Mala-Alcatraz na kulungan kailangan matapos ang Bilibid escape

Mala-Alcatraz na kulungan kailangan matapos ang Bilibid escape

January 19, 2022 @ 8:15 AM 7 months ago


MANILA, Philippines — Ang naganap na pagpuga ng Maximum Security prison sa New Bilibid Prison ay isang patunay na kinakailangang magtayo ng hiwalay na kulungan para sa mga presong nakulong sa heinous crimes o mga karumal-dumal na krimen,

Sinabi ni Senate President Vicente Sotto III na hindi sana makatatakas ang mga preso kung sa hiwalay sila na kulungan nakapiit na may mas malakas na seguridad.

“It bolsters the need for that. Kailangan talaga ihiwalay natin yung mga heinous criminals from the community of PDLs (persons deprived of liberty),” ani Sotto sa mga reporter.

“If we create this separate facility that I have envisioned for a long time already, eh hindi mangyayari ‘yan. Hindi sila makakatakas dun. No cell site, no signal, no nothing,” dagdag pa niya.

Sinabi pa ni Sotto na ang nakabinbing panukala sa pagtatayo ng hiwalay na pasilidad para sa heinous crime convicts ay nauna nang naaprubahan ng Senado at Kamara. Pero nakatambay pa rin ito sa bicameral conference committee.

Dagdag pa ng Senate President kinakailangan din ipatupad ang regionalize penal colonies.

Giit niya na mas lalong naliligaw sa landas ang mga inmates dahil hindi sila nabibisita ng kanilang mga pamilya sa layo ng mga kulungan kaya mas mainam umano na magkaroon ng penal colonies sa Luzon, Visayas, at Mindanao.

 

“Papano dadalawin sa Muntinlupa NBP yung mga taga Sultan Kudarat, o taga Surigao, o taga Ilocos, taga Negros? Baka ni once a month, once a year, hindi makabisita,” ani Sotto. RNT