MANILA, Philippines – Arestado ang isang incumbent Association of Barangay Captain (ABC) President matapos na masamsaman ng iligal na mga baril at bala na walang kaukulang lisensya.

Sa bisa ng search warrant, sinalakay ng pulisya ang bahay ni ABC President Angelito De Mesa sa Barangay Masaya, Bay, Laguna.

Batay sa report ng Laguna Criminal Investigation and Detection Group ( CIDG) ganap na las-7 ng umaga nang salakayin at halughugin ang tahanan kung saan narekober kay De Mesa ang caliber 5.56mm, M16 rifle, Caliber 9mm machine pistol, Caliber 45, at ibat-ibang klase ng bala ng nasabing mga armas.

Nakatakdang kasuhan si De Mesa. Ellen Apostol

MANILA, Philippines – Inihayag ni Senate President Juan Miguel Zubiri na dapat amin o ipagbigay-alam sa school administration ng lahat ng estudyante ang kanilang pagsali sa anomang organisasyon sa pamantasan tulad ng fraternity.

Sa pahayag, sinabi ni Zubiri sa pagtatapos ng pagdinig ng Senate committee on justice and human rights nitong Lunes na kapag ideneklara ng estudyante kung ano ang sinalihang organisasyon ito, matutukoy kagad kung mayroon silang ginawang mali tulad ng hazing.

“You’ll now have to put in your entry form: Are you a member of a fraternity? Yes or no? Now, if they lie on that particular issue and they are a member of a fraternity, eventually they will get into trouble in the schools, fraternity or sorority. Maybe the schools will have a reason to expel or to suspend the students,” ayon kay Zubiri saka idinagdag na mayroong fraternity na hindi school-based.

Sinabi ni Lawyer Luzviminda Rosales, legal counsel ng Philippine Association of State Universities and Colleges, na malaking tulong ang panukala ni Zubiri.

“That’s really the problem for the universities. We are not in fact knowledgeable whether these students are actually members and there were no reported incidents of hazing in the universities,” ayon kay Rosales.

Nagsagawa ng pagbisita ang komite sa pamumuno ni Senator Francis Tolentino, sa Republic Act No. 11053 o ang Anti-Hazing Act upang lagyan ito ng “matalim na pangil.”

Magkasamang hinikayat nina Senador Ronald Dela Rosa at Raffy Tulfo, ang pamunuan ng paaralan na lumikha ng inisyatiba upang iiwas ang estudyante partikular ang miyembro ng fraternity at sorority na magsagawa ng hazing.

Bukod sa pagkilala sa fraternity, responsibilidad ng pamantasan ang anumang gawain ng estudyante.

Inihayag naman ni Col. Virgilio Jopia, Biñan City police chief, na pitong suspek ang naaresto at nasampahan ng kaso sa pagkamatay ni Adamson University engineering student John Matthew Salilig. Ernie Reyes

MANILA, Philippines – Pinaiimbestigahan ni Senator Francis Tolentino ang National Bureau of Investigation (NBI) ang doktor na tumanggi umanong magbigay ng tulong medikal sa hazing victim na si John Matthew Salilig.

Sinabi ng senador sa pagdinig sa Senado na base sa affidavit ng isa sa limang suspek sa Salilig case na boluntaryong sumuko sa NBI na si Ralph Benjamin Tan alyas Scottie, ang doktor ay tumangging tulungan si Salilig.

Anang senador, aalamin kung sino ang doktor na ito na tumangging sumaklolo kay Salilig na nooy buhay pa.

“Palagay ko po sa NBI dapat malaman natin kung sino ang doktor na ito. Ito po ay lisensyado ng [Professional Regulatory Commission], ito po ay medical practitioner. Wala po akong alam na doktor na hindi nagbibgay ng tulong sa nangangailangan pero ito kaharap niya na oh, ayaw niya,” sabi ni Tolentino.

Sinabi ni NBI agent Joseph Martinez, na kumuha ng salaysay ni Tan, na sinusubukan pa nilang kilalanin ang doktor dahil tila hindi rin matukoy ni Tan kung sino talaga yung doktor.

Sinabi ni Tolentino na dapat makasuhan ang doktor ng paglabag ng Hippocratic Oath.

Tinapos ng Senate Justice and Human Rights panel ang imbestigasyon sa pagkamatay ni Salilig pagkatapos ng dalawang pagdinig.

Sa unang pagdinig, nalaman na ang mga miyembro ng Tau Gamma ay nagpasya na hindi dalhin sa ospital si Salilig matapos siyang makaranas ng seizure habang isinasagawa ang fraternity welcoming rites.

Natagpuan ang bangkay ni Salilig sa isang mababaw na hukay sa Imus, Cavite, noong Pebrero 28, sampung araw matapos itong iulat na nawawala. Jocelyn Tabangcura-Domenden

TACLOBAN CITY – MINSAN pang napatunayan ng walang mabuting dulot ang matinding selos matapos pagsasaksakin ang isang saleslady ng kanyang kinakasama dahil sa selos habang nagtangka naman magpakamatay ang suspek, kamakalawa ng hapon sa lungsod na ito.

Kinilala ang biktimang si Dailyn Tiu, 33, appliance center sales lady habang naka-hospital arrest naman ang suspek at live-in partner na si Jason Roa, alyas Dagul, 28, at kapwa residente sa Brgy. 83-A Burayan San Jose, Tacloban City.

Batay sa report ng Police Station 1, Tacloban City Police Office, dakong 12:40 PM naganap ang krimen sa loob ng inuupahan na bahay ng mag-live in partner sa nasabing lugar.

Lumabas sa imbestigasyon ng pulisya, nagkaroon ng pagtatalo ang suspek at biktima sa loob ng kanilang bahay dahil sa pagseselos ng una.

Hanggang sa nakarinig na lamang ang kanilang mga kapitbahay na sumisigaw ng tulong ang biktima at nakita na nilang may umaagos na dugo sa pintuan ng bahay kaya agad na silang humingi ng tulong sa pulisya.

Sa pagresponde ng mga awtoridad naabutan na lamang nilang naliligo sa sariling dugo ang biktima at maraming tama ng saksak sa iba’t ibang parte ng katawan na naging sanhi ng agaran nitong kamatayan.

Isinugod naman sa Eastern Visayas Medical Center ang suspek matapos magtangkang magpakamatay sa pamamagitan ng paglaslas sa kamay.

Inihahanda naman ang kaukulang kasong isasampa laban sa suspek./Mary Anne Sapico

Pinuri ni Senador Christopher “Bong” Go ang pag-apruba ng mga senador sa Senate Bill No. 1359 o No Permit, No Exam Prohibition Act, sa ikatlo at huling pagbasa noong Lunes.

Si Go ay isa sa co-author at co-sponsor ng panukala.

Sa iminungkahing panukala, parurusahan ang mga eskuwelahan na magpapatupad ng patakarang “no permit, no exam” o anumang katulad na polisiya na nagbabawal sa mga mag-aaral na kumuha ng pagsusulit dahil sa hindi nabayarang matrikula o iba pang bayarin sa paaralan.

“I am grateful for the support and cooperation of my colleagues in the Senate for the passage of this measure. Education is a basic right that should be accessible to all, and this measure ensures that no student is unfairly deprived of the opportunity to take exams or assessments because of financial constraints,” sabi ni Go.

“Patuloy po tayong magtulungan upang masigurong may dekalidad na edukasyon para sa bawat Pilipino,” dagdag niya.

Sinasaklaw ng SBN 1359 ang lahat ng pampubliko at pribadong institusyong pang-edukasyon, kabilang ang elementary and secondary schools, post-secondary technical-vocational institutes, at higher educational institutions.

Kasama rin dito ang lahat ng indibidwal na naka-enroll sa K to 12 Basic Educational Program, certificate, diploma, o degree programs ng higher educational institutions, o short-term courses na inaalok ng technical-vocational training institute.

Sa kanyang co-sponsorship speech, sinabi ni Go na ang ‘no permit, no exam policy’ ay nagdaragdag ng pasanin sa mga magulang at nanggigipit sa mga mag-aaral na dapat ay nakatutok sa pag-aaral.

“Kailangan po natin tanggalin ang ganitong klaseng burden sa students at kanilang mga magulang. The primary objective of schools is to provide learning opportunities for the development of the students’ intellectual, moral, physical and cultural aspects,” ani Go.

Inamin niya na ang ekonomiya ng Pilipinas ay nananatiling mahina dahil sa mga natural na kalamidad at pandemya ng COVID-19 na nagpahirap sa mga mag-aaral at kanilang magulang na magbayad ng matrikula at iba pang bayarin sa paaralan.

“[H]ammered by natural disasters and COVID-19, our Philippine economy remains to be more vulnerable. It is understandable that students and their parents struggle to pay tuition and other school fees,” ayon sa senador.

Sa ilalim ng batas, ipinagbabawak sa institusyong pang-edukasyon, pampubliko o pribado, na magpataw ng patakarang pumipigil sa mga mag-aaral na may natitirang obligasyon sa pananalapi na kumuha ng eksaminasyon o anumang anyo ng pagsusulit sa edukasyon.

Gayunpaman, ang mga mag-aaral at/o ang kanilang magulang o legal guardian ay dapat gumawa ng promissory note na nagsasaad na ang hindi pa nababayarang obligasyon ay kailangang ayusin sa pinagkasunduang petsa.

“Naiintindihan naman natin, kailangan din ng mga paaralan ang stable finances to continue operating. Kailangang balansehin din po. Pero ang primary goal naman talaga nila is to provide education first, (aside from doing) business,” sabi ni Go.

Bilang tagapangulo ng Senate committee on health, ang pangunahing interes ni Go ay ang pisikal at mental na kalusugan ng mga mag-aaral.

“Dapat hindi malipat sa kanila ang burden. Lagi po nating unahin ang kapakanan ng ating mga estudyante bago ang lahat,” ani Go. RNT