MANILA, Philippines- Tumanggap ang lokal na pamahalaang lungsod ng Navotas ng papuri mula sa Anti-Red Tape Authority (ARTA) bilang isa sa natatanging Local Government Units (LGUs) sa pagbibigay ng business permit, lisensya at paglalagay ng electronic Business One-Stop Shop (eBOSS).

Iginawad ang papuri sa lungsod base sa pagtugon nito sa Ease of Doing Business Law kasunod ng inspeksyon at pagsusuri na isinagawa ng ARTA-Compliance Monitoring and Evaluation Office (CMEO).

Mismong si Sec. Ernesto V. Perez, Director General ng ARTA ang nagbigay ng sertipiko kay Navotas City Mayor John Rey Tiangco.

“We are grateful to ARTA for granting us this recognition. This is a testament to our city government’s commitment to provide the highest level of service to our constituents,” ani Tiangco.

Sa pamamagitan ng pasilidad ng eBOSS sa lungsod ang mga negosyanteng Navoteño ay mabilis makapag-apply, renew at pagbabayad ng kanilang mga permits kahit sa kanilang bahay o tanggapan lamang.

Ang digitalization ay upang matiyak at maiwasan ang mga pagkakataon ng red tape at katiwalian at kung maaari ay mababawasan ang mga ito at maalis.

Samantala, ang Navotas ay isa sa 6 sa Metro Manila LGUs na nakasunod sa mandato ng eBOSS habang pinuri rin ni Sec. Perez ang lungsod sa konstruksyon ng One-Stop Shop na nakapagpapagaan at nakapagpapabilis ng mga dokumento. R.A Marquez

MANILA, Philippines- Isang British national na nasa listahan ng High Value Individual (HVI) at tatlong iba pa ang naaresto sa isinagawang buy-bust operation sa parking lot ng Nomo Mall Bacoor City, Cavite.

Kinilala ang mga naaresto na si Nathan Colquhoun, 47, isang British national, nasa gustong gulang at nasa listahan ng HVI, John Edric Kintana, alias Tol, 22, Shicille Delos Santos, 39 at John Jacob Kintanar,nasa listahan ng Street Level Individual (SLI).

Ayon sa report, dakong alas-9 ng gabi nang nagsagawa ng buy-bust operation ang mga operatiba ng Drug Enforcement Unit (DEU) ng Bacoor City Police sa parking lot ng NOMO Mall sa Brgy San Nicolas 1, Bacoor City na nagresulta sa pagka aresto sa mga suspek at pagkakarekober ng tinatayang 20 gramo ng marijuana , pouch at buy bust money.

Sinampahan na ng kasong paglabag sa Sec. 5, 26 at 11 Art II ng RA 9165 ang mga naarestong suspek. Margie Bautista

MANILA, Philippines- Itinalaga bilang Acting Chief ng Bureau of Jail Management (BJMP) si Jail Chief Superintendent Ruel Silva Rivera, na siyang Deputy Chief for Administration, na nangakong ipagpapatuloy ang mga programa ni outgoing Chief Jail Director Allan Iral, na nakatakdang bumaba sa pwesto mula sa serbisyo ngayong Hunyo 2023.

Sinabi ni DILG Secretary Atty. Benjamin Abalos Jr. na siyang nanguna sa Turnover of Command ng dalawang opisyal ng BJMP na ginanap sa Philippine National Police Star Officers’ Lounge, National Headquarters Building sa Camp Crame, Quezon City, kahapon.

Sa kanyang mensahe, ipinahayag ng SILG Abalos ang kanyang buong suporta sa bagong luklok na Acting Chief ng BJMP.

“I am confident that you have the competence, General Ruel [Rivera], and the ability to lead the BJMP in ensuring the vision of the Bureau to efficient and effective implementation of the J.A.I.L. [Journey for Advancement, Innovation, and Long-term Development Plan 2040].”

Higit pa rito, hinimok ni Abalos ang BJMP na patuloy na palakasin ang mga programa sa rehabilitasyon ng Jail Bureau lalo na, para sa mga persons deprived of liberty (PDL) na kinasuhan ng paglabag sa RA 9165.

Isang miyembro ng PATNUBAY Class of 1995, tumanggap si Rivera ng kanyang degree sa Public Safety mula sa Philippine National Police Academy (PNPA). Nagtapos siya ng Master’s in Public Administration sa Batangas State University at nakakuha ng Doctorate units sa Philosophy on Educational Management sa University of Rizal System.

Sa kanyang 28 taon sa serbisyo publiko, humawak si Rivera ng ilang kritikal na pagtatalaga sa BJMP. Isang field officer sa puso, umakyat siya sa ranggo simula warden ng municipal, city at district jails, bilang steward ng Manila City Jail noong 2011 kung saan ipinakilala niya ang konsepto ng PDL records digitization at pinasimunuan ang e-Dalaw System, ang unang electronic visitation system na nagbigay-daan sa mga pamilya at kaibigan ng PDL na makipag-usap sa kanilang mga nakakulong na kamag-anak sa pamamagitan ng digital na paraan.

Hindi siya umiwas sa pag-deploy sa iba’t ibang regional office bilang staff officer, Regional Chief of Directorial Staff at Assistant Regional Director, hanggang sa tuluyang pag-akyat sa pwesto ng Regional Director ng BJMP-MIMAROPA mula 2013 hanggang 2014.

Si Rivera ay naging Chief of the Finance Service Office ng NHQ, Director for Investigation and Prosecution, Director for Logistics, at Director for Comptrollership, bago sumali sa Command Group ng BJMP, ang decision-making body ng Jail Bureau, na nagsisilbing Chief of Directorial Staff noong 2017, Deputy Chief for Operations noong 2018, at Deputy Chief for Administration noong Hulyo 2019, kasunod ng pag-assumption kay Jail Director Iral bilang BJMP Chief. Jan Sinocruz

MANILA, Philippines- Apat katao ang nadakip ng pulisya sa isinagawang anti-illegal gambling operation sa Navotas City, kamakalawa ng hapon.

Kinilala ni Navotas police chief P/Col. Allan Umipig ang mga naarestong suspek na sina Gerald Muares, 34, seafarer, Arnel Alayon, 27, kapwa ng Aquarius St., Brgy. San Roque, Aryet Ochoa, 27 ng 104 Bagong Kalsada St., Brgy. Tangos South at Aldrin Manliclic, 36, joy ride rider ng F. Pascual St., Brgy. Tangos South.

Sa imbestigasyon ni PSSg Leofoldo Lumbang Jr, dakong alas-2:45 ng hapon, nagsasagawa ng covert monitoring ang mga operatiba ng Intelligence Section ng Navotas police sa ilalim ng pangangasiwa ni PCpt Luis Rufo Jr, sa Tulay Uno, Daang Hari St., Brgy. Daang-hari.

Dito, naaktuhan nila ang mga suspek na nagsasagawa ng ilegal na sugal na kilala bilang “Tupada” na naging dahilan upang arestuhin sila nina PSSg Mervin Villañueva, PSSg Ever Layco, PSSg Jess Rondell Sauza at PCpl Joemar Dacallos.

Nakumpiska sa mga dinakip ang dalawang panabong na manok na may tari at P2,370 sa magkakaibang denomination na gamit bilang bet money kaya dinala sa himpilan ng pulisya para sa investigation at disposition. Boysan Buenaventura

NEGROS ORIENTAL – Naalarma ang Provincial Health Office (PHO) sa Negros Oriental dahil sa pagtaas na bilang ng mga kaso ng typhoid fever simula pagpasok ng taon sa probinsyang ito.

Sa pahayag ni PHO chief Dr. Liland Estacion, nakapagtala sila ng 87 kaso kumpara noong nakaraang taon na may 54 kaso at isa ang namatay.

Aniya, nakakaalarma ang pagtaas ng nasabing sakit lalo na sa Sitio Lapnol, Barangay Tanglad, Manjuyod na nakapagtala ng 10 kaso nito lamang Marso 24.

Dinala ang mga pasyente sa Bais City District Hospital at Manjuyod Rural Health Unit habang ang dalawa ay na-confine sa Negros Oriental Provincial Hospital (NOPH).

Kaugnay nito, inirekomenda ni Estacion sa lokal na pamahalaan na magsagawa ng kanilang sariling imbestigasyon sa pamamagitan ng pagpapadala ng sanitary inspection team para malaman ang pinagmulan ng mga kaso.

Namahagi na rin ng mga Jerry cans at chlorine sa mga residenteng apektado ng sakit para malinis ang kanilang iniinom na tubig.

Nagsagawa na rin ang PHO at LGU sa mga barangay ng health education at pagpapakalat ng mga information materials kung paano mabibigyan ng solusyon at maiwasan ang naturang sakit.

Pinaalalahanan rin ni Estacion ang mga residente na ugaliing pakuluan ang kanilang mga tubig inumin lalo na kung hindi sila siguradong ligtas ang pinagkukuhanan nila ng tubig. Mary Anne Sapico