MAHABANG TERMINO NG MGA BARANGAY CAPTAIN

MAHABANG TERMINO NG MGA BARANGAY CAPTAIN

June 28, 2022 @ 4:41 PM 1 month ago


SINASABING pinag-iisipan mismo ni President-elect Ferdinand “Bongbong” Marcos Jr. kung pahahabain o hindi ang termino ng mga kapitan ng barangay.

Hindi naman malinaw kung maisasama rito ang termino ng mga kagawad, chairman ng Sangguniang Kabataan at mga kagawad dito.

Subalit, mainam kung maisama na rin sana ang mga ito bilang kasama ng mga kapitan, lalo na kung iisipin na kasama sila ng mga batayang organisasyong pampamahalaan na tuwirang nakaugnay sa malawak na pamayanan sa buong bansa.

15 TAONG TERMINO

Ayon kay PBBM, posible umanong gawing limang taon ang termino ng mga kapitan at maaari pang mahalal ang mga ito ng dalawang b

eses.

Nangangahulugan na posibleng maglingkod ang kapitan sa loob ng 15 taon at dahil na rin sa kagustuhan ng mga mamamayan sa kanyang barangay.

Para sa mga barangay na nakapagluluklok ng mga matatapat, masisipag, makabayan at hindi korap na kapitan, hulog ng langit ang huli sa kanila.

Makaaasa sila ng tuloy-tuloy at walang patid na serbisyo publiko na kailangan nila sa matagal na panahon.

Tiyak silang magkakaroon ng maaayos na programa o proyektong laban sa kagutuman at paghihirap, pang-edukasyon, pangkalusugan, panghanapbuhay, pangkaayusan at pangkapayapaan, panlipunan, pangkapaligiran at marami pang iba.

MALAKING KASANGGA NG PANGULO

Kung gagawin ngang limang taon ang termino ng mga kapitan, na maaaring gayundin sa mga kagawad,  malaking tulong ito sa paggampan ng tungkulin mismo kahit ng Pangulo at Pangalawang Pangulo ng bansa na may anim na taong termino, maliban lang sa huli na may karapatang magkaroon ng ikalawang termino.

Bukod sa mga lokal na pamahalaan mula munisipyo  hanggang sa mga lalawigan at rehiyon, napakalaking pwersa ang 42,000 barangay, at posibleng mga kagawad na pitong beses ang dami, upang maging dagdag na katulong ng pamahalaan sa pagkilos nito para pagsilbihan ang sambayanan.

Ang mga kapitan ang tuwirang kaugnay ng Palasyo sa mga nagaganap sa mga komunidad, maging sa mga malalayong lugar sa mga kabayanan at kalunsuran na karaniwang hirap na abutin ng serbisyo publiko.

At dahil sa mahabang panahon ng termino, higit na magiging matapat, masipag at matatag ang mga kapitan sa paninilbihan sa bayan.

Mayroon namang mga naihahalo na hindi maganda ang panunungkulan ngunit may mga paraan namang ligal na sibakin ang mga ito sa pwesto ngunit nababatay pa rin sa kagustuhan ng mga nasasakupan nila.

AKSYON NG KONGRESO

Hanggang sa tinitipa ito, mga Bro, wala pa tayong naririnig na mambabatas sa Kamara o sa Senado na maaaring maghain ng panukala para sa mahabang termino ng mga kapitan.

Ngunit hindi nangangahulugang sagabal ito sa Palasyo na may karapatan ding magsulong ng panukalang batas para rito.

Isang malaking hamon sa mga mambabatas ang paglabas ng kaukulang batas ukol sa pagpapahaba ng panunungkulan nina kabesa de barangay at sana, masakop na rin maging ang mga kagawad.

Maaari ring kumilos ang mga mismong opisyal ng barangay at itulak ang mga nasa itaas na baguhin na ang batas sa panunungkulan.