‘Kun Maupay Man It Panahon’ wagi sa film fest sa Switzerland

‘Kun Maupay Man It Panahon’ wagi sa film fest sa Switzerland

August 15, 2021 @ 3:37 PM 4 months ago


MANILA, Philippines—Nakamit ng pelikulang “Kun Maupay Man It Panahon” ang “Cinema e Gioventù Prize” mula sa Concorso Cineasti del presente Junior Jury ng 74th Locarno Film Festival sa Switzerland.

Inanunsyo ito sa official Facebook page ng pelikula na may international title na “Whether the Weather is Fine” at ibinahagi rin ng head ng Film Development Council of the Philippines na si Liza Dino.

“WOOOOHOOOOO!!! GO PHILIPPINES!!! So proud of you guys! #TEAMFDCP is here to always support. May Tokyo na, may Locarno pa!!! Mabuhay ang pelikulang Pilipino,” ani Dino.

Ang pelikula ay pinagbibidahan nina Charo Santos-Concio at Daniel Padilla sa direksyon ni Carlo Francisco Manatad na nag-world premiere bilang parte ng Concorso Cineasti del Present o Filmmakers of the Present Competition.

Aniya, ito lamang ang nag-iisang pelikula na napiling magpresenta sa PIlipinas sa naturang pista.

Tungkol ang “Kun Maupay Man It Panahon” sa sitwasyon ng bansa matapos hagupitin ng super typhoon Yolanda at nakasentro ang istorya sa isang ina (Santos-Concio) at ang kanyang anak (Padilla) na nagpupumilit makaahon sa hirap at laro ng kapalaran.

Maliban sa pagkapanalo sa Locarno, nakatakdang mapanood sa Toronto International Film Festival ang pelikula sa Setyembre 9. RNT/Riza Guarin-trainee