeng alkalde ng Maynila, iprinoklama na

May 12, 2022 @ 8:48 AM 2 weeks ago


MANILA, Philippines – Iprinoklama na bilang bagong alkalde ng lungsod ng Maynila si Vice Mayor Maria Sheilah “Honey” Lacuna-Pangan, na siyang naging kauna-unahang babae na nahalal sa pinakamataas na lokal na posisyon sa lungsod, kagabi ng Miyerkules.

Si Lacuna ay ipinroklama ng Commission on Election (COMELEC) bilang nanalong Alkalde ng nasabing lungsod alas-7:25 kagabi sa Manila City Council Session Hall.

Nakakuha si Lacuna ng 526,054 na boto, higit sa tatlong beses ang bilang ng mga boto na natanggap ng katunggali nito na si Alex Lopez na nakakuha lamang ng 163,292 na boto.

Si Lacuna, na isang doktora at kasalukuyang bise alkalde ng lungsod, ay kumandidato kasama ang katambal nito na si Manila 3rd District Representative Yul Servo Nieto, na iprinoklama na rin kagabi bilang bagong Bise Alkalde ng Maynila makaraang makakuha ng may 573,562 boto.

Si Lacuna ay nagsilbi ng dalawang termino bilang bise alkalde sa ilalim ng dating pangulo at noo’y mayor na si Joseph Estrada noong 2016, at sa ilalim ng kasalukuyang Mayor ng Maynila na si Francisco “Isko Moreno” Domagoso noong 2019.

Siya rin ay anak ng dating bise alkalde na si Danilo Lacuna Sr.

Bukod kina Lacuna at Servo ay iprinoklama din kagabi ang mga nanalong Konsehal at Congressman mula sa anim na Distrito ng lungsod tulad nina 1st District Congressman Ernix Dionisio, 2nd Dist. Rolan Valeriano, 3rd District Joel Chua, 4th Dist. Edward Maceda, 5th Dist. Irwin Tieng, at 6th Dist. Benny Abante na pawang mga nasa ilalim ng partido ng Asenso Manilenyo. JAY Reyes