ISABELA – Agad na isinailalim sa enhanced community quarantine ngayong araw ang buong Ilagan City makaraang magpositibo mismo si Mayor Josemarie Diaz sa coronavirus disease-19.

Bagama’t asymptomatic si Mayor Diaz, minabuti na nitong mag-isyu agad ng Executive Order No. 54 Series of 2020 para sa pagpapairal ng ECQ at pag-lockdown na mismo sa buong City Hall sa loob ng isang linggo mula Agosto 6 hanggang Agosto 12, 2020.

Ang mabilis na pagdami ng nahawaan ng COVID-19 at local transmission nito ang ginawang dahilan para sa pag-iisyu ng nasabing EO 54.

Ayon kay Public Information Officer Paul Cabacungan, nagsasagawa na ng contact tracing ang mga kinauukulan mula sa pamilya ng Punonglungsod hanggang sa mga kasambahay at nakasalamuha nito sa mga nakalipas na ilang araw hanggang ngayon.

Sinimulan na ring isailalim sa swab test ang lahat ng mga opisyal at empleyado ng lungsod, kabilang na ang mga department head at konsehal, na nakasalamuha ng alkalde.

Sa ilalim ng ECQ, istrikto nang ipinatutupad ang stay at home na patakaran at tanging ang mga APOR o authorized person outside residence lamang ang pupwedeng lumabas para sa mga esensyal na pangangailangan ng pamilya ng mga ito.

Marami na ring kompanya at negosyo ang isinara sa lungsod at kasabay nito ang pagbabawal ng paglalako ng alak at pagpapairal ng curfew.

Pinakilos na rin ang mga pamahalaang barangay para ipatupad nang ganap ang ECQ.

Pinapayagan ng Inter Agency Task Force o IATF ang pagdedeklara ng localized community quarantine kapag may nagaganap ng local transmission sa isang lugar. RNT/Fred Cabalbag

Manila, Philippines – Naglahong parang bula ang dalawang nag-viral sa social media na ostrich matapos makitang nakawala o pagala-gala sa isang village sa Quezon City nitong Martes.

Kinumpirma ito ni Department of Environment and Natural Resources (DENR) undersecretary Benny Antiporda matapos na agad rumesponde ang ahensya sa Mapayapa Village III.

“Ang masakit, wala na ‘yung ostrich doon… since wala na ‘yung ostrich ine-establish pa namin kung sino’ng may-ari ng kulungan na ‘yan at kung sino ang pwedeng kasuhan so we’re trying to check on it pa kung ano talaga ang sitwasyon niyan and ‘yung source o pinanggalingan ng ostrich,” ani Antiporda sa panayam ng ABS-CBN News.

Ayon naman kay Ana Cabel, kawani ng QC Veterinary Office, nakausap umano nila ang katiwala ng may-ari ng dalawang ostrich ngunit hindi naman ito umamin sa kinororoonan ng dalawang hayop.

Tanging transport permit lamang mula DENR ang ipinakita nito.

“Nilayo na daw ang ostrich, hindi alam kung saan dinala. Hanggang ngayon hindi nagpapakita ang may-ari, katiwala lang ang nakausap nila.”

Giit ni Antiporda, walang saysay ang transport permit dahil hindi naman nito mapatutunayan ang legalidad ng pagmamay-ari sa naturang mga hayop bagkus ang sadyang kinakailangan ay wildlife permit.

“Kasi transport (permit) ‘yan eh, kailangan from where to where … ang tanong … paano napunta ‘yan (ostrich) sa QC ‘yan? Kaya titingnan din natin sino ang nag-issue ng transport permit na ‘yan,” ani Antiporda.

“As of now wala kaming permittee kaya hinahanap namin ‘yan,” dagdag pa niya.

Patuloy ang isinasagawang imbestigasyon ng dalawang opisina para matunton ang dalawang hayop maging ang mga may-ari nito. RNT

Zamboanga del Norte – Todas ang anim na miyembro ng isang pamilya matapos pagbabarilin at sunugin pa ang kanilang bahay ng grupo ng mga lalaki sa bayan ng Siocon dito.

Kinilala ang mga biktima na sina Carlito Advincula Aban, 60; Aldrin Berdanio Aban, 20; Shannyn Cris Berdanio Aban, 17; Stephen Advincula Aban, 13; at Rosalia Navales Quirit, 45, pawang residente ng Sitio Padaun, Barangay Candiz, Siocon.

Sinabi ni B/Gen Jesus D. Cambay Jr., director ng PRO9, 12:40 ng madaling araw nang mangyari ang pamamaril sa pamilya at panununog sa kanilang bahay sa Sitio Padaun.

Sa ulat, nagawa pang makatawag ni Aldrin sa kanyang kapatid na si Tairon na sinugod ang kanilang bahay ng isang Elpidio Obiniana, alyas Balondong kasama ang ilang ‘di kikilang mga salarin.

Agad nagtungo ang mga awtoridad sa nasabing lugar ngunit nadatnang tupok na ng apoy ang bahay ng mga biktima.

Sa pagsisiyat, natagpuan ng mga pulis ang mga bangkay ng pamilya na pawang may tama ng bala ng baril sa katawan.

Pinaniniwalaan ng mga awtoridad na matagal nang alitan ang motibo ng pagpatay sa pamilya. RNT

Manila, Philippines – Siniguro ng Department of Transportation (DOTr) na abot sa 99 porsyentong proteksyon ang maibibigay sa publiko ng pagsusuot ng face masks, face shields, at physical distancing.

Ito ay base sa datos mula sa 2020 study nina Dans, Herrera, et al., na pinag-aralan at kinalkula ang estimated risk reduction sa pagkakaroon ng COVID-19 habang may suot na face masks, face shields, at physical distancing.

Ipinost naman ng DOTr ang datos sa kanilang Facebook post nitong Huwebes.

Sa pag-aaral:

• Mapabababa ng 93% ang pagkakaroon ng COVID kung ang isang indibidwal ay nakasuot ng face mask, at face shield;

• Habang 94% naman kung may pinatutupad na isang metrong physical distancing habang may suot na mask;

• 97% namang iwas-COVID kapag nagpatutupad ng dalawang metrong physical distancing na may suot na mask.

Dahil dito, napagdesisyunan ng DOTr na mandatoryong pagsusuot ng face shield para sa mga pasahero sa sa pampublikong transportasyon.

 “This being said, starting August 15, the DOTr will require all passengers using any mode of public transportation to wear face shield as an additional ‘armor’ in the fight to prevent this sector from becoming a transmission vector of the virus.” RNT

Manila, Philippines – Sa kabila nang hindi pa kumpletong pamamahagi ng Social Amelioration Program cash aid sa beneficiaries, sinabi ng Department of Social Welfare and Development na handa sila kung sakaling magkakaroon ng ikatlong bugso ng ayuda.

Umugong ang usapin matapos na isailalim muli sa Modified Enhanced Community Quarantine ang Metro Manila at karatig-probinsya dahil sa taas ng kaso ng coronavirus disease.

Dahil dito, tinitignan ang posibilidad na muling pamamahagi ng ayuda sa mahihirap na pamilyang Pilipino.

“Nakasalalay po sa ating mga mambabatas ang pagbibigay ng third tranche ng SAP. Ang Department of Social Welfare and Development (DSWD) ay tagapagpatupad lamang at nakahanda tayong gawin ang mga utos ng mga nakataas sa atin,” ani Social Welfare Undersecretary Rene Glen Paje.

Sa ngayon ay positibo naman ang DSWD na maaabot ang target nitong 100 porsyentong mabigyan ang mga beneficiary ng ikalawang tranche ng SAP hanggang sa kalagitnaan ng Agosto.

Ayon kay Paje na ngayong Agosto 6 ay umabot na sa P66,376,956,700 ayuda ang naipamahagi na sa 10,223,307 pamilya.

Ito ay 72.4% kumpleto na.

 “Tuloy-tuloy po ang pamamahagi ng DSWD ng ayuda sa lahat ng kwalipikadong beneficiaries. Patuloy na nagsisikap ang mga kawani upang matapos ang payouts sa kalagitnaan ng buwang kasalukuyan.” RNT