MANILA, Philippines- Nagsasagawa ngayon ng dragnet at backtracking operation ang Manila Police District (MPD) sa isang lalaki na nakabaril at nakapatay sa dalawang vendor sa Sta. Cruz, Manila.

Sa ulat, kinilala ang mga nasawi na sina Marlon Tan y Buco, 42, nakatira sa 850 Gonzalo Puyat St., Quiapo, Maynila at Jimmy Lingat y Santos, 52, married, ng 318 P. Gomez St.,sa nasabi ding lugar.

Sa imbestigasyon, nangyari ang insidente sa kahabaan ng P Gomez St. kanto ng Carriedo St., Quiapo bandang alas-7 ng umaga kahapon.

Natukoy lamang ang tumakas na suspek na nakasuot ng Grab food shirt at malaki ang pangangatawan sakay ng motorsiklo.

Ayon sa testigo na si Doroteo Lingat na isa ring vendor sa lugar, nag-aayos ito ng kanyang paninda nang makita ang suspek na dumating mula sa Palanca St.

Bumaba ito sa kanyang motorsiklo saka pinaputukan si Tan na noo’y abala sa paghahanda ng kanyang panindang garments.

Matapos barilin si Tan ay sumunod namang pinaputukan si Lingat na noo’y nag-aayos din ng kanyang paninda.

Nang maisakatuparan ang krimen, mabilis na tumakas ang suspek sa direksyon ng Rizal Avenue (Northbound) sakay pa rin ng kanyang motorsiklo.

Inaalam pa ng pulisya ang motibo sa pamamaslang sa mga biktima. Jocelyn Tabangcura-Domenden

MANILA, Philippines- Inakusahan ng duopoly challenger na DITO Telecommunity ang dominant operators nitong Lunes matapos maghain ng kaso sa Philippine Competition Commission (PCC) sa umano’y anti-competitive practices sa kanilang interconnection deals.

Sa isang briefing, sinabi ng mga opisyal ng DITO na ang Globe Telecom at PLDT/Smart ay “not very compliant” sa ligal na mandato na i-interconnect ang lahat ng telco carriers sa market.

“It has become very difficult for our subscribers to interconnect with Globe and Smart,” pahayag ni DITO Chief Administrative Officer Adel Tamano.

Bago ang commercial launch nitong Marso  2021, nakumpleto ng DITO ang interconnection ng network nito sa dalawang industry giants. Ito ang nagbibigay-daan para makapagpadala ng mensahe ang mobile subscribers ng DITO at makatawag sa mga user ng Smart at Globe.

Sinabi ni DITO Chief Technology Officer Rodolfo Santiago na mula sa 100 tawag mula sa DITO sa Globe at Smart, 20 hanggang 30 tawag lamang ang nakakapasok.

Sinabi pa ni Tamano na napilitan silang magsampa ng kaso, at iginiit na inaabuso ng dalawang telco ang kanilang dominance sa market “ang hinder our growth.”

“They’re giants. Our market share for the entire market is at most five percent. There would be no question who is in the dominant position,” ayon kay Tamano.

Base kay Tamano, ang market share ng DITO ay dapat na “much, much higher if interconnections were okay.”

Sa kasalukuyan ay wala pang pahayag ang Globe at PLDT ukol dito. RNT/SA

MANILA, Philippines- Tinatayang pumalo na sa 35,463 ang kabahayan na winasak ng magnitude 7 earthquake na yumanig sa Abra at kalapit- Northern Luzon provinces noong Hulyo 27, 2022.

Sa pinakabagong situation report na ipinalabas ng National Disaster Risk Reduction and Management Council (NDRRMC) sinabi nito na 34,842 “partially damaged”  at  621 naman ang “totally damaged”  na kabahayan.

Karamihan sa mga  nawasak na kabahayan ay sa Cordillera Administrative Region (CAR) , 26,856; sinundan ng Ilocos Region na may 8,605 at tig- isa naman ang nawasak na bahay sa National Capital Region (NCR) at Cagayan Valley.

Ang halaga naman ng nasira sa agricultural infrastructure, equipment at facilities ay umabot na sa P33.22 milyong piso sa CAR, habang ang napinsala naman sa irrigation systems ay umabot na sa P22.7 milyong piso sa CAR at Ilocos.

Ang pinsala naman sa infrastructure sa Ilocos Region, Cagayan Valley, CAR at NCR ay umabot naman sa P1.59 bilyong piso.

Sa kabilang dako, 11 naman ang naitalang namatay habang 614 naman ang nasugatan.

Nanguna naman ang CAR sa listahan ng mga may nasaktang indibiduwal na may 578,sinundan ito ng Ilocos na may 34 at Cagayan Valley, na may dalawang bilang.

Samantala, ang mga pamilyang apektado ng malakas na lindol ay 140,101,na may katumbas na  512,936 katao na nakatira naman sa 1,334 barangay sa Ilocos Region, Cagayan Valley at CAR.

Mayroon lamang 298 pamilya o 968 katao ang nananatili sa 11 evacuation centers habang ang mayorya ng mga evacuees ay nagsimula nang bumalik sa kanilang mga tahanan. Kris Jose

MANILA, Philippines – Hindi hadlang ang nakuhang gintong medalya kay Filipino Olympian Hidilyn Diaz dahil determinado itong gumawa ng higit pa para sa Pilipinas, dalawang taon bago ang 2024 Paris Olympics.

Noong Linggo nag-post si Diaz sa Instagram ng larawan ng mga chalked hands na “isang paalala na sa kabila ng lahat ng nagawa ko, ang weightlifting ay nagtulak sa akin na ipagpatuloy ang pagsisikap ko para sa bayan natin.”

Sinabi ni Diaz na isinasantabi niya ang kanyang honeymoon kasama ang asawa at coach na si Julius Naranjo habang nananatili ang 730 araw para sa Paris Olympics.

“Kahit mahirap, even though I do not need to prove anything, gusto ko pa rin gawin ang lahat [nang] makakaya ko para sa weightlifting at sa Pilipinas,” wika nito.

Hinikayat din ni Diaz ang bansa na samahan siya sa kanyang “#LastLift.”

“I am manifesting this dahil ito ang gusto ko at weightlifting ang nagpapasaya sakin. Samahan ninyo ako sa aking desisyon to go for my #LastLift. #TeamHD will be with me throughout the whole process pero kailangan ko ang suporta at dasal ninyo lahat,” dagdag niya.

Naalala rin ni Diaz sa larawan ang kanyang silver medal finish sa Rio Olympics na nangyari eksaktong anim na taon na ang nakararaan.

“Natatandaan ko pa kung gaano kataka-taka ang araw na iyon, kung paano ako ginulat ng Diyos ng isang pilak na medalya noong ako ay naglalayon pa lamang ng isang Tanso, ito ay isa sa mga ipinagmamalaking sandali ng aking buhay.”RICO NAVARRO

MANILA, Philippines- Inanunsyo ng Manila Electric Co. (Meralco) onitong Lunes ang tapyas-singil sa kuryente para sa buwan ng Agosto, sa pagpapatuloy ng implementasyon ng kompanya ng refund na iniatas ng Energy Regulatory Commission (ERC).

Sinabi ng Meralco na ang overall rate sa tipikal na tahanan ay binawasan ng 20.87 centavos per kilowatt-hour ngayong buwan hanggang P9.5458/kWh mula sa P9.7545/kWh noong nakaraang buwan.

Nangangahulugan ito na mababawasan ng halos P42 ang kabuuang bill ng residential customer na kumokonsumo ng 200 kWh.

Ipinag-utos ng ERC nitong nakaraang buwan sa Meralco na ibalik ang halos P21.8 bilyon sa loob ng 12 buwan, o hanggang mabayaran ito ng buo. Nangangahulugan ito ng 86.56 centavos per kilowatt-hour para sa bill noong nakaraang buwan.

“The implementation of distribution-related refunds totaling P48.3 billion as ordered by the ERC continues to temper customers’ monthly bills. This is equivalent to a total refund rate of P1.8009 per kWh for residential customers,” pahayag ng Meralco.

Tinapyasan ang generation charge para sa Agosto ng 19.44 centavos hanggang P6.5812/kWh mula sa P6.7756/kWh sa nakalipas na buwan, kasunod ng mas mababang charges mula sa power supply agreements (PSAs).

“With the ongoing rainy season, Meralco advises its customers to practice safety measures and prepare for floods or typhoons,” ayon sa power distributor.

“Customers are urged to charge mobile phones, flashlights, and other important gadgets or rechargeable appliances,” dagdag nito. RNT/SA