Wala pa ring tigil sa operasyon ang bookies ng Small Town Lottery sa buong Pangasinan kaya naman patuloy na inirereklamo ng mga religious group at iba pang sektor na kontra sa iligal na pasugalan.
Sa impo, ginagamit ng sindikato ng bookies ang prangkisa mula sa Philippine Charity Sweepstakes Office bilang front ng kanilang operasyon. Maging ang mga ID ng PCSO na animo’y isang lapida sa laki na nakapangalan ang isang alias Millora. Ang matindi rito, ang ipinagmamalaki nilang ligal at may basbas ng PCSO na STL nila ay ginagamit para sa iligal na bookies ng STL na sinasabing front lamang ni Tata Jose M.
Hindi iniintidi ng grupo ni Tata Jose ang reklamo ng mga Pangasinense na lantaran ang operasyon bookies. Ang mga mayor ay nakiayon na rin sa mga nagrereklamo. Sa halip na mapunta kasi ang ilang porsiyento ng kita sa bulsa ng bayan, sa bulsa lamang ni Tata Jose pumapasok ang kabuuang kita ng operasyong STL.
Ang masakit pa rito, walang kaalam-alam ang kapulisan na ginagamit na pala sila ng nasabing sindikato dahil sa patuloy na pagpoproteksyon nila sa pagpapalaganap ng iligal na pasugalan.
Ayon sa source, ni singkong-duling ay walang perang pumapasok sa Local Government Unit ng Pangasinan mula sa kinikita ng STL kaya isa-isang nag-aalmahan ang mga alkalde na batikusin ang gobernador ng nasabing lalawigan ukol sa bookies ng STL.
SUGALAN SA BAGUIO CITY OKS KAY MAYOR
Sa Baguio City naman, kontrolado pa rin ni alias OLDAK ang operasyon ng iligal na pasugalan na drop ball at color games nito sa may Otic St. na ilang metro lamang ang layo mula sa presinto ng pulisya ng Baguio City sa kabila ng maraming nagrereklamo.
Walang ginagawa si Baguio City COP Supt. Ranil Seculles sa patuloy na operasyon ng drop ball at color games na halos abot lang niya mula sa kanyang tanggapan. Wa kita si hepe sa nagkukumpulang mga sugarol sa pasugalan gabi-gabi.
Sa dako naman ng city hall, halos abot-tanaw rin ang pasugalan pero mukha yatang may blessing mula kay Mayor Mauricio Domogan sa nasabing pasugalan.
Kaya hindi niya ipinasasara ito sa kabila ng marami nang nagugumon na mga kababayan nito sa sugal.
o0o
Anomang puna o reklamo i-text sa 09189274764, 09266719269 o i-email sa juande[email protected] o juande[email protected].
-JUAN SABOG
