MASAMANG PANAHON KAHIT SAAN

MASAMANG PANAHON KAHIT SAAN

December 29, 2022 @ 10:30 AM 4 weeks ago


DAPAT mag-ingat lahat sa masasamang panahon na nagaganap kahit saan sa mundo.

Dito sa Pilipinas, nakamamatay ang mga baha na nagaganap mula sa Kabikulan hanggang sa Kabisayaan at Mindanao.

Ang pagsasalubong ng init at lamig o shear line kung tawagin ng Philippine Atmospheric, Geophysical and Astronomical Services Administration ang lumilikha ng mga tuloy-tuloy na ulan na sanhi ng mga pagbaha.

Dumarami ang bilang ng mga namamatay, mga Bro, na mula sa 13 kamakalawa ay naging 25 na kahapon.

Ayon sa National Disaster Risk Reduction Management Council, 16 ang namatay sa northern Mindanao, 5 sa Kabikulan, 2 sa silangang Visayas at 2 sa Zamboanga.

Nasa 26 naman ang missing at 12 rito ang sa Kabikulan, 11 sa eastern Visayas, 2 sa northern Mindanao at 1 sa Zamboanga.

Halos 400,000 na rin ang labis na naapektuhan at marami pa sa mga ito ang nasa evacuation centers habang nasa kani-kanilang kamag-anak ang iba.

Milyon-milyong halaga ng ari-arian naman ang nasisira.

Sa Luzon, lalo na sa hilaga, tanging lamig sa kapaligiran ang nararamdaman na lumilikha na rin ng mga sakit na ubo, lagnat at iba pa.

JAPAN, CANADA, US

Sa Japan, binabalot ang buong bansa ng sobrang lamig na ikinamatay na ng 17 katao.

Natagpuan ang ilan sa mga patay sa mga natabunan ng ice o snow na mga sasakyan at nadaganan ang iba ng mga bubong ng bahay na nagsibagsakan sa bigat ng 2 piyeng kapal ng ice na kumulapol sa mga ito.

Tubig-ulan na naging ice naman dahil sa lamig ng panahon ang pinauulan ng bagyong tumama sa mga bansang Canada at United States.

Sa Canada, may mga namatay na sakay ng isang bus nang bigla na lang dumausdos ang isang bus sa kalsadang binahayan ng yelo.

Sa US, nahuhukay ang mga patay sa loob ng mga sasakyang binabalot ng snow habang may namamatay paglabas ng kanilang mga bahay.

Mahigit nang 50 ang patay sa nasabing dalawang bansa.

Libo-libo namang biyahe ng eroplano ang natigil sa dalawang bansa dahil puno ng snow o ice ang mga mga airport, bukod pa sa pagbalot ng ice mismo sa mga eroplano.

Imadyinin na lang na sa bawat isang oras, 2-5 pulgadang snow ang bumabaksak sa lahat ng lugar kaya naman, may mga bahay nang lumubog sa snow.

Paano ka hindi mamatay riyan sa lamig na sinasabing ngayon lang naganap muli makaraan ang 100 taon?

NAGPAPASALAMAT PA RIN

Bagama’t nakalulungkot, mga Bro, ang mga kamatayan at kasiraan na dinaranas natin, medyo mas magaan ang kalagayan natin kumpara sa mga nabanggit nating mga bansa.

Tayo, kahit inuulan at binabaha, nakabibiyahe, nakapaghahanapbuhay, nakapapamasyal at iba pa na taliwas sa nagaganap sa iba.

Kaya nagpapasalamat pa rin tayo sa mga ito na biyaya ng buhay.

Ngunit mag-ingat dapat sa pangingibang-bansa.