MANILA, Philippines- Naaresto ng Criminal Investigation and Detection Group (CIDG) personnel ang 16 wanted na indibidwal sa two-day simultaneous anti-criminality campaign.

Sinabi ni CIDG chief Brig. Gen. Romeo Caramat na sa ilalim ng  flagship project ng grupo, ang kampanya laban sa wanted persons o Oplan Pagtugis, nagsagawa ng 16 pursuit operations na nagresulta sa pagkakaaresto ng 16 wanted persons (WPs)– lima na nakalista sa regional; dalawa sa ilalim ng provincial; isa sa municipal level, at walo pang wanted persons.

Nagsagawa ang grupo ng 31 operasyon, kung saan nalambat ang 39 suspek sa simultaneous anti-criminality campaigns noong March 18 at 19.

Inihayag ni Caramat na sa kampanya laban sa loose firearms sa ilalim ng Oplan Paglalansag Omega, naaresto ng CIDG ang isang suspek sa police operation at nasamsam ang apat na firearms.

Nagresulta ang Oplan Bolilyo o kampanya laban sa illegal gambling sa pagkakaaresto sa 11 indibidwal aat pagkakasabat ng bet money na nagkakahalaga ng P6,810 sa apat na operasyon.

Ayon kay Caramat, nagresulta naman ang Oplan Kalikasan sa pagkakaaresto ng 11 indibidwal, habang 23 minors ang nasagip sa kampanya laban sa law enforcement activities.

“(The) CIDG is relentless in the implementation of its flagship programs to put an end on all illegal activities and hold criminals accountable. Makakaasa kayo na kami ay patuloy na kikilos at tutugon sa anumang paraan upang mapanatili ang ligtas at payapang komunidad,” aniya. RNT/SA

MANILA, Philippines- Nagpalabas ang Philippine Atmospheric, Geophysical and Astronomical Services Administration (PAGASA) nitong Huwebes ng El Niño Watch kung saan nakasaad ang mas mataas na tiyansa ng El Niño conditions sa ikatlong quarter ng 2023.

Sinabi ni PAGASA-Climate Monitoring and Prediction Section chief Ana Liza Solis na inisyu ang El Niño Watch, dahil naging mas pabor ang climate conditions para sa  pagkakaroon ng El Niño sa susunod na anim na buwan, sa tiyansang 55 porsyento.

Batay sa conditions at model forecasts kamakailan,sinabi ni Solis na posibleng magkaroon ng El Niño sa July-August-September 2023 season at umabot hanggang 2024. Huling nagkaroon ng El Niño noong 2018-2019.

Patuloy na binabantayan ng PAGASA ang El Niño Southern Oscillation (ENSO) conditions sa tropical Pacific mula nang ipalabas ang huling La Niña advisory noong March 10.

Base kay Solis, karaniwang nagdudulot ang namumuong El Niño ng paglakas ng southwest monsoon, dahil bago ang tagtuyot, ilang bahagi ng bansa partikular ang kanlurang parte, ang maaaaring makaranas ng “above-normal” rainfall.

Binanggit niyang halimbawa ang Ondoy na nagdulot ng malakas na pag-ulan sa Metro Manila at mga karatig-lugar sa pre-development ng El Niño noong 2009.

Batay sa latest analysis, inihayag ni Solis na maaari ring makaapekto ang El Niño sa pag-ulan sa Visayas at Mindanao, dahil makararanas umano ang mga rehiyong ito ng“below-normal” rainfall sa mga susunod na buwan.

Inabisuhan naman nito lahat ng concerned government agencies at ang publiko ba bantayan ang  official updates at mag-ingat laban sa epekto ng El Niño. RNT/SA

Manila, Philippines- Bigo pang makakuha ng sapat na pirma ng mga senador na miyembro ng ways and means committee ang committee report na nagrerekomenda na ganap na ipagbawal ang POGO sa bansa.

Sa ngayon, aabot pa lang sa pito ang pumirma kabilang na rito sina Senate majority leader Joel Villanueva, Minority Leader Koko Pimentel, Senators Risa Hontiveros at Grace Poe.

Ang mga nagsabi naman na hindi pa sila pumipirma ay sina Senator Jinggoy Estrada at Imee Marcos.

Ayon kay Senator Estrada, hindi pa nakararating sa kanya ang committee report at nais muna nya itong mabasa.

Si Senator JV Ejercito naman ay nais na gawin sa loob ng dalawa hanggang tatlong taon ang pag-phaseout sa POGO.

Ayon kay Ejercito, hindi siya pro-POGO pero inaalala niya ng epekto ng agarang pagpapasara sa POGO na mismong kongreso ang nagpasa ng batas para maging ligal ang operasyon nito sa bansa.

Sa huling araw ng sesyon ay nag-privilege speech si Sen. Sherwin Gatchalian, chairman ng ways and means committee, kung saan kanyang inilahad ang laman ng chairman’s report at inirerekomenda ang tuluyang pagpapasara at pag-ban ng mga POGO sa bansa dahil mas mabigat ang perwisyong dulot nito kung ikukumpara sa naibibigay na benepisyo.

Ayon kay Gatchalian, mangangailangan na lang ng tatlo pang pirma o kabuuang sampung signatures ang committee report para ito ay maiprisinta sa plenaryo ng Senado.

Paglilinaw ni Gatchalian, ang kanyang binasa na chairman’s report ay para lang i-update at maisalarawan sa mga senador ang mga bago pang impormasyon na lumalabas tungkol sa POGO upang makumbinsi pa ang mga ito sa negatibong dala ng POGO sa bansa.

Inihalimbawa nito ang ipinarating sa kanya ng National Bureau of Investigation na nito lamang Pebrero ay may sinagip silang Chinese national na iligal na ikinulong sa compound ng isang POGO service provider.

Aminado naman si Gatchalian na may ilan sa miyembro ng komite ay pinag-aaralan pa ang mga isyu sa POGO para lagdaan ang committee report dahil sa ilang concerns tulad ng trabaho at ang mawawalang kita mula sa buwis sa POGO. RNT

MANILA, Philippines- Sinilbihan ng Kamara nitong Huweves si Negros Oriental Representative Arnolfo “Arnie” Teves, Jr. ng 60-day suspension order sa patuloy na hindi pagsulpot sa congressional proceedings sa kabila ng napasong travel authority.

Ipinalabas ni House of Representatives Secretary General Reginald Velasco ang kopya ng suspension order ni Teves na may petsang March 22.

Makikita sa kopya na natanggap na ng opisina ni Teves ang suspension order.

“This is to respectfully furnish your Honor with a copy of Committee Report No. 472 submitted by  the Committee on Ethics and Privileges re: the motu proprio investigation relative to Representative Arnolfo ‘Arnie’ A. Teves Jr.’s personal foreign trip to the United States of America with expired travel  clearance and his continued defiance to the orders of the House to return  to the country and perform his duties as House Member, pursuant to Section 7, Rule 1 of the Rules of the House of Representatives, which constitute disorderly behavior affecting the dignity, integrity and reputation of the House of Representatives,” saad sa suspension order.

Nauna nang naghain ang Philippine National Police-Criminal Investigation and Detection Group (CIDG) ng tatlong murder complaints laban kay Teves sa mga pagpatay noong 2019.

Dawit din si Teves sa March 4 assassination ni Negros Oriental Governor Roel Degamo.

Itinanggi naman ng mambabatas ang pagkakasangkot sa mga krimen subalit hindi pa rin bumabalik ng Pilipinas mula sa overseas trip.

Bago bumoto ng kanyang mga kasamahan pabor sa kanyang60-day suspension, inihirit ni Teves na makausap si Pangulong Ferdinand Marcos, Jr.

“Gusto ko sana kayo makausap para makapag-explain ako sa inyo. Baka tawagan ko, baka puede kay Boss Anton, para makausap ko po kayo, Mr. President,” pahayag ni Teves sa video sa kanyang Facebook page.

“Again, nirerespeto ko po kayo. Sana lang mapagbigyan niyo ako na makapagusap tayo. Kung kayo na ang humiling na umuwi ako, mas mahihirapan ako na humindi dahil mas may authority kayo makabigay ng proteksyon sa akin,” dagdag niya.

Iginiir pa ni Teves na hindi siya tinutugis ng pamahalaan dahil sa March 4 assassination kay Negros Oriental governor Roel Degamo, subalit dahil umano sa mga indibidwal sa pamahalaan na nais siyang makulong dahil umano sa mga maling paratang.

Tinutukoy niya ang aniya’y January 12 press conference kung saan inakusahan niya si Interior Secretary Benhur Abalos ng planong pag-raid sa kanyang bahay at pagplanong magtanim ng ebidensya laban sa kanya. RNT/SA

MANILA, Philippines- Ikinatuwa ni Senator Risa Hontiveros nitong Huwebes ang suspension order na ipinalabas ng Office of the Ombudsman sa government officials na umano’y sangkot sa maanomalyang pagbili ng pandemic supplies mula sa Pharmally Pharmaceutical Corp. noong 2020 at 2021.

Subalit, sinabi ni Hontiveros na umaasa siyang iimbestigahan din ng Ombudsman “masterminds behind this modus.”

“My hope is that the investigation will also look into the masterminds behind this modus, well beyond the foot soldiers and mid-level officials,” pahayag niya.

“Although the Ombudsman order only covers the COVID-19 test kits, we look forward to an investigation of the PPEs and other overpriced procurements.”

Suspendido sa loob ng anim na buwan ang 33 tauhan ng Department of Health (DOH) at ng Procurement Service of the Department of Budget and Management (PS-DBM) alinsunod sa utos ng Office of the Ombudsman matapos matuklasan ang “overwhelming documentary proof” ng umano’y pagkakadawit nila sa iregularidad, na inimbestigahan ng Senate blue ribbon committee.

Ayon sa Ombudsman, ang mga kaso laban sa 33 “involve grave misconduct, gross neglect of duty, serious dishonesty, and conduct prejudicial to the best interest of the service.”

“Let justice be served. This investigation is just the beginning,” giit ni Hontiveros, isa sa mga senador na nakilahok sa blue ribbon probe at lumagda sa committee report, sa isang press conference.

“Anumang ill-gotten profit mula sa pera ng taumbayan ay dapat likumin at ibalik sa gobyerno kung saan ito nararapat.”

Inihayag din ni Hontiveros na umaaasa rin siya na mas maraming matutuklasan sa special audit na isasagawa ng Commission on Audit (COA).

“Sa pananaw ko po bunga ng aming investigation kasama si dating DOH secretary Duque,” aniya pa.

Sa kasalukuyan ay wala pang tugon si Duque hinggil dito. Nauna na niyang sinabi na hindi sangkot ang DOH sa anumang transaksyon sa Pharmally.

Noong 2021, pinangunahan ng Senate blue ribbon committee, sa ilalim ni dating Senator Richard Gordon, ang imbestigasyon sa paglilipat ng P42 bilyong COVID-19 funds mula sa DOH sa PS-DBM. RNT/SA