Kawalan ng pondo ng DepEd sa SPED, pupunan ni Win

Kawalan ng pondo ng DepEd sa SPED, pupunan ni Win

September 22, 2022 @ 10:36 AM 3 days ago


MANILA, Philippines – Titiyakin ni Senador Win Gatchalian na magkakaroon ng pondo para sa edukasyon ang mga learners with disabilities o special education sa ilalim ng 2023 national budget.

Natuklasan ni Gatchalian na hindi inaprubahan ang P523 milyong panukalang badyet para sa SPED sa kabila ng may pinakamalaking pondong nakukuha ang Department of Education (DepEd) alinsunod sa Saligang Batas.

Nauna nang binabatikos si Vice President Sara Duterte sa pagkakaroon ng hiwalay na P150 milyong intelligence funds bukod sa P500 milyong confidential funds sa ilalim ng Office of the Vice President (OVP).

Ayon kay Gatchalian, dapat tiyakin ng pamahalaan ang pagpapatupad ng Republic Act No. (RA) 11650 o ang “Instituting a Policy of Inclusion and Services for Learners with Disabilities in Support of Inclusive Education Act.” Sa ilalim ng naturang batas na nilagdaan noong Marso, lahat ng mga pampubliko at pribadong paaralan ay may mandatong tiyakin na bawat mag-aaral na may kapansanan ay may equitable access sa dekalidad na edukasyon.

Nakasaad din sa batas na walang mag-aaral ang mapagkakaitan ng edukasyon dahil lang sa kanilang kapansanan.

“Maraming paraan upang mabigyan natin ng suporta ang mga kabataang may kapansanan. ‘Yan ang higit na kailangan nila ngayon lalo na’t nagdulot ng malaking hamon sa kanila ang nakaraang higit na dalawang taon ng pandemya ng COVID-19. Titiyakin nating hindi maiiwan ang ating mga mag-aaral na may kapansanan sa pagbangon ng sektor ng edukasyon,” sabi ni Gatchalian.

Binigyang diin ni Gatchalian na ang mga mag-aaral na may kapansanan ay kabilang sa mga lubos na naapektuhan ng pandemya ng COVID-19 at pagsasara ng mga paaralan. Para sa School Year 2021-2022, may mahigit isang daang libong (126,598) learners with disabilities na naka-enroll sa mga DepEd schools, batay sa datos noong Marso 14, 2022. Ito ay mas mababa ng halos pitumpung (65) porsyento kung ihahambing sa mahigit tatlong daang libong (360,879) naitala noong SY 2019-2020.

Mandato ng RA 11650 na magkaroon ng hindi bababa sa isang Inclusive Learning Resource Center of Learners with Disabilities (ILRC) na ipapatayo at patatakbuhin ng bawat lungsod at munisipalidad sa bansa. Makikipag-ugnayan ang DepEd sa pagpapatakbo ng mga ILRCs na ito na magpapatupad ng mga programa para sa inclusive education at maghahatid ng libreng support services sa mga learners with disabilities.

Bawat ILRC ay magkakaroon ng mga multidisciplinary team na bubuuin ng mga ekspertong tulad ng developmental pediatricians, physical therapists, ‘special needs’ teachers, at iba pang allied medical professionals. Ernie Reyes