MANILA, Philippines – Makakaapekto sa bansa ang easterlies at localized thunderstorm, ayon sa ulat ng PAGASA.

Sa 24-hour weather bulletin ng ahensya, makararanas ang Metro Manila at nalalabing bahagi ng bansa ng maulap na kalangitan na may kalat-kalat na pag-ulan dahil sa nabanggit na weather system.

Nagbabala naman ang PAGASA ng posibilidad ng pagbaha at pagguho ng lupa sa panahon ng malalakas na thunderstorm. RNT/JGC

ISINUSULONG ngayon ng administrasyon ni Pangulong Ferdinand R. Marcos Jr.  na patuloy na nagpapatupad ng direktang marketing platform na idinisenyo ng Department of Agriculture (DA) na nagbibigay sa mga mamimili ng access sa de-kalidad at ligtas na mga pagkain, habang tinitiyak na ang mga producer ng sakahan ay may handa na merkado.

Ayon sa Department of Agriculture (DA) ang Kadiwa ng Pangulo (KNP) ay spill-over ng marketing strategy ng DA na tinawag na Kadiwa ng Pasko, na tumugon sa mataas na halaga ng mga agricultural commodities sa panahon ng kapaskuhan.

Ang KNP ay isa lamang sa mga programa ng administrasyong Marcos na tumutugon sa pagtaas ng presyo ng pagkain dahil sa global inflation. Binibigyan din nito ang mga magsasaka, mangingisda at pati na rin ang mga micro-, small-, and medium enterprises (MSMEs) na walang-upahang mga lugar upang ibenta ang kanilang ani at dagdagan ang kanilang kita.

Ang Kadiwa ng DA ay isang market linkage facilitation program na nag-alis ng mga hindi kinakailangang layer sa trading cycle. Ang mas kaunting middlemen ay nagdaragdag sa halaga ng pagbebenta ng mga produkto sa mga mamimili na nakikinabang mula sa mga bagong ani na pananim at iba pang mga pagkain sa patas na halaga. Pinapalakas din nito ang mga nagtatanim ng pagkain na maging agri-preneur.

Mula Pebrero hanggang Marso, limang KNP outlet ang na-install sa Cebu City, Rizal Park sa Manila, Sto. Tomas sa Batangas, Pili sa Camarines Sur at ang Trade Union Congress of the Philippines (TUCP) compound sa Quezon City.

Ang limang KNP outlet ay may kabuuang benta na umabot sa P3.66 milyon sa dalawang buwan ng kanilang operasyon. Mas maraming lugar ang mabubuksan sa lalong madaling panahon kasunod ng direktiba ng Pangulo na mag-install ng mga katulad na trading hub sa ibang mga site sa buong bansa.

Ang KNP ay isang inter-agency collaboration, na ipinatupad sa pakikipagtulungan ng Department of Trade and Industry (DTI), Department of Social Work and Development (DSWD), Department of Labor and Employment (DOLE) at Department of the Interior and Local Government (DILG).

Ang DA-Agribusiness and Marketing Assistance Service (DA-AMAS) ang nangunguna sa pagsasagawa ng Kadiwa ng Pangulo at nakikipag-ugnayan sa Farmers’ Cooperatives and Associations para sa kanilang posibleng paglahok. Kasama sa mga interbensyon ng DA ang suporta sa logistik tulad ng pagdadala ng mga produkto mula sa mga sakahan patungo sa mga pamilihan.  Santi Celario 

MANILA, Philippines – SUPORTADO ng dating three-term Congressman at kasalukuyang Councilor Alfred Vargas ang panawagan ni Pangulong Ferdinand Marcos, Jr. na lalong paigtingin ang pag-aalaga ng water resources ng bansa kasunod ng inaasahang paghampas ng El Niño ngayong taon.

“Tama ang ating mahal na Pangulo. Wala tayong cohesive plan sa water management. Hindi nagkaka-ugnay ang ating mga regulasyon mula national hanggang local levels. Kahit mayaman tayong mga Pilipino sa water resources, hindi natin nadedevelop at nagagamit ang mga ito nang maayos,” pahayag ni Vargas.

Ayon kay Vargas, mahalaga ang pagpuna ng Pangulong Marcos sa problemang ito at ang pagdeklara ng isang “water crisis.”

Kaugnay nito dahil sa pahayag ng Pangulo, nagkaroon ng political will at focus para palitan ang mga outdated na mga patakaran at teknolohiyang hadlang sa epektibong water management.

Base sa datos ng World Health Organization (WHO), isa sa bawat sampung Pilipino ay walang access sa improved water sources. Mahigit 136,000 naman ang namamatay sa acute watery diarrhea kada taon dahil na rin sa hindi malinis na tubig. Ito ay lumalala tuwing El Niño dahil sa mababang water supply.

“Pinapahalagahan ng ating Pangulo ang karapatan ng bawat isang magkaroon ng access sa malinis na tubig. Ang tubig ay buhay. Tama ang isinusulong na whole-of-nation approach sa use, conservation, at distribution ng likas na yamang ito,” sabi ni Vargas.

Samantala inanunsyo rin ng Pangulong Marcos Jr. ang pagtatayo ng isang Water Management Office para pag-isahin ang mga mandato ng iba’t ibang ahensya at opisina sa gobyerno na may kinalaman sa sustainable water supply.

“Magandang hakbang ang ginawa ng Pangulo habang isinasabatas pa ang Department of Water Resources. Full support tayo sa adhikaing ito. Saludo tayo sa sipag ng mahal na Pangulo at bilib din tayo sa sigasig ni Speaker Ferdinand Martin Romualdez na pangunahing may-akda ng panukalang National Water Act,” dagdag ni Vargas.

Sa ilalim ng isinusulong na National Water Act, ang Department of Water Resources ang magiging pangunahing ahensyang tututok sa national policy-making, coordination, at management ng lahat ng water resources ng bansa. (Santi Celario)

NANAWAGAN si Pangulong Ferdinand R. Marcos Jr. sa sambayanang filipino na makiisa sa Earth Hour, ngayong araw ng Sabado, sa ganap na alas-8:30 ng gabi hanggang alas-9:30 ng gabi para pagaanin ang matinding epekto ng climate change.

Sinabi ng Pangulo na makikiisa ang Malakanyang sa pag-obserba at pagtalima sa Earth Hour sa pamamagitan ng “switching off” sa mga non-essential lights sa itinakdang Earth Hour.

“The event is held annually, encouraging individuals, communities, and businesses to turn off non-essential electric lights, for one hour, from 8:30 p.m. to 9:30 p.m. on the Saturday of March, as a symbol of commitment to the planet,” ayon sa Presidential Communications Office (PCO).

Sa isang video message, sinabi ng Chief Executive na ang Pilipinas ay nahaharap at nakikipagpambuno sa 20 bagyo kada taon, “making it one of the most vulnerable countries to climate change.”

“As the earth’s temperature gets warmer, with the world’s carbon footprint reaching a new all-time high of 36.8 gigaton in 2022, the world braces for the irreversible impact of climate change,” ayon kay Pangulong Marcos.

“It only takes 60 minutes to do good for our future, 60 minutes to take notice and commit to saving Mother Nature to be united and take action because together nothing is impossible,” dagdag na wika ng Pangulo sabay kapag ginawa ito ay binibigyan ang “Mother Nature 60 minutes to breathe.”

Ang Earth Hour ay worldwide movement na inorganisa ng World Wildlife Fund.

Tinuran ng Pangulo na ang pagtalima sa Earth Hour ay makatutulong sa pamahalaan na ipatupad ang action plans nito na mapakikinabangan ng planeta.

“So at this hour, let us stop, slow down and dedicate a moment to help the Earth breathe and heal anew. May this shared activity remind everyone that environmental preservation is an inter-generational responsibility and that it should become our individual and collective priority in the pursuit of progress and prosperity,” ayon sa Pangulo.

“Let us become part of the solution and embark on advocacies, programs and initiatives that will help us protect and preserve the Earth, our only home,” ayon pa sa Pangulo. Kris Jose

Sinuportahan ni Senator Christopher “Bong” Go ang pagpapasa ng Senate Bill No. 2035 o ang “Trabaho para sa Bayan Act” na layong magtatag ng isang master plan sa paglikha ng trabaho upang makamit ang short-term at long-term goals para sa bansa.

Ang panukala ay pangunahing iniakdad ni Majority Leader Senator Joel Villanueva.

Sa kanyang co-sponsorship speech, binigyang-diin ni Go ang kahalagahan ng disente at pantay na oportunidad sa trabaho para sa lahat ng Pilipino, lalo na sa panahon ng patuloy na pandemya.

Ipinunto niya na maraming Pilipino ang nawalan ng trabaho dahil sa pandemya at ang unemployment rate noong Enero 2023 ay tumaas sa 4.8 porsiyento mula sa 4.3 porsiyento noong nakaraang buwan na nakaapekto sa 2.37 milyong Pilipino.

“This measure will stimulate national and local economic growth and development through aligning investment and other incentives provided by law for decent job generation, including reintegration of Overseas Filipino Workers,” sabi ni Go.

Binigyang-diin niya ang sapat na pagpaplano at diskarte upang lumikha ng sapat na trabaho.

“Dapat po talaga may sapat na pagpaplano at stratehiya para makalikha tayo ng sapat na trabaho. Through the Trabaho Para sa Bayan Plan, we will promote the employability, competitiveness, wellness, and productivity of workers,” anang senador.

Kung maipapasa, ang Trabaho Para sa Bayan Act ay magtatatag ng National Employment Master Plan na kikilalaning “Trabaho Para sa Bayan Plan.”

Ito ang magsisilbing master plan ng estado sa pagbuo ng trabaho at pagbangon upang makamit ang mga pangmatagalang layunin at mga pananaw para sa bansa.

Mayroon itong apat na layunin — pasiglahin ang paglago at pag-unlad ng ekonomiya, itaguyod ang kakayahang magtrabaho at pagiging mapagkumpitensya ng mga manggagawa, magbigay ng suporta at insentibo sa mga negosyo, at magbigay ng insentibo sa employers at stakeholder ng industriya.

Ang panukala ay ilalapat sa pambansa, rehiyonal at lokal na mga yunit ng pamahalaan nang walang pagkiling sa karapatan ng Bangsamoro Government at mga bahagi nitong LGU na magpatibay at magpatupad ng mga proyekto o programa sa paggawa at trabaho, batay sa mga pambansang patakaran, batas, tuntunin, at regulasyon.

Kabibilangan ang Trabaho Para sa Bayan Plan ng tatlong taon, anim na taon, at sampung taong development timeline para sa vision, mission, goals, at milestones nito.

Isinasaad din ng panukalang batas ang pagtatatag ng Trabaho Para sa Bayan Fund na magbibigay ng kinakailangang pondo para sa pagpapatupad ng Trabaho Para sa Bayan Plan. Magmumula ang pondo sa iba’t ibang ahensya ng gobyerno, donasyon, grant, at iba pang resources. RNT