MANILA, Philippines- Nanindigan ang Department of Education (DepEd) sa desisyon nitong ituloy ang darating na school year sa Agosto 22 sa kabila ng mga panawagan na suspendihin ito.

“Tuloy na tuloy na tayo. Wala nang atrasan. August 22, 2022 ang opening of classes natin this year,” giit ni DepEd Spokesperson Michael Poa nitong Lunes.

Umapela ang Teachers’ Dignity Coalition sa DepEd na ilipat ang school opening sa kalagitnaang ng Setyembre, dahil hindi umano sapat ang school break upang makapagpahinga ang mga guro mula sa nakaraang academic year at paghandaan ang susunod.

Subalit sinabi ni Poa na marami naman ang nakilahok sa Brigada Eskwela program, kung saan tumutulong ang stakeholders at mga volunteer na ihanda ang mga paaralan para sa darating na school year.

Idinagdag din ng tagapagsalita na nakikipag-ugnayan na ang DepEd sa iba oang government agencies sa muling pagbubukas ng paaralan, kagaya na lamang ng trade department upang ma-regulate ang presyo ng school supplies, at sa Department of Health upang mabakunahan ang mga estudyante at school personnel laban sa COVID-19.

Binanggit din ni Poa ang Republic Act No. 7797, na nagbabawal na umpisahan ang school year nang lampas sa Agosto.

“We are also in contact with [local government units] para sa spaces na hindi nila nagagamit or hindi naman usually nagagamit, baka puwede ipahiram muna as temporary learning spaces,” ayon pa kay Poa.

Naiulat ng DepEd nitong nakaraang linggo na pumalo na sa 427 ang mga paaralang napinsala ng magnitude 7 na lindol, na tinatayang nagkakahalaga ng P2.1 bilyon ang pagkukumpuni. RNT/SA

MANILA, Philippines- Hiniling ni Senador Raffy Tulfo sa pambansang pamahalaan at iba pang kinauukulang ahensiya na maghanda kaagada ng contingency plan para sa Overseas Filipino Workers (OFWs) sakaling tumindi ang sigalot sa Peoples Republic of China at Taiwan.

Sa pahayag, sinabi ni Tulfo, lider ng Senate Committee on Migrant Workers, na dapat kumilos kaagad ang Overseas Workers Welfare Administration (OWWA), Philippine Overseas Labor & Office (POLO) at Department of Foreign Affairs (DFA) sa paglikha ng coordinated plan upang matiyak ang kaligtasan ang manggagawang Filipino sa Taiwan at katabing bansa.

“The tension between China and Taiwan is not something to be taken lightly. Dapat ngayon pa lamang ay gumagawa na ng contingency plan ang DFA, OWWA, at POLO in the event na lumala ang problemang ito. This is the perfect time for government agencies to show their united force by working together for the safety and security of our workers abroad,” aniya.

Umabot sa 200,000 ang OFWs sa Taiwan.

“In my experience of helping OFWs in the past two decades, the government agencies, oftentimes, were very reactive instead of proactive. Kapag nandiyan na ang gulo at problema, yung tipong na-stuck na ang OFWs sa ibang bansa, wala ng pera at makain, tsaka lamang sila kikilos. Hindi dapat ganoon!

“Ngayon pa lamang, dapat kumilos na tayo at ‘wag nang antaying lumala pa ang sitwasyon bago tayo umaksyon. We should be ready to evacuate OFWs in the event that the current situation escalates into a war,” giit niya.

Base sa media reports, nagsagawa ang China ang large-scale military drill sa anim na malalawak na lugar sa Taiwan Strait matapos bumisita si United States House Speaker Nancy Pelosi nitong August 2.

Inihayagmng Taiwanese government na dumaan ang mga Chinese fighter jets sa median lines sa Strait sa kabila ng matitibay na pagkondena ng United States, Japan at European Union.

Sa paghahanda ng contingency plan, sinabi ni Tulfo na dapat ikonsidera ng kinauukulang ahensiya ng pamahalaan sa pakikipag-koordinasyon sa national government ang ilang salik kabilang ang kaligtasan at suportang pinansiyal sa OFWs.

“The situation for OFWs in Taiwan is fraught with too much risk and many Filipino workers are now worried about their future abroad. Una nating kailangang siguraduhin ay ang kaligtasan ng OFWs dahil napakahalaga ng buhay ng bawat isa sa kanila,” aniya.

“The national government should provide enough funding assistance to all Filipino workers to ensure that they can smoothly re-enter the country once they are evacuated,” giit pa ni Tulfo. Ernie Reyes

MANILA, Philippines- Todas ang isang tricycle driver habang sugatan naman ang babaeng pasahero nito nang masalpok ang kaniyang minamanehong tricycle ng isang Ford Ranger na tumakas matapos ang aksidente sa Quezon City, Sabado ng umaga.

Namatay habang ginagamot sa Quirino Memorial Medical Center ang tricycle driver na si Joel Laroa, 54-anyos, nakatira sa No. 28 Interior 1 V, Gonzales St., Krus na Ligas, Q.C.

Sugatan naman ang kaniyang pasahero na nakilalang si Rozelle B. Morales, 27, Customer Service Associate, at naninirahan sa Antipolo City.

Tumakas naman ang driver ng Ford Rager Pick Up Color Black na may plakang NCG 8456 na kinalaunan ay nalaman sa Land Transportation Office (LTO) na nakarehistro ang nasabing sasakyan kay PCol. Mark Julio Abong, hepe ng QCPD Criminal Investigation and Detection Unit (CIDU).

Inaalam pa ng mga awtoridad kung ang nasabing opisyal ng QCPD ang nagmamaneho ng sasakyan nang maganap ang aksidente.

Sa naantalang report ng Quezon City Police District (QCPD) Traffic Sector 3, pasado alas-5 ng umaga (August 6) nang maganap aksidente sa kanto ng Anonas at Pajo St., Brgy. Quirino 2A, sa lungsod.

Sa imbestigasyon ni PSMS Jose R Soriano ng QC Traffic Sector 3, pareho umanong binabaybay ng tricycle at ng Ford Ranger pickup ang kahabaan ng Anonas patungong Auroa Blvd. galing sa Kamias Road sa Brgy. Quirino 2A.

Pagsapit sa nasabing lugar ay nasalpok ng Ford Ranger ang kaliwang bahagi ng tricycle na minamaneho ng biktima.

Dahil sa lakas ng impak ay tumumba ang tricycle at naipit ang driver maging ang sakay niyang pasaherong babae.

Sa halip na tulungan umano ng driver ng Ford Ranger ang mga biktima ay mabilis pa nitong pinaharurot ang kaniyang sasakyan.

Agad namang isinugod ng mga nakasaksi sa aksidente ang mga biktima sa nasabing ospital subalit kinalaunan ay binawian ng buhay ang tricycle driver habang inoobserbahan pa ang sakay nitong pasahero.

Nahaharap ang suspek sa kasong Reckless Imprudence Resulting in homicide and Damage to Property with Physical Injury (Hit and Run).

Tinangka naman kunin ang panig ng nasabing opisyal subalit hindi ito mahagilap dahil naka-leave umano ito sa ngayon. Jan Sinocruz

MANILA, Philippines- Mayroon pang 92,343 kaso ng dengue sa bansa mula Enero 1 hanggang Hulyo 23 ngayong taon.

Ayon sa Department of Health (DOH), ito ay base sa National Dengue Data hanggang nitong 2022 (MW29).

Sa kabuuan, ang mga kaso sa taong ito ay 118% na mas mataas kumpara sa mga naiulat na kaso sa parehong panahon noong 2021 (42,294).

Sa kabuuan, karamihan sa mga kaso ng dengue ay naiulat mula sa Rehiyon III (15,951, 17%) Rehiyon VII (9,429, 10%) NCR (7,962, 9%) .

Sa kamakailang panahon (Hunyo 26 hanggang Hulyo 23, 2022) kung saan 21,566 na kaso ang naitala, ang rehiyon na may pinakamataas na bilang ng mga kaso: Rehiyon III: 5,186 (24%) NCR: 2,374 (11%); CALABARZON: 2,178 (10%).

Siyam mula sa 17 rehiyon ang lumagpas sa epidemic threshold sa nagdaang apat na linggo (June 26 hanggang July 23, 2022) kasama ang MIMAROPA, at NCR na nagpapakita ng patuloy na pagtaas ng trend mula Hunyo 26 hanggang Hulyo 23, 2022.

Sa buong bansa, mayroong 344 deaths na iniulat (Case Fatality Rate=0.4%).

Noong Enero mayroong 36; February, 31; March, 39; April, 46; May,63; June, 73; at July, 56. Jocelyn Tabangcura-Domenden

MANILA, Philippines- Nagpositibo si Senator Imee Marcos sa COVID-19, ayon kay Senate President Juan Miguel Zubiri nitong Lunes.

Inilahad ng Senate chief ang impormasyong ito matapos ang roll call sa Senate session.

“Senator Imee Marcos, for the record, had written to us that she had tested positive for COVID-19,” pahayag ni Zubiri.

“[She] is asking if she should still have to go on cam because she has raging fever. Maybe she can acknowledge, just acknowledge that she is online so we can mark her as present without having to open cam,” dagdag niya. RNT/SA