LIBRENG INTERNET SERVICE SA “GIDA”

LIBRENG INTERNET SERVICE SA “GIDA”

January 3, 2023 @ 11:14 AM 1 month ago


MAY magandang regalo si President Ferdinand “BBM” Marcos, Jr. sa mga paaralan at komunidad na nasa mga malalayong lugar o iyong tinatawag ngayong GIDA o geographically isolated and disadvantaged areas dahil nitong December 24 ay pormal na inilunsad ang BBMP o ang BroadBand ng Masa Program ng Department of Information and Communications Technology (DICT). 

Sorpresang nakausap ng mga estudyante si Pangulong BBM at si DICT Secretary Ivan John Uy. Kabilang sa mga lumahok sa isinagawang “online kumustahan” ang mga kinatawang mag-aaral buhat sa Amenia Elementary School sa Uson, Masbate; Bandera Elementary School ng Island Garden City of Samal, Davao del Norte; Amai Pakpak Central Elementary School sa Marawi city, Lanao del Sur; Dioryong Integrated School ng Nagtipunan, Quirino; Villa Espina Elementary School sa Lopez, Quezon; Landang Laum Elementary School sa Zamboanga city; at sa Pag-asa island, Municipality of Kalayaan sa West Philippine Sea. 

Dito sinabi ni Pangulong BBM ang kanyang direktiba sa DICT at kanyang pangako na magkaroon ng free internet service sa lahat ng mga kinukonsiderang GIDA sa buong bansa sa lalong madaling panahon.

Kapwa naniniwala ang Pangulo at ang DICT na malaki ang magagawa ng BBMP para magkaroon ng “direct connection” ang taon bayan sa pamahalaan at direktang maipaabot ang mga serbisyo.    

Isa sa mga programang pinakinabangan ng mga mamamayan mula pa sa nagdaang Duterte administration at ipinagpapatuloy sa kasalukuyang Marcos administration ang “Free Wifi for All Program” kung saan 628 ang naidagdag sa loob ng anim na buwan sa 4,129 na wifi sites o kabuuang 4,757 sa buong bansa.

Nasa 100,000 pamilya ang nakikinabang sa free internet service ng pamahalaan o katumbas ng 2.1 milyong indibidwal ayon sa DICT.

Isa sa pinatututukan ng Pangulong BBM sa kanyang economic managers ang pagpapalakas at pagpapabilis ng internet speed sa bansa na kasalukuyang nasa 22.54 mbps pa lamang. Malayu-layo pa tayo mula sa global median speed na 33.17 mbps kaya naman nasa 85th rank tayo sa 139 na mga bansa sa buong mundo.

Tama naman ang Pangulo, kung nais natin na makapag-imbita ng mga dayuhang mamumuhunan sa ating bansa, kailangan ang malakas na internet lalo pa’t karamihan ng mga pagpupulong ngayon ng mga multi-national companies ay online na. #