MANDAUE, Cebu-HINDI inakala ng isang kuya na ang pananakit umano nito sa kinakasama ng kanyang nakababatang kapatid ang magiging sanhi ng kanyang kamatayan matapos pagbabarilin ng huli, Biyernes ng umaga, Disyembre 1 sa lungsod na ito.
Kinilala ang biktimang si Jesomar Estal Impas, 30, binata habang sumuko naman sa pulisya ang suspek kapatid nitong si Alvin Estal Impas, 28, kapwa residente ng Sityo Kalubihan, Barangay Labogon, Mandaue City.
Batay sa report ng Mandaue Police Station 3, bandang 8:30 AM ng maganap ang krimen sa nasabing lugar.
Ayon kay Police Maj. Jade Campo Sumugat, commander ng MPS-3, kinompronta ng suspek ang kanyang kuya hinggil sa ginawa nitong pananakit sa kanyang kinakasama.
Nauwi sa mainitang pagtatalo ang komprontasyon hanggang sa bumunot ng .357 magnum revolver ang batang Impas at pinagbabaril ng limang beses ang kanyang kuya na tinamaan sa iba’t ibang parte ng katawan na naging sanhi ng agaran nitong kamatayan.
Dinala naman sa nasabing himpilan ng pulisya ang suspek para sa tamang disposisyon./Mary Anne Sapico
