Lacson naghain ng reso sa pagkondena sa ‘hostile acts’ ng China sa Ph EEZ

Lacson naghain ng reso sa pagkondena sa ‘hostile acts’ ng China sa Ph EEZ

November 26, 2021 @ 1:22 PM 2 days ago


Manila, Philippines – “Atin ang Pag-asa Island na parte ng Kalayaan Island Group sa West Philippine Sea – at kailangang gumawa ng hakbang ang gobyerno para malabanan ang bullying na ginagawa ng China sa lugar.”

Ito ang laman ng Senate Resolution 954 na inihain ni Senador Ping Lacson matapos ang kanyang pagbisita sa Pag-asa Island sa kanyang kapasidad bilang pinuno ng Senate Committee on National Defense and Security noong Nov. 20.

“Be it resolved, as it is hereby resolved by the Senate, to condemn the continued presence and hostile acts of Chinese Maritime Vessels within our EEZ and urge the government to fortify, amplify and enhance our positions in the West Philippine Sea thru defense and security agreements with other nations, and by consistently invoking and protecting our internationally recognized rights through continuing diplomatic dialogue with nations of mutual/common interests in the West Philippine Sea,” ani Lacson sa kanyang resolusyon.

Nanawagan din siya para sa isang komprehensibong development plan kung saan kasama ang mga kongkretong proyekto para mapaganda ang buhay at masiguro ang pagdadala ng serbisyo publiko sa lugar.

“Resolved further, that in pursuit of sending a stronger message of assertion that Pag-Asa Island is ours, a comprehensive Development Plan must be crafted laying-out concrete projects, programs and activities aimed at improving the quality of life and efficient delivery of public services therein.”

Sa kanyang resolusyon, ibinahagi ni Lacson na ang Pag-asa Island, na bagama’t isang munisipalidad sa Palawan na binigyang bisa ng Presidential Decree 1596 noong June 11, 1978 – ay napaliligiran ng Chinese maritime vessels sa kabila ng ating paulit ulit na diplomatic protests.

Babala rin ni Lacson na kung magpapatuloy ang ganitong gawain ng China, “they may constitute clear and present danger not only to our national interest and territorial integrity but also to the peace and stability of the entire Asia Pacific Region.”

Ani Lacson, noong 1995 ay inangkin din ng China ang Panganiban (Mischief) Reef at ginawa nila itong 550-hectare air and naval outpost na maaaring mag deploy ng military assets at magsagawa ng surveillance sa West Philippine Sea.

Noong 2012, binalewala ng China ang kasunduan para matigil na sana ang gusot sa Panatag Shoal sa pamamagitan ng hindi pag-alis sa lugar. Sa halip ay nagpatayo sila ng mga harang para hindi magkaroon ng access dito ang Pilipinas. Hindi rin tinatanggap ng China ang pagkapanalo ng ating bansa sa arbitral tribunal noong 2016 at patuloy na inookupa at kinukuha ang ating resources sa lugar.

Ang malala pa rito, tatlong Chinese Coast Guard vessels ang humarang at nagpaputok ng water cannon sa dalawang supply boats ng Pilipinas papunta sa Ayungin shoal na pasok sa ating 200-nautical-nile exclusive economic zone (EEZ), noong Nob. 16.

Dahil dito, naglabas ng pahayag si Pangulong Rodrigo Duterte sa ASEAN-China Special Summit na kinukundena ang nangyaring insidente at nanawagan sa China na magsagawa ng self-restraint sa teritoryo ng Pilipinas.

Kinondena rin ni Foreign Affairs Secretary Teodoro Locsin Jr. ang insidente habang sinabi ni Defense Secretary Delfin Lorenzana na walang karapatan ang China na harangin, pigilan o takutin ang ating mga barko sa pagpasok sa ating EEZ.

Nitong Nov. 20, nasaksihan mismo ni Lacson ang pambu-bully ng China habang patungo sa Pag-asa Island nang mag-isyu ang China ng radio challenge sa mga piloto ng eroplano na kanilang sinasakyan. Pagkalapag nina Lacson sa lugar ay nakatanggap sila ng text message na nagsasabing “Welcome to China!”

Sa kanyang panawagan para magkaroon ng balance of power sa rehiyon at sa pagkakaroon ng development program sa isla, binigyang diin ni Lacson ang importansya na masiguro ang freedom of navigation at malayang kalakalan sa West Philippine Sea.

“Considering the importance of the West Philippine Sea in ensuring freedom of navigation, unhampered international trade and commerce in the Asia Pacific Region and the vital role it plays in the security and safety of the region, there is a need to uphold a rules based maritime order in the area to maintain the balance of power and stability therein,” ani Lacson. Ernie Reyes