MANILA, Philippines – Matapos mabigyan ng kasiyahan sa Star City ang 280 kabataan ay nagsagawa naman ng libreng flu vaccination ang lokal na pamahalaan ng Pasay kaugnay sa isang linggong aktibidad ng gift-giving bilang selebrasyon ng kaarawan ni Mayor Emi Calixto-Rubiano sa Agosto 16.

Sinabi ni Calixto-Rubiano na ang mga tumanggap ng libreng flu vaccines na ginanap sa Jose Rizal Elementary School (JRES) ay ang mga senior citizens na nagmula sa limang barangay na kinabibilangan ng Barangay 84, 85, 86, 87 at 90.

Ayon kay Calixto-Rubiano, ang pagtuturok ng flu vaccines sa mga senior citizens ay bahagi ng kanyang adminsitrasyon na HELP program (Health and housing, Education, economic growth and environment, Livelihood and lifestyle, Peace and order, Palengke at Pamilya).

Dagdag pa ni Calixto-Rubiano na ang pamamahagi ng libreng flu vaccines sa mga seniors ay isa ring pamamaraan ng selebrasyon para sa residente ng lungsod.

Matatandaan na nito lamang Agosto 11 ay nagkaloob ng isang ‘birthday treat’ si Calixto-Rubiano kung saan personal na sinamahan ng alkalde na mabigyan ng kasiyahan ang 280 kabataan sa Star City.

Sinabi pa ni Calixto-Rubiano na punong-puno ng sigla ang kanyang nawari sa mga kabataan na walang humpay ang kaligayahan sa pagsakay sa iba’t-ibang rides sa nabanggit na theme park.

Bukod sa kaligayahan ng mga kabataan ay inamin din ni Calixto-Rubiano na siya mismo ay naaaliw at nasiyahan habang kasama ang mga tsikiting at nagsabing pakiramdam niya ay nagbalik siya sa kanyang pagkabata sa pagdiriwang ng kanyang kaarawan. James I. Catapusan

 

CAGAYAN VALLEY-Nakapagtala ang Department of Health-Cagayan Valley Center for Health Development ng COVID-19 variants cases dito sa rehiyon dos.

Batay sa datos ng Regional Epidemiology and Surveillance Unit Batch 111 whole genome sequencing noong Agosto 9, 2022, karagdagang 100 local cases ang positibo sa Omicron variant (BA.1.1.529 at BA sublieanages).

Nakapagtala ang mga probinsya ng Cagayan (50), Isabela (27), Nueva Vizcaya (12) at Quirino (11).

Sa nasabing datos, mula sa kabuuang 100 bilang, 87 ay Mild, 8 ay asymptomatic at 85 ay moderate lang.

Habang isinagawa ang karagdagang imbestigasyon ng surveillance team, napag-alaman na, 82 ang kumpirmadong kaso kung saan fully vaccinated, 13 ang nakatanggap palang ng unang dose at 5 ang hindi karapat-dapat na sumailalim sa pagbabakuna.

Nagpaalala ang Cagayan Valley Center for Health Development ang mahigpit na pagsunod sa preventive measures at paggamit ng face mask, limitahan ang pagpunta sa mga matataong lugar.

Kung may mga palatandaan at sintomas ng COVID-19 humingi ng maagang konsultasyon at magpabakuna para sa karagdagang proteksyon laban sa virus.

Dahil sa maagap ang mga frontliner ay gumaling na ang 100 katao na tinamaan ng virus sa rehiyon. Rey Velasco

MANILA, Philippines – Todo-depensa ang Malakanyang sa umano’y naging direktiba ni Executive Secretary Victor Rodriguez na lumikha ng isang importation plan.

Sa isang panayam, sinabi ni Press Secretary Trixie Cruz-Angeles, na kahit direktiba ito ni ES Rodriguez, wala naman siyang kinalaman at kamay si Rodriguez sa “unauthorized order” para umangkat ng 300,000 metriko tonelada ng asukal.

Ani Cruz-Angeles, ang importation plan ay iba sa resolusyon na ipinalabas na walang pahintulot ni Pangulong Ferdinand Marcos Jr.

“Importation plan gives us information. Hindi iyan order,” ayon kay Cruz-Angeles sabay sabing “Until makita mo ‘yung importation plan, there is no order to import. At kailangang pag-aralan. Ito ‘yung sinasabi natin na ang Presidente, he wants to do things systematically.”

Ang paglilinaw ay ginawa ni Cruz-Angeles kasunod ng pagbibitiw sa puwesto ni Undersecretary Leocadio Sebastian mula sa Department of Agriculture (DA), araw ng Huwebes matapos inguso dahil sa kanyang “unauthorized signing” ng sugar importation order.

Sa kanyang one-page letter na may petsang Aug. 11, humingi ng paumanhin si Sebastian sa pag-apruba sa Sugar Order no.4 para sa pangulo, at sa pamamagitan umano ng kapangyarihan na ibinigay sa kanya.

Ani Cruz-Angeles , mayroong “misunderstanding” sa naging kautusan ni Rodriguez na lumikha ng importation plan sa ipinalabas na resolusyon na pirmado ni Sebastian.

Sinabi ni Cruz-Angeles, binigyang awtorisasyon ni Pangulong Marcos si Rodriguez na lumikha ng importation plan.

Si Rodriguez ang nagsabi kay Pangulong Marcos ukol sa unauthorized issuance ng resolusyon ayon kay Cruz-Angeles.

“That’s a misunderstanding of the plan. After the plan, that is the only time na magkakaroon po ng resolution. Kaya naging mahalaga ’yung whether or not there is an importation plan,” aniya pa rin.

“The unauthorized signing of the order on behalf of Marcos is still under investigation,” ayon kay Cruz-Angeles.

“The President is objective. He’s leaving the investigation to be conducted without his interference. Kailangan has to be fair,” lahad pa nito. Kris Jose

 

MANILA, Philippines – Patuloy na nanawagan ang Office of the City Veterinarian (OCVet) sa publiko na bantayan at agad na iulat ang mga sakit at pagkamatay ng baboy.

Umapela si Dr. Mario Arriola, OCVet chief, habang ang lungsod ay nananatiling nasa red (infected) zone classification ng African swine fever (ASF) monitoring ng Department of Agriculture habang patuloy na kumakalat ang mga kaso.

Sinabi ni Arriola na ang bilang ng mga barangay na may kaso ng ASF ay tumaas sa 27 mula sa 22 noong Biyernes, kung saan 799 hog raisers ang naapektuhan.

Ang hog mortalities ay tumaas sa 2,977 habang 872 ang na-culled sa nakalipas na pitong araw.

Ang bilang ng mga apektadong barangay ay kumalat sa lahat ng pitong distrito ng beterinaryo — Tumaga (9), San Roque (2), Manicahan (3), Curuan (2), Vitali (5), Ayala (2), at Culianan (4). ).

Naghihintay pa rin ang OCVet ng mga resulta ng 54 na sample ng laboratoryo na isinumite para sa pagsusuri.

Ang mga mahigpit na protocol sa transportasyon at paggalaw ay ipinapatupad sa mga hangganan sa mga nayon ng Licomo at Limpapa sa silangan at kanlurang baybayin, ayon sa pagkakabanggit. RNT

MANILA, Philippines – Ipinanawagan ni Senate President Juan Miguel Zubiri sa mga opisyal ng Sugar Regulatory Administration (SRA) na sangkot sa pagpirma sa illegal importation order para sa 300,000 metrikong tolenada ng asukal magbitiw na sa pwesto.

“Ako ay nananawagan na sa SRA na kung puwede, mag-resign na kayo. Laman ng lahat ng balita yung illegal Sugar Order No. 4. Dapat po kung may delicadeza po kayo mag-resign na po kayo. Nananawagan na po ako, mag-resign na po sila,” anang senador.

Inilabas ni Zubiri ang panawagan matapos sabihin ni Press Secretary Trixie Cruz Angeles Cruz-Angeles na nagbitiw si Undersecretary Leocadio Sebastian sa kanyang puwesto bilang undersecretary for operations at chief of staff ng Secretary of Agriculture, isang pwesto na hawak din ni Pangulong Ferdinand Marcos Jr.

Sinabi ni Cruz-Angeles na humingi ng paumanhin si Sebastian sa Punong Ehekutibo sa paglagda sa Sugar Order No. 4 nang walang ipinahayag na pag-apruba ni Marcos, na bilang kalihim ng DA, ay chairman din ng Sugar Regulatory Board.

“Dapat magsampa ng kaso laban sa kanila. Ipinahamak nila si Pangulong Marcos. Dapat mag-resign na sila at kasuhan, turuan ng leksyon. For the record, kasi sabi nila wala nang asukal. Kasinungalingan po yan,” dagdag pa ng Senate President.

Hihiling din umano siya ng imbestigasyon sa tangkang pag-angkat.

Nauna nang sinabi ni Agriculture Undersecretary Kristine Evangelista na kailangan ng Pilipinas na mag-import ng 300,000 metric tons ng asukal upang patatagin ang presyo ng mga bilihin sa merkado.

Gayunpaman, tinanggihan ni Marcos ang panukala, sinabi ni Cruz-Angeles noong Miyerkules. RNT